PRESS RELEASE

NO.52/2022

SIAHA, 8 Chhiepa, 2022, Pakhynoh - Zâhnia târi 7.6.2022 zâ dawh 7:30 PM khata Mara Students' Organisation, General Headquarters, Siaha zy ta atakô MBSE ry liata HSLC nata HSSLC exam liata Siaha District tawhta Mararâh moh paphatuhpa Top 10 nata Distinction holder-zy NSV Studio, New Colony - I, Siaha liata alykheina hnei ei ta, he liata Puhpa HC. Lalmalsawma Zasai, Dy. CEM, MADC cha Chief Guest châpa ta Programme a hmâkhei ei.

He Programme he Puhpa Elson Eliasa Notlia, Vice President, MSO Gen. HQ, Siaha ta chhihtha ta, Machâ N. Pacho, Awnano hyutuhpa, ECM Local Church, New Colony, Siaha ta thlahchhâna ta daihti a pathao.

Puhpa Francis Bohia, Exe. Member, MSO Gen. HQ, Siaha ta introduction hnei ta, Puhpa John M. Beilaisei, Secy. i/c Education ta report piena a hnei. Puhpa T. JB Rona, President, MSO Gen. HQ, Siaha ta biereina hnei ta, Puhpa John M. Beilaisei, Laihsa Monalisa Zawtha nata Puhpa NT. Beichhisa zy ta Felicitation hnei ei ta, Pihnô P. Chaki, President, MCHP Gen. HQ, Siaha nata Puhpa PP. Zalena, President, MTP Gen. HQ,  Siaha zy ta pasyuna bie pha kawpa reina ama hnei. Laihsa Florence Hlychho ta hlasapa ta zawpi a palôhpahawh.

Chief Guest Puhpa HC. Lalmalsawma Zasai, Dy. CEM, MADC biereina chyupa daihti a hmâpa liata a bierei tlâhpi viapazy:-

Atazâ ta hla avaw satuhpa ta a hla bie liata na thyutlia nota Mararâh châta khâpa na tao hra aw tahpa bie heta ei palôh na hria kaw ta. Mara laihsa nata satliazy ta Drugs zy aka ta sahmazy doh ta khizaw a phaleina lâ ta hmâh leipa ta, nama thyudyu daihti lia heta khâpa ma Mararâh châta ei tao thei hra aw tahpa he palôh hmeiseih ta namâ thei chyu awpa he khoh kaw na ta, cha cha a hmiatua ta ei vaw reih.

HSLC nata HSSLC liata Khazohpa ta hlaotlohna pha kawpa a cha pie vâ ei ta châ lykhei hmeiseih ei na ta, hmialâ namâ kaw chu laih lymâ n'awpa liata khokheina sâh chaipa ei cha hlâ ei.

Atazâ he MSO ta a tao awpa a taopa ta pahno na ta, MSO Headquarters chô liata a vaw ly kaw na ta, atazâ ei vaw ly kaw heihpa cha, a daihti ta liata programme eima thao theipa he châ ta, punctual kawpa ta hmo eima tao theipa he hmahsiena sâkha châ ta, ei vaw ly hmeiseih. Marasaw zy hmo eima taona liata punctuality eima papeimawhsa via lymâ awpa he a peimawh hmeiseih. 

District Council liata eimâ vaw tyu tawhta ei daihti hmiatua chaipa liata MSO (Gen. Hqrs) ta na vaw charei ei ta, he alykheina nata palyupalihna daihti ahmâkhei awpa ta na vaw hrua ei ta ei ly hmeiseih. MADC liata Education Department nata MSO hria khoh awpa khoh na ta, achuna (education) liata hmahsiena eima hnei thei n'awpa ta a hluhpi eima hria thei leipa chhao ta, hriaparaohna phapa eima hnei khiata cha hlaotlohna phapa eima hnei cheingei nahta ei pangiasa.

Siaha District tawhta eima sawnah Lalramzawnsangi D/o George Lalawmpuia nata C. Ngokhai Chozah D/o C. Thahe Mawrâh liata âlâ thei'pa ta âmo ta ama fight papuapa ta Siaha District moh papha kaw ei ta pasâhsa amâ chhih hmeiseih. Distinction liata a pass-pazy, First liata a pass-pazy nata a pass-pa zydua Marasawzy ta châ palaikhei pita hmialâ nama kaw sie laih lymâ n'awpa liata khokheina sâh chaipa eima cha hlâ.

