Mara Autonomous District Council (MADC), Siaha, Government of Mizoram, India

PRESS RELEASE

NO.58/2022

SIAHA, 16 Chhiepa 2022, Pobiehnoh - Atanoh dawh 11:00 AM pa ta Middle School Teachers' Association (MSTA) General Conference ei 5-na cha ECM Higher Secondary School Hall liata hneipa châ ta, he liata Puhpa HC Lalmalsawma Zasai, Deputy Chief Executive Member (Dy. CEM) i/c School Education etc. cha Chief Guest châpa ta Programme a hmâkhei ei.

MSTA General Conference he Puhpa John Chozah, President MSTA, District HQ, Siaha ta chhihtha ta, Rev. Laichhua Azyu, ES (i/c Edu.) ECM Assembly, Siaha ta devotion daihti hmâh ta, Bible Zephania 1:6-7 bie reipa ta pasyuna bie pha kawpa reina hnei ta, Puhpa S. Zatha, General Secretary nata JS. Khohra, Finance Secretary MSTA District HQ, Siaha ta report piena hnei ta, Laihsa Jessica Hlychho nata Laihsa April JKT zy ta pahnie kawpa ta hlasapa ta zawpi ama palôhpahawh.

Chief Guest Puhpa HC Lalmalsawma Zasai biereina hnei ta, "Mara Autonomous District Council he Khazohpa ta khokhei kawpa ta chôlâ pahnokheipa ta miah pie ta, a chhôh liata pahrâpazy pi ta dao kawpa ta nata apha kawpa ta eima mohôh awpa he eimâ bâhpa a châ" tah ta, “MADC Education heta Recruitment Rules nata Service Rules apha kaw awpa hawhta eima pachâpa, a pahchaipa ta Pachutuhpazy pha via nawpa ta a pha viapa eima pachâ ngâ kaw. A pahchaipa ta Elementary he entrustment subject/Department a châpa vâta Samagra Mission zy nata MADC area chhôh liata Middle School zydua he State sawhkhâ nata apha kawpa ta adaoh ta, ryhraona pha kawpa eima hnei thei nahta eimâ hnabeiseih, hmah eima la ngâ kaw hra” tahpa ta a reih

“Mara Education ta a peimawh chaipa cha Pachutuhpa Nehemia palôhru aphaohpa chyhsa eima peimawh ngaita kaw. Education he sawhkhâ rules nata regulation ngâlâh ta paphasa thei leipa ta, Building pha kawpa nata facilities pha kawpa chhaota paphasa thei hra vei. Apeimawh chaipa cha pachutuhpazy ta maophaohna nata rai ei chaba ngâpa he Khazohpa ta eina piepana a châ e tahpa pahnona chô ta, raihria awpa ta, eina sona su liata ei chakaona su hawhta eima pachâ chyu awpa he eimâ pyh thai awpa a byuh. Cha hawh châ leipa ta, hlao hmô nawpa châ ngâlâh ta pachutuhpa châ eima chhuah khiahta la hlaotloh leipa a châ chhielie ha tahna a châ, he rai he rai zachhihpa, Khazohpa ta Ano chakao nawpa su châta eina piepa vâta ngâchhihna nata tiama kawpa ta, apiekhaina chô ta ei hria awpa a châ tahpa ta sasyh commitment sianô kawpa tao ta, ngâchhih kawpa ta hria awpa he ei châ hawpa ei a châ.”

“Pachutuhpazy cha khih kha liata hlao hluh chaipa nama châpa vâta, khitlâh nôpawzy ta ama cha mohpakia chaipa nama châ. Cha hawhta a châ no ta, hro phatu leipa ta hro hmâhpa zy, eima rai hlâta hmo hropa palôh liata palaisa viapa ta daihti hmâh thlâhpa zy, khitlâh châta hmopha leipazy tawhta asohsi theipa zy, zawpi zachhina party politics liata ahlaohli leipa ta y ngâhnazy he râh ta pachutuhpazy eimâ hnabeiseih dâh châ ta, eima châ hnabeiseihna he hlao maniah patlohpa cheingei awpa ta eimâ châ hnawpa a châ.”

“Mararâh achuna he nama ku liata apahnieh ta, Khazohpa china chô ta ngâchhih kawpa ta keimo rai chyu hriapa ta, eimâ phana rakha ta Khazohpa hnohta suhrawh sukha (Tithe) chhao pie chyu awpa ta ei châ haw ei” tahpa ta bietana pha kawpa a reih.

Puhpa HC. Lalmalsawma Zasai, Dy. CEM, MADC he Official lâ tawhta Pihnô K. Zeihne, Under secretary (Edn), Puhpa Herbertson Syuhlo, AEO, Puhpa Pawsa Lava, AITO nata Puhpa KT. Beimokhai, IT Staff zy ta ama chakaochahlâh.

2nd Session he Puhpa K. Mytha, Senior Vice President ta a chhihtha.

Atanoh Official Agenda peimawh kawpa reihpahmaoh awpa ta select-pa zy cha:-

(1) Teachers Study Tour hnei awpa.

(2) Model Scholarship hnei heih awpa.

(3) MADC Education Department Recruitment Rules & Service Rules hnei awpa.

Daihti chhâna la liata, General Election hneipa châ ta, ary liata palâsapazy he atlypatlohpazy ama châ:

1. President - Puhpa Israel R. Chozah

2. Sr. Vice President - Puhpa N. Thanzawna

3. Vice President - Puhpa Hilei Lakher

4. Gen. Secretary - Puhpa FC. Chhuasa.

5. Asst. Secy. - Puhpa L. Beirangia

6. Info. Secy. - K. Laihie