PRESS RELEASE

NO.110/2022

SIAHA, 5 Thlarâh, 2022, Hriatuanoh – Atamy dawh 10:30 Am kha ta MSO Branch: ECM Higher Secondary School (HSS), Siaha zy ta 60th Teachers’ Day Celebration programme ahmâh ei ta, he liata Puhpa HC. Lalmalsawma Zasai, Hon’ble Dy. CEM cha Chief Guest châta hrua ei ta, aly kawpa ta programme a hmâkhei ei.

Programme he KT. Lailai, President, MSO Branch, ECM HSS ta chhihtha ta, Class-XI Student zy ta Opening song ama sa. Rev. RK. Chozah, Chaplain, ECM Assembly ta devotion hmâh ta, Sinai Ruby, Asst. Secretary, MSO Branch: ECM HSS ta message reading hnei ta, Anton Beipatha Azyu, Secretary, ECM HSS ta Report & Introduction daihti a hmâh. Benjamin Solo, Vice President ta Best Teacher Award raina daihti hmâh ta, Puhpa B. Vakhai, Principal, ECM HSS ta biereina daihti hmâh ta, Shelina Raino Khaila nata B. Beidawva zy ta mo pakha hlasana hneipa ta zawpi ama palôpahawh.

Chief Guest Puhpa HC. Lalmalsawma Zasai, Dy. CEM chata daihti phapa apie tuhpa Khazohpa hnoh ta alynabie a reih. MSO ECM HSS Branch leader zy hnoh ta alynabie reih ta, Teachers nata student avypakhypazy hnoh ta anaohna Samaw a hlâ khai tawhta biereina chyupa hnei ta, Students nata Teachers zy hnoh ta he hawhta bietana tlâhpipa a reih:-

1. Achuhaipazy, kheihawh su tawhta Siaha su liata avypa rai châ u la, Siaha liata Class-X nama pass tawhta Delhi, Shillong sie byuh leipa ta Siaha su liata College zy akiah thei ta, vâhnei â chhih ngâsâ. 

2. Teacher zy, kheihawhpa rai rai hria u la, kheihawh su lia rai y u la, sasyh azakheipa he corruption chikha a châ. Apha kawpa ta nama rai chyu nama hria awpa a châ.

3. Ngâchhihna ahlao leipa liata Pachutuh phapa, Pastor phapa châ awpa athei vei; chavâta ngâchhihna he achuhaipazy ta khâcharâ nama hnei awpa a châ.

4. Chyhsa riahphapazy cha paritheipa nata niedo tao leipa ta, kheihawhpa hmo lia rai amâ duahpapapua thei. Chyhsa riahchhiepazy deikua cha sahma nata paritheipazy tao ei ta, chavâta hlaotlohna hnei thei vei ei.

5. Student zy ta Nô, Paw nata Pachutuhpazy rei angiah awpa a châ. Kei he ei Paw ta kô 4 ei châno ta nâ pahâ sai ta, ei Nô rei ei ngiah kaw tyh. Reingiana he byhnâ to hnawh a châ.

6. Teacher zy ta rai liata nama pahâh awpa byuh ta, rai liata nama pahâh khiah my School dawh a paro hlâ ta School tlô ei chi ta, bâna dawh a paro tua leipa ta O lâ adi aw v’ei chi. Khazohpa ta rai miah a piepa liata pahâh kawpa ta hria awpa a châ.

7. Pachutuhpazy ta KTV eima pachâ peimawh awpa a châ. KTP pieleipa ta cha byhnâ ato thei vei; nama za china pabohsa awpa ta KTP he pie khai awpa ta ei cha hrua ei.

8. Khizaw liata rai zachhih chaipa tah thei awpa cha Pachutuhpa rai he a châ. Rai zachhihpa a châna hawhta Pachutuhpazy ta zachhih kawpa ta pachuna rai eima hria awpa a châ.

9. Marazawzy ahlao leipa ta MCS, MPSC Result pua pha thei khao vei; achhâpa cha kô 1907 liata eima Missionary R.A. Lorrain siepahliepa ta Khazohpa atlypa pho eima châ vâta a châ. Khazohpa byhnâ miah a pie lymâna hawhta achuhaipazy ta thapi phiapa ta achu lymâ teh u; nama tiamana nata hriapsana liata hlaotlohna cha nama hmô cheingei aw.

10. Eima zydua ta ngâchhihna eima hnei khai khiah eima râh hmah a sie cheingei aw. Nâma nata keima he ta ngâchhihna he khâ avao ei suh u.

MSO Branch: ECM HSS zy ta a ry liata palâsapa Pachutuhpazy hnoh ta Best Teacher Award ama hlâ:-

1. Higher Secondary School Section - Ls. Christina B. Hlychho, English Teacher.

2. High School Section - Puhpa L. Vahropathai, Mathematics & Science Teacher.

3. Middle School Section - Puhpa K. Laihie, Mathematics Teacher.

Puhpa HC. Lalmalsawma Zasai, Dy. CEM zachhihpa he ta Programme chhâ tawhta ECM Middle School Achuna O, Office nata a chheipâh a tly pâ hra.

Puhpa John VT. Hniehu, AEO, Pihnô Darhmingliani, a lahpinô, Pihnô Sari (Pihnô Darhmingliani viasa), Puhpa Halalui Lalhuapzauva, PA to Dy. CEM, Puhpa L. Vabeimolai, PSO to Dy. CEM zy ta Dy. CEM he ama zi.

ISSUED BY:

Information & Publicity Department

Mara Autonomous District Council

Siaha.