PRESS RELEASE

NO.98/2022

 

SIAHA, 24 Thlazoh, 2022, Pakhynoh - Atamy dawh 10:00 Am pa ta Puhpa HC. Lalmalsawma Zasai, Dy. CEM i/c School Education Department, MADC ta Government Siaha College nata Lorrain English Medium School, College Vaih tlypa ta Principal nata Pachutuhpa zy apakyhna a hnei.

 

Government Siaha College liata programme ahmâna lia heta Principal Prof. Abdul Hannan Barbhuiya ta chhihtha ta, Government Siaha College liata Pachutuhpa, pension (retire) hapazy ama y nahta replacement y khao tyh leipa ta, chahleikhô ta, pachutuhpa tlyma, staff zy chhao rai thina zy avaw y nahta âmo vyuhpa ta replacement y tlâ tyh leipa ta chavâta, pachutuhpa nata staff ama chyh zie a reih. 

 

Puhpa Vanlaltlanchhunga, Associate Professor nata Head of the Department of Political Science chata National Assessment and Accreditation Council (NAAC) Peer Team zy ta Government Siaha College ama kaw tly (visit) awpa chôchâh reih ta, he NAAC Peer Team Visit he Siaha College châta cha peimawh kaw ta, NAAC Peer Team zy he ta Government Siaha College he atakô October 19-20 khi ta ama vaw tly (visit) awpa cha ta kô pangaw (5) chhôh ta eima raihriana nata hiahrina (questions) eimâ chhyna zy âdo tlaima tahpa asu liata ama kaw check awpa châ ta, ama pypa a châ khiatala NAAC liata NAAC Accredited eima châ thei ha haw; he hawhta eimâ châ thei khiatala Rashtriya Uchchatar Shiksha Abhiyan (RUSA) (Centrally Sponsored Scheme) ry liata fund nata hmo peimawhpazy dao thei aw pi ta, chavâta, NