PRESS RELEASE

NO.114/2022

SIAHA, 13 Thlarâh, 2022, Hriaheinoh – Atamy dawh 11:00 Am pa ta Government Higher Secondary School (Gov’t HSS), Siaha Week Closing cum Fresher’s Social programme ahmâpa liata Puhpa HC. Lalmalsawma Zasai, , Hon’ble Dy. CEM, MADC cha Chief Guest ta hruapa a châna hawhta ahlao patlohpa ta programma a hmâkhei ei.

Programme he Puhpa C. Rodinliana, Lecturer ta chhihtha ta, Miss H. Beihroso, Lecturer ta Devotion a hmâh. Puhpa V. Samson, Principal ta welcome speech reih ta, Freshers tawh nata old comer tawhta biereina daihti ama hmâh hra. Hadasi, NT. Vangiaso, John Litas nata NT. Beidaosia zy ta mo pakha hlasana hnei ei ta, Puhpa CH. Vabeikhia, Lecturer ta Week ahmâna report nata prize distribution daihti hmâh ta, Miss Lucy Lalnufeli, Lecturer ta vote of thanks a reih.

Puhpa HC. Lalmalsawma Zasai, Dy. CEM ta biereina hnei ta, biehmiachhihpa liata zawpi lâ anaohna alynabie reih ta, ary liata palâsapa he biereina ahneipa liata a bierei tlâhpi viapazy a châ:-

1. Students 400 hlei hmiakô liata Chief Guest châ awpa ta nâ hruatuhpa hyutuhpazy chô liata alynabie reih na ta, atanoh he Shillong liata Student zy programme liata Guest of Honour châ awpa ta hruapa châ taraw na ta, ei bia chhôh Tipi Ferry liata chhiena kyh vâta ei sie thei leipa a châ. October 1st liata MSO Shillong zy hnoh ta apahlao awpa ta ei sie heih hra aw.

2. Kei he Shillong liata ei chu patlô tawhta kô 2 lecturer rai hriapa ta Political Science subject ei vaw pachu haw hra. Daihti rypaohpa y ei ta, Siaha liata School nata College liazy ta Career guidance hleikhô ta studentzy nata interaction hnei awpa he ei khoh kaw.

3. Student thokha hawhta Gov’t High School, Siaha lia he ta Class VI – X taihta ei vaw chu tarawpa ta khihpi via lâ achuna sâ viapa pazao awpa ta ei siena daihti liata NEHU Students’ Union liata President rai ei vaw patu thei thlâh haw.  He liata English ta meeting conduct byuhpa a châ no ta ei za tao thei lymâ thlâ hra. Chavâta Siaha liata student zy, keima hlâta athai viapa sai nama châ, ahmô pahnai khah u. Tahmâno hnabeidy leipa ta tao hnolo u la, BA MA nama châ ti ta cha English nama thai chai pyly aw.

4. Eikha cha Siaha tawhta Shillong liata azu thiehpa admission eima tao kheipa y ta, â chu nawpa su liata Principal ta English ta avaw chhy ta, thai tlâ vei; anodeikua a masksheet vaw moh ta, 1st lia a pass vâta Princial ta admission a pie thlâh ha. Ano he atahmâ cha eima râh liata sawhkhâ rai hria ta, châ thai kawpa a châ. Chavâta hnabeidy leipa ta namâ chupa course he thai kaw achhuah u la, cha cha hlaotlohna a châ.

5. Eimâ chu no ta eima hyutuhpa pakha ta English nama thai khoh khiata la a rei rei ngâlâh leipa ta nama roh hluh awpa a peimawh tah ta, roh hluhpa he writing skills châta apha hleikhô ta a bie a vao pâ pi ta, eimâ chupa course chhao eima thai kaw aw.  Chavâta châ nama rei awpa cha ei 5 chhâ roh papua achhuah u la, a chabao kaw aw ei.

6. Student châ ei chi ta, achhuahna pipa nata laipa  nama hnei awpa apeimawh. Kei cha nôhmei saw châ na ta, ei nô ta pension hlao tawhta nata ei sietanô ta rairu kawpa ta eina chyhpa ei a châ. Anodeikua BA chhâ patlô achhuahpa ta achu hnolo na ta, MA taihta ei kaw chu patlô thei haw.

7. Ei chu nota châhnamei pazy leipa na ta, sahma doh leipa ta, achhâpa cha ei chhôhkha nahzy rairuna ei pahno vâta a châ. Châ ei chu no cha my dawh 6 am pa ta thyu lymâ na ta, Awnano liata thata ahmâh tyh na ta, laihsa charei chakhyh beih vana. Chhôhkha tawhta phusâ ei daopa maih Suhrawh sukha ei pie tyh. He hawhta ei tao vâma a châ ma, atanoh he nama hmiakô liata Chief Guest ta ei vaw duah thei thlâh ha; arônah hmeiseih.

8. A mylâ ta ei tao awpa he atanoh hawhpa liata aroh khai tyh na ta, ei routine ei tao patlô nahta patlô lei ei review heih tyh. Kheihawh rai hmah tao ta, hria awpa ei ngiaroh bei lei vâta ei chu no ta sôh ei vaw palie ha hra. Chavâta lahpinô ei hnei no ta sôh nata thih lâchhâh ei chhôhkha nah pabua tlâ va na.

9. Ri kiana liata khih ei padei lymâ tyh – khoh to nata totâ tôzy ei tao lymâ. A mylâ ta thlâ chhiana liata ei hlao lymâ heih; keima hlâta ahy hmahta thlâ ama chhia hluh via awpa châvei tahpa tiama ei papua tyh. Chavâta ri kiana liata khih padei abyuh khiah khih padei u la, thlâ chhiah chhao absent leipa ta chhiah lymâ teh u.

10. Khizaw liata chyhsa pitlohpa châna cha Awnanopa nata Khitlâh liata ahmâpa he a châ. Opa lyuhri châta chyhsa ahnykhawpa châ lei awpa ta cha Awnanopa nata Khitlâh liata ahmâ awpa he apeimawh hmeiseih; avaw hmâh lymâ teh u.

11. Chanô ta kô 24 tloh hlâta avahpa hnei lei awpa châ ta ;chapaw ta kô 26 hlâ cha lahpinô hnei lei awpa. Vahpa hnei tah, avahpa nô& paw zy apachyhsapa cha noza chhihpa a châ. Chapaw rai hria hoh leipa cha lahpinô chhao hnei lei awpa a châ. Sawhkhâ rai he chyhsa to ta miah adaih aw vei; kheihawhpa raihriana rai, nô nata paw pabua leipa ta nietluana eima hnei tawhta lahpi/vahpa eima hnei awpa a châ.

12. Hria papuapa y hmâh hlâ, Student châhai no ta cha hmo mârupazy hnei achhuah lei awpa châ ta, motor/bike zy nata mobile mârupazy hnei achhuah lei awpa; eima hriapapuapa nata hneina ta â phuh leipa chysia zy uahva lei awpa a châ. Tahmâ dyhchhie khihsa riethei kaw hra u la, châ thaipa ta nama kaw pua khiahta nama khopa zydua nama kaw hnei thei ha aw.

13. Chanô chapaw châna liata student zy ta asohsi awpa châ ta, nôpaw rei angiah kaw u la, pachutuhpazy bie nama zyh awpa ta nama za kaw awpa a châ. Thomas Alva Edison, light bulb hmô papua tuhpa apachutuhpa cha a nô a châ tah ta, chavâta nô nata paw zatuhpazy cha hmialâ daihti liata chyhsa hlaotlohpa nama châ aw.

Chief Guest Puhpa HC. Lalmalsawma Zasai chata Pachutuhpazy hnoh ta pasyunabie pha kawpa reih ta,  “Pachutuhpa rai he Khazohpa ta a chapiepa ei châ ta, tiamapa nata phahnai ngiah kawpa ta hria awpa ta ei châ haw ei’ tahpa ta ahawna chhao a tao hra.

Puhpa HC. Lalmalsawma Zasai, Hon’ble Dy. CEM he Puhpa John VT. Hniehu, AEO nata Puhpa Halelui Lalhuapzauva, PA to Dy. CEM zy ta ama zi.

ISSUED BY:-

Information & Publicity Department

Mara Autonomous District Council

Siaha.