Mara Autonomous District Council (MADC), Siaha, Government of Mizoram, India

PRESS RELEASE

NO.108/2022

SIAHA, 4 Thlarâh, 2022, Abeipanoh - Puhpa HC. Lalmalsawma Zasai, Hon’ble Dy. CEM, MADC ta târi 2 & 3 Thlarâh, 2022 chhôh ta Noaotlâh, Lôbô, Chhaolô, Iana nata Siata khihzy liata School ypazy tly ta, a tlyna khih liata dyna Welcome Gate angia kawpa ta taopa ta, pawpi ri chhao ta arônah kawpa ta vaw dy ei ta, khi to liata Seih, Viachao nata Vao zy thiehpa ta pati amâ vaw chhuanoh.

Puhpa Lalmalsawma chata ano avaw dy tuhpa zawpi nata public meeting liata biereina hnei laihpa ta zawpizy hnoh ta pasyuna bie nata pahaona bie pha kawpazy reih laih ta, ary liata palâsapa he a bierei tlâhpi viapazy a châ:-

“Atanoh liata ei phuh lei pi ta arônah kawpa ta na vaw dy ei chi ta, eina papyupalihna ei chi he a rônah tah na ta, ei châ ly kaw ei. Khitlâh mohôh tuhpa eima VCzy, Unit chhithatuhpazy, Awnano chihthatuhpazy, MTP, MCHP nata MSO chhithatuhpazy, Pachuhpazy nata Achuhaipazy, nama zydua chô liata palôh hmeiseihpa ta alybie ei reih. Atahmâ liata ei vaw siepapuana chhâpa he, ei hmia liata EM a vaw y chiehpazy nata eima Officer apalaikhei chhih kawpazy phahnai ngiah kawpa ta hmah ama vaw la chiehpazy pazao awpa ta avypa ei châ.”

“Khazohpa ta ei bia zawpi nata eima MADC nôpawpazy siepapahliepa ta Dy. CEM maohphaohna ei ngiatlâh liata a pahnieh tawhta cha eima râh School zydua a su liata tlypa ta achupasia awpa khoh na ta. Sievaw nawpa sôh TA/DA lâchhâh he pachâ hlei leipa na ta. Atly (election) chy chhaota keimo sôh ta khi tlyhpa ta thata Campaign pi ta. Chavâta, eima râh Achuna he keimo mo pakha sôh tawh chhao ta eima tly awpa na a châ tahpa he ei biepi chaipa a châ. Chavâta daihti a chaie kawpa hry ta School duahmozy pahno awpa hleikhô ta ei mo cheingei ta hmô awpa ei khoh vâta asiepapuapa ei châ.”

“School nano nanopa ei tly hapa tawhta ei hmo hmôpa nata ei tyhpazy bâhta cha share tua ei sah la.”

“Middle School sâkha lia cha ama school pôpalôhpa liata achuhaipa hawti pa-7 ngâlâh vaw hnei ei ta, ama School Building zy hra cha chy kaw ta, a chhôh liata Furnitures – desk, bench, blackboard, Almira nata abâ liata a tawhpa Chart paper nata hmo hropazy chhao asihny kaw ta, Siku nata a chheipâh (compound) chhao a vaw pualei ngâsâ.”

“School sâkha eima va tly heihpa cha, ama School building nata a chheipâhzy cha vaw pathaih kaw ta, Achuhaipazy ta Uniform angia kawpa, Private School zy liata ama hneipa hawh ta vaw hnei hra ei ta. Avaw pakyh pi ta, Pachutuhpazy ta ama thla hlao tawhta vaw thyupakhy tyh ei ta, cha chata ama Siku peimawh via pachaipazy chalei nawpa nata repair nawpazy, Siku hawti achunabu nata Uniform chalei nawpa ahnei leipa, rairu viapa ama phanopazy cha, cha ama sôh thyupakhypa tawhta ama vaw chaleipa tyhpa cha vaw châ ta. Chatawhta, MTP, MCHP, MSo nata Awnano Thyutlia Py, Nô Py nata Paw Py zy chhao ta vaw baopa ta, ama vaitlâh zydua nahta ama hriaparaohna apha kawpa a châ.”

“He hawh tlupo ta ama hriaparaohna a pha vâ nata amâ piepasaina vâta ama Result chhao a pha kawpa a châ.”

“Chatlaichu, atanoh liata keimazy hawhpa tlai ta he hawhta a khitlâh ta, achuhaipa hawtizy chhao ta na vaw dy ei chi ta, navaw parônahsapa ei chi ta, ei phuh lei kaw tahpa ei pahno. Atanoh liata Khitlâh nô nata paw, VC, Unit, Awnano nata NGO chhihthatuhpazy, Teachers nata Students zy, namâ kipha kaw. Nama khitlâh nata School châ he ta taotheipa ei hnei chyh kaw tahpa ei pahno. Anodeikua, eima zydua ta eima hriaparaoh khitala, he khitlâh, eima khitlâh hrozie (soial life) nata Achuna lia he ta hmo thiehpa (change) eima tlôkhei cheingei nahta hnabeiseihna ei hnei.”

“A chô liata eima râh School sâ 2zy duahmo ei vaw palâsapa tawh khi ta eima zydua ta tao awpa eima hnei tahpa ei rei khohpa a châ.”

“Atahmâ he eima râh liata Primary School 112 nata Middle School 51, a zydua ta 163 mohôh ngâhaipa châ ta. He zydua mohôh awpa he ta sawhkhâ he ta rairuna hluhpi a hnei cheingei aw tahpa ta a sia thlâh hapa a châ.”