Kha hlâ via no cha MCS zy, MPS zy nata IAS zy he mo hropa, chi hropa eih khiahma tah pita, atanoh deikua cha keimo eih a vaw châ hi. Chahnaihta, MSO zy tiama papua via lymâ u la, hnabeidy leipa ta, Mara satlia nata laihsazy kei chaka ta tiama papua via lyma mu vy. Marasaw chytu pita chahnaita tiama nama papua via lyma awpa ta ei cha haw hmeiseih ei.

Apachaipa ta ataza he Puhpa C. Thahe nata chhohkhazy he Marapasaw liata cha a palai khei ama chhi kawpa ta pahno na ta, Asaw zy he Specialist achungapa zy, Dawty chungapa zy, Bank Manager changa haipa zy ama y. Marapa nô nata Paw zy pita eima mopa awpa thlala ama chapa ta ei pahno. 

Ei palô liata hmo y kawpa sâkha cha, motivational campaign he School to liata nata College lia chhao ta reih laih awpa khoh kaw nata chahleikhota Siaha District Education Committee zy y ta, anodeikua sawhkhâ he cha formalities a châna kyh a vaw y, chavâta, ei palôh liata hmo vaw ypa cha Siaha District Education promotion Committee tao sih la, MSO, eima Village Council, MTP, MCHP nata Prominent Academician zy ahlao ei sala, eima râh education taopathi awpa he ei kho kawpa a châ.

Zâhnia ei bia tly na ta, ama school furnature zy moh na ta, ei palôh eina hria ngâsâ. Mara râh khito liata Job Card nohkha tha chhao he eima sawnah ama education châta eima pie pasaih vâ tlyma tahpazy ei vaw pachâ tyh. Eima furnature zy he khitlâh ta tlyma, MTP zy ta tlyma, etc. nohkha tha a pasaihpa ta school châta furnature tao awpa châ sala, nohkha chhaota furnature syno sythôh eima tao thei thlâh ha aw.

PL. Region Council daihti no tawhta avaw pahlaopahli khai pi ta, apachhaih thai'pa châ khao ma pi, chavâta, Mara reih achuna tuition class pachhuahpanoh awpa he khoh na ta, Board of Mara Literature zy nata abaopasupa ta Mara reih achu tua si tahpa he ei palôh liata lai kaw ta, eima zydua ta abaopasu ta Mara reih palôh hmeiseihpa ta achu ta thai hmeiseih achhuahna chôta achu tua ei si tahpa he ei palôh liata khâ châ a y.

Education nata Sports he peimawh kaw ta, keimo daihti nozy cha promote tuhpa hnei ma pi, châhrasala, kei chhao Khazohpa ngiachhiena vâta promote tuhpa hnei leipa ta hlaotlohna ei kaw hnei laih hra. Tahmâ deikua cha promotion lâchhâh eima hnei pha kaw bâ. Chavâta, Sport lâ lia chhao hmia tôh via lymâ eima chhuah awpa a byuh.

Education portfolio ei patu chhôh heta ei theina rakha ta education hmah pasiesa awpa he ei palôh liata lai kaw ta, chavâta, hriaparaohna phapa eima hnei thei na awpa ta Marasaw zydua eima thlahchhâna liata eima thei via lymâ awpa he peimawh kaw ta, ei châ haw hmeiseih hra ei.

Puhpa HC. Lalmalsawma Zasai, Dy. CEM, MADC he official lâ tawhta Puhpa John VT. Hniehu, AEO, Puhpa Pawsa Lava, AITO nata Puhpa KT. Beimokhai, IT Staff zy ta ama chakaochahlâh.

Puhpa Aldrin Laihlei Hlychho, Secy. i/c Social Welfare ta vote of thanks reina hnei ta, Rev. T. Salaw, Moderator, ECM Assembly ta thlahchhâna ta daihti a pachhâ sa.

ISSUED BY:

Information & Publicity Department

Mara Autonomous District Council

Siaha.