PRESS RELEASE 

NO 186/2022

SIAHA, 21 Phiapi, 2022, Hriatuanoh - Atanoh dawh 1:00 PM pa ta Meisavaih Clinic Centre, Siaha cha Puhpa HC. Lalmalsawma Zasai, Hon’ble Dy. CEM, MADC ta a pahy. 

He pahyna liata Puhpa HC. Lalmalsawma Zasai, Hon’ble Dy. CEM chata biereina hnei ta, Clinic Centre ama hnei thei nawpata thapi phia tah, hmahla tuhpa nata biatuhpa Puhpa ST. Vanmalsawmliana, Hon’ble EM, MADC reithai tlâh a châna zie reih ta, Mizoram sawhkhâ nata Siaha Health Department liata hyutuhpa zydua chô liata alynabie a reih. 

“Meisavaih zawpi zy chhao Health Clinic Centre pha kawpa nama hneipa vâta châ lykhei kaw ei na ta, he Clinic Centre he phahnai kawpa ta hmâ awpata khokheina cha hlâ ei na ta, vaih chhôh liata School O nata Clinic Centre zy he daodo kawpata mohôh tah, he liata hriatuhpazy  khitlâh zawpi zy ta apha kawpata hrialâh awpata ei châ haw ei,” tahpa ta pasyuna bie pha kawpa a reih. 

He Clinic pahyna programme liana heta Puhpa ST. Vanmalsawmliana, Hon’ble EM i/c Sports etc. MADC nata Dr. Lalnunziri, CMO zy chhaota alynabie nata pasyuna bie pha kawpa reih hra ei ta, atanoh liata pahypa Health Clinic Centre he duahmo asâh viapa Health and Wellness Centres lâta soh awpata hmahla ngâ haipa a châna zie a ma reih hra. 

He Clinic Centre pahyna programme he Puhpa Z. Chialo, VCP Meisavaih East ta chhitha pa ta, Puhpa A. Lykha, Meisavaih West MTP President ta alyna bie reina a hnei hra. 

He Clinic pahyna liana heta Siaha Health Department liata hriatuhpazy nata Dy. CEM zachhihpa azituhpa MADC Officer zy hleikhôta Meisavaih zawpi zy amâ hlao pha kaw. 

ISSUED BY:

Information & Publicity Department

Mara Autonomous District Council

Siaha.