“Chavâta eima zydua ta tiama papua khoh ei si la, sawhkhâ ku ngâlâh hâ leipa ta eima theina zydua papuapa ta eima sawnahzy achu nawpa na a châ tahpa pahnopa ta hria khoh lymâ ei suh u. Eima VC nah lâ chhao ei châ haw khoh eipa cha he he a châ – nama khih/vaih chyu School hmah pasiesa nawpa he ta Job Card noh kha tha chhâ vaw thyupakhy hra teh u tahpa he a châ. School liata Furnitures pha viapazy tao nawpa ta hmâpa châ aw ta, MTP nahzy ta Bench nata Desk tao tlâhrai hria aw ei ta, MCHP ta thopi vaw palôhpa teh u. He hawh tlupo ta School he kyh pachâ u la, Pachutuhpazy nahta hriaparaohna a pha khiatala Pachutuhpazy chhao ta ama rai liata ama vaw tiama via cheingei aw. Chatanachata School pha kawpa lâta nama papua thlâh ha aw. Cha daihti liata cha khihpi lâta rairu kawna chô ta nama sawnahzy English Medium School liata so byuh khao leipa aw ta, School pha kawpa nata Result pha kawpa nama hnei lymâ thei ha aw.”

“Pachutuhpazy chhao ta, nama raihriana liata atahmâ hlâ ta tiama vaw papua chyu via teh u. Nama school he kyhpachâna chô ta, ngiachhiena chô ta nata saiheina chô ta mohôh u la, nama sawnahzy kiana tlâh a châpa School ta vaw tao tua teh u. Su hro lâ ta School liata nama sawnahzy avaw lie awpa ta aw pathi khai heih u la, nama pachuna School lia cheingei vaw pachu teh u. Nama sawnahzy kiana tlâh a châ leipa liata Siku pachutuhpa châpa chhao he noza â chhih.”

“Atahmâ he, Regular Teacher zy chhochhi cha thysari (70,000) hlei ahlaopazy nata lakh 1 hlei ahlaopazy sai nama châ ha bâ. Private school liata MA, MSc laihsa satlia ahriapazy he tlaw 5,000 – 7,000 zy ngâlâh na ama hlao bao. A yzie cha Sawhkhâ school liata pachutuhpa pakha hlao he ta Private School liata pachuhpa pa 10 nama hmâh thei tahna a châ. Chahawhta a châ khiata cha nama raihriapa nata nama hlao he â phuh ma? Nama School hawti hnei zie nata kô chhâna lâ liata Result nahta he ta â phuh ma? tahpa zy he vaw pachâ u la, eima raihriana chyu liata pihpathi heih suh u.”

“Kheihawh School rai châ sala, kheihawh Political party liata ma aparuta ta side-pa avaw hneipa rai châsi la, School lia deikua cha palôhru miapha phaopa ta vaw y u la, Headmaster zy he vaw za kaw u la, ama bie vaw zyh pha kaw teh u. Keimo (officials) ta school bie nata hla eima la chai nawpa cha Headmaster zy he ama châ lymâ aw tahpa he vaw pahno thlâh ha teh u.”

“Achhâ chaina liata ei châ haw khohpa ei châ, ato liata Khazohpa chi tah, A biepiepazy zyh awpa he a châ. Chavâta suhrawh sukha he vaw pachâ peimawh u la, nama yna Awnanopa liata vaw pie cheingei teh u. He he chhôhkha nata khitlâh chhao ta byhnâ nama daona hnawh awpa a châ tahpa athei thlâh ha teh u,” tahpa ta pasyuna bie a reih.

Atahmâ liata Dy. CEM zachhihpa siepapuana he khito liata khihsawzy ta pasô kawpa ta a vaw ly kaw ei ta, ano palyupalih nawpa tahpa ta khito liata pati amâ vaw chhuanoh laihpa liata Seih 2, Viachao 2 nata Vao 8 tlai ama vaw thiehpa.

Puhpa L. Khaichyu, Ex-MDC, Chairman, Coordination Committee, MADC nata Puhpa FC. Rehmô, Ex-MDC, Member, Coordination Committee zy chhaota biereina daihti hmâh ei ta, Puhpa CL. Hranga, Media Chairman, MNF District HQ, Siaha ta hmiapahnosana a hnei.

Puhpa HC. Lalmalsawma Zasai, Hon’ble Dy. CEM khitlypa he ary liata palâsapa Officials nata Party nôpawpazy ta ama zi:-

Officials:

1. Puhpa John VT. Hniehu, AEO, MADC

2. Puhpa L. Lalduhkima, Addl. DPC, Samagra Shiksha, Siaha.

3. Laihsa H. Esther, Project Assistant, Samagra Shiksha, Siaha.

4. Puhpa S. Abraham Beihropie, Data Entry Operator, Samagra, Siksha

5. Puhpa Hallelui Lalhuapzauva, PA ta Dy. CEM

6. Puhpa L. Vabeimolai, PSO to Dy. CEM.

Party nôpawpazy tawhta:

1. Puhpa L. Khaichyu, Ex-MDC, Chairman, Co-ordination Committee, MADC,

2. Puhpa FC. Rehmô, Ex-MDC, Member Co-ordination Committee, MADC

3. Puhpa HC. Malsawmthanga, Member, Planning & Development Board, MADC