PRESS RELEASE

NO.189/2022

SIAHA, 22 Phiapi, 2022, Hrianeiho - Atanoh dawh 11:00 Am pa ta Central YLA Ground, Lawngtlai liata Lai Autonomous District Council (LADC) Golden Jubilee alyna hneipa châ ta, he liata Puhpa HC. Lalmalsawma Zasai, Hon'ble Dy. CEM, MADC cha Guest of Honour châpa ta programme hmâkhei ta, MADC vyuhpa ta biereina (Greetings) a hnei pâ hra.

Puhpa HC. Lalmalsawma Zasai, Hon'ble Dy. CEM chata Guest of Honour châta raopa a châpa vâta alynabie reih ta ta, atanoh LADC kô 50 a tlohpa alyna su liata Senior Legislature ahlao thei khao leipazy nata he alyna su liata liata a ypa, ryureina dawkâh a chadô khao leipazy zana samaw hlâ ta, LADC kô 50 a vaw siena liata tiama kawpa ta a vaw hriatuhpa Officer zy nata LADC staff pensioner zydua zana samaw hlâ ta, ahria haipa Executive Secretary nata a hrialâhpa zydua, atanoh liata khokheina a hlâ chyu ei.

"Pawi & Lakher he India Constitution liata â vaw roh tawhta vaw rei ha ta, eima moh ta pheisaih châ ei ta, eima moh ta Lakher Clerk tahpazy sawhkhâ ta a pahno. Chahawhta ryureina hropa, chi hropa, reih nanopa ta a ypa châ pi ta, eima chheipâh chiphozy liata cha Lai he miah pathla tuhpa eima paw chaipa tah thei awpa a châ. Chavâta Lai nahzy he eima chheipâh liata duahmo asâh kawpa nama patu lymâ tahpa ei rei khoh."

"1972 liata Pawi & Lakher cha apachhaihpa ta Lai & Mara Autonomous District Council hneipa ta atanoh kô 50 eima vaw hmâ hapa he a rônah ei tah kaw.  Lai nah he lakh kha nata thy thôh rachhôh châ ei chi ta, keimo Mara cha lakh 1 chhao atloh leipa eima châ no ta Khazohpa ta India Constitution liata miah roh pangia ta, keimo tlai ta ryureina eihrâhpa hnei awpa ta ryureina dyuchhai miah pie ta, ryureina Opi miah a piepazy he arônah hmeiseih. 

Chipho chynawh kawpazy sasyh amohôh thei awpa ta miah tao tuhpa eima Khazohpa moh cha reithaipa ta y sala, Lai & Mara nahzy eima Khazohpa reithaina châ pahno awpa ta eimâ hrua."

"He ryureina eihrâhpa eima hneipa he zawpizy ta pasôna châh pahno si la, Mizoram sawhkhâ phapa Puhpa Zoramthanga,CM zachhihpa sawhkhâna ry liata keimo Lai nata Mara nahzy pi ta hmahsiena khochhih kawpazy eima hnei lymâ awpa he ei khoh kawpa a châ."

Atanoh liata point chyhta ei rei khohpazy cha:-

1. Party nano nanopa liata y hra ei si la, chipho issue liata cha reiraoh kawpa ta keih chakâ khoh awpa ta ei cha hrua ei.

2. Biehneina eihrâhpa Khazohpa ta miah a piepa liata chôtla lamo beihneina a chabapazy pi ta, rai piena kyh liata ahnei chiehpa pie baichhi leipa ta ahnei mâh leipazy pie suh u; one family, one job tahpa ta eima thyutliazy ta ama rei tyhpa he pahnona chô ta eima hyutuhpazy ta palôh hnei awpa ta ei cha hrua ei.

3. ADC he byhnâ a châ kaw tarawpa ta eima moral a parao theipa a châ vâta sôh nata thih eima hneipazy nata biehneina eima hneipazy he Lai nata Mara sawzy eima Economy miah parao tuhpa nata eima moral parao tuhpa ta hmâh leipa ta, eimâ sâh via lymâ thei nawpa ta thathipa nata hmo do leipa ta ryu apareisa leipa ta ADC he cheihchalo achhuah lymâ hri suh vy tahpa ei cha hrua ei. Sixth Schedule ry liata eima ypa he eima vâhnei ngâsâ; atahmâ chhochhi cha Order of Precedence liata ADC nôpawpazy duahmo pasâh hapa châ ta, chavâta zawpi chhao ta keimo sasyh aza raihrie ei si la, chihropazy ta eima nôpawpazy miah ama vaw zapa thei nawpa ta eima râh nôpawpazy he keimo zawpi ta zana chô ta cheihchalo lymâ suh u.

"He eima duahmo sâh kawpa he aly kawpa nata pha kaw ta eima hmâh aw; anodeikua he rakha liata y aw ma pi; biehneina sâh viapa eima tei lymâ aw; Lai zy Mara zy he khati ma cha Independent a hmôna daihti a y aw; keimo chhâ lia eimâ tyh leipa chhao ta he châ he ta thyutliazy ta tiama papua lymâ suh u tahpa ta châ haw ei na ta, ei cha hrua ei," tahpa ta Puhpa HC. Lalmalsawma Zasai, Hon'ble Dy. CEM he ta LADC Golden Jubilee khokheina nata bietapa pha kawpa a reih.

Dy. CEM zachhihpa he Puhpa M. Manasia, Deputy Chairman, MADC, Puhpa N. Lalrosanga, Vice Chairman, Planning & Development Board, MADC zy ta zi ei ta, Puhpa L. Vabeimolai, PSO to Dy. CEM nata Puhpa T. Pabua, Cameraman, I & P Department, MADC zy ta ama zi hra.

ISSUE BY:

Information & Publicity Department

Mara Autonomous District Council

Siaha.