PRESS RELEASE

NO.116/2022

 

SIAHA, 14 Thlarâh, 2022, Pakhynoh – Atamy dawh 10:00 Am kha ta Puhpa HC. Lalmalsawma Zasai, Hon’ble Dy. CEM, MADC ta Council Vaih liata Middle School (M/S) nata Primary School (P/S) zy a tly.

 

Dy. CEM zachhihpa chata School O nata a chheipâhzy a mo khai tawhta Teacher zy Room liata angiapazy biereina chyupa hnei ta, eima râh liata Schoolzy duahmo pahnopasia tah, asu cheingei tly laih awpa a khohzie reih ta, atanoh taihta Mararâh liata School 57 a tly hapa thâtih nata a thei khiah tly khai â chhuahzie a reih.

 

Puhpa HC. Lalmalsawma Zasai, Dy. CEM i/c School Education Department, MADC chata “Pachutuhpa (Teacher) zy ta eima pachuna School liata eima sawnahzy kiana tlâh châ awpa School eima tao awpa a châ” tah ta, “School hluh via he Comprehensive School lâ so awpa ta eima theina hawhta hmah la haipa châ ta,” tah ta, “eima School building nata Furniture zy he ta School hawtizy eima sy a peimawh” tahpa ta a reih.

 

“Daihti rypaoh tua chaipa liata M/S & P/S Pachutuhpazy ta Parents Meet Joint ta hnei theipa châ sala, Samagra/SSA Teacher zy he ama duahmo pha lei ta, ama hlaozy chhôhkha chyh nawpa châta adaih aw vei tahpa pahno thlâhna chô ta ama rairunazy liata ei theina zydua papua khei awpa ei chhuah.”

 

“Teacher zy ta nama hlao tawhta School châta mo pakha ta Bench sâ 1 chhâ donate thei ula apha kaw aw. Sawhkhâ lâ tawh chhao ta theina papua lymâ aw pi ta, tahmâ he M/S School Building sâ 13 sa nawpa châta hmahla haipa a châ.”

 

“Atahmâ hlâta School pha viapa khochhih viapa eima kaw padua thei nawpa ta khitlâh VCzy, NGOzy nahta hrialâh pha awpa peimawh kaw ta, ahrialâhna apha khiah tahmâ hlâta hmah eima sie via aw.”

 

“Eima râh Schoolzy avaw pha via heih nawpa ta Pachutuhpazy pi ta eima sôh, tha nata zâh zy hmâ awpa eimâ ngiaroh lei awpa apeimawh.” tahpa ta reih ta, Pachutuhpazy cha ama rai liata ngâchhih kawpa ta hriapa ta, Khazohpa ta nietluapa pha kawpa a piepa ei Pachuna rai rônahpa he Khazohpa khozie hawhta phahnai ngiah kawpa ta hria awpa ta ahawna chhao a tao hra.

 

Dy. CEM zachhihpa Puhpa HC. Lalmalsawma Zasai he  MADC officials Puhpa John VT. Hniehu, AEO, Puhpa R. Beilochai Khithie, Statistician nata Halelui Lalhuapzaua, PA zy ta ama zi.

 

ISSUED BY:

Information & Publicity Department

Mara Autonomous District Council

Siaha.