PRESS RELEASE

NO.169/2022

SIAHA, 04 Phiapi, 2022, Chutyhnoh – Atanoh dawh 10:00 AM pa ta Puhpa HC. Lalmalsawma Zasai, Dy. CEM, MADC ta New Colony High School a tly. 

He New Colony High School he Mawrâh sawhkhâ ry liatapa châhrasala, he school liata ahriapa pachutuhpazy ta Dy. CEM he ama school tly awpa ta ama hrua vâta a tlypa a châ.

New Colony High School, Siaha liata ahriapa Pihnô MS. Dawngliani, Headmistress nata a hrialâhpazy ta Dy. CEM hnohta ama peimawhpazy tlôkhei ei ta, Dy. CEM chhaota Siaha District chhôh liata School ypa a châpa vâta a pachâ peimawhzie nata a theina hawhta biehneituhpa lâ hmahlakhei â chhuahzie a chho hra ei.

Dy. CEM chhaota he New Colony High School he Mararâh Siaha khihpi liata ypa a châna hawhta atao theina rakha liata baokhâ achhuahzie chhao he School liata ahriapazy hnohta a chhopa hra ei. 

Siku hawtizy nata interaction hneikhei ei ta, Class 8, 9 nata 10 liata English Grammar namâ chupa he peimawh kaw ta, palôh zydua pie khaipa ta namâ chu awpa a byuh ngaita. Atahmâ nota English Grammar namâ chu pha vei khiahta la, BA, MA nama kaw châ tita chhao English Grammar nama rairukhei kaw aw tahpa ta siku hawtizy a chho ei.

He New Colony High School he kô 30 hlei a vaw dua hapa châ ta, atahma taita provincialise mah leipa châ ta, chahnaita, he School liata ahriapazy heta Dy. CEM hnohta Mawrâh Sawhkhâ liata biehneituhpa la miah reikhei/tlôkheipa bei la tahpa ta âhawna ama tao pa hra. Dy. CEM chhaota ama hawna apachâ peimawhzie nata hmâlakhei achhuahzie pachutuhpazy hnohta a chhopa hra ei.

Dy. CEM chata Khazohpa ta reih miah piepa Mara reih he eima thai kawpa byuh ta, chahleikhôta, Mongyu reih (English reih) he international language a châ hlei khôta, achuna liata reih peimawhpa nata thai awpa ta peimawh kawpa a châpa vâta, tiama papua ta thai via lyma nama chhuah awpa a châ. Nama English text book liata Mongyu reih zy kha roh hlu ula, roh chanei ngathla ula, Mongyu reih namo liata improvement a y lyma aw. Chahleikhôta, Bible liata Hmotaopazy (ACTS) nata Rawma Mozy (Romans) zy he English Bible ta reihlu ula Mongyu reih thata nama improve aw tahpa ta siku hawtizy a chho ei.

Dy. CEM chata achuna (education) he a thiehpa ta pachâ peimawh via hei ei sila, Marasaw hmiala tô via lyma ta education liata hmahsie via lyma achhuahna chôhta tiama nama papua chyu awpa he apeimawh ngaitakaw tahpa ta pachutuhpazy nata siku hawtizy hnota âhawna a tao.

Puhpa HC. Lalmalsawma Zasai, Dy. CEM he Official lâ tawhta Puhpa Herbertson Syuhlô, AEO (P/S), Puhpa John VT. Hniehu, AEO (M/S),  Puhpa Pawsa Lava, AITO, Puhpa David K. Azyu, AHPO, MADC, Puhpa John Chozah, CEO, MADC, Puhpa S. Zatha, CEO, MADC nata Puhpa K. Nehemia, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.