PRESS RELEASE
NO.184/2022
SIAHA, 19 Phiapi, 2022, Pachynoh - Atanoh dawh 3:30 Pm liata Puhpa HC. Lalmalsawma Zasai, Hon’ble Dy. CEM, MADC ta Chapi MDC bia a tlypa a za tlôna lâ liata Puhpa Lalhmingliana, MCS, SDO/BDO nata a hrialâhpazy ta Circuit House, Tipa liata Thopi nata ahmie pahâh kawpa chhao ta a vaw dy.
He daihti liata Dy. CEM zachhihpa chata Tipa BDO hnohta “Mararâh School nano nanopa 120 hlei a tly hapa thâtih nata a tlypa Schoolzy duahmo apha kawpa ta â chupasia tawhta School Building zy, Furniture zy pha tlâ khao lei ta, School building sa pathi awpa ta cha sôh hluhpi abyuh awpa vâta sôh hmô nawpa arairu kaw tlôh ta, School building chô pha khao leipazy, a bâ arao hapazy nata dawkâh nata atyuna pha lei kawpazy ei paveih kaw. Eima sawnahzy School O pha ama tah thei nawpa ta School O repair nata pathiehpahlâh heih awpa eima peimawh hmeiseih. Anodeikua MADC duahmo mopa ta eima tao theipa chyh ngâsâ tlôh ta, chavâta sawhkhâ ta hmahsie nawpa ta miah a piepa NREGS he khih zawpi (Gram Sabha) nahta tiama papuakhohpa ta eima sawnah School O pathieh pahlâh nawpa ta 10% chhâ hmâ nawpa dâh pachâpahmaoh awpa ta Rural Development hyutuhpazy nata Village Council zydua, palôh hmeiseihpa ta ei cha hrua ei” tahpa ta a chho.
Chahleikhô ta School O pangaina ahnei phathi leipazy, hâti châta sie rairu kawpa lâpizy, school tlyhmia chhia pakawh nawpa raizy he BADP tly ma, material component programme a hmâna dâh pachâpa ta tiama papua khoh awpa ta Dy. CEM he ta BDO Tipa ta a hruapa a châ. Dy. CEM he ta Project Director (PD), DRDA nata Siaha RD Block liata BDO zy, Joint VC zy chhao a vaw reikhei ha hrapa a châ.
NREGS tawhta Job Card apuapa liata ‘Noh kha (1) tha’ he zawpi (Gram Sabha) ta ama pasaih thei khiatala School pathieh pahlâh nawpazy, Furniture tao nawpazy ta hmâ phahnai tah, MTP nata MCHP zy nata ahrialâhna pha kawpa hnei awpa a khoh zie, Dy. CEM he ta khi nano nanopa a tlyna liata pahruana tao tyh ta, a hlao patloh awpa ta biehneina a chaba tuhpa PD nata BDO zy mokheina nata deichhyna a peimawhziezy reipa ta ahawna a taopa a châ.
Puhpa HC. Lalmalsawma Zasai, Hon’ble Dy. CEM zachhihpa a vaw dy tuhpa Tipa BDO chhao ta a palôh liata achuna a pachâ peimawhzie nata a theina lymâ hawhta Mararâh Achuna O châta tiama papua lâh awpa a khohzie vaw chho ta, aly kawpa ta apakyhna ama hneipa a châ.
ISSUED BY:
Information & Publicity Department
Mara Autonomous District Council
Siaha.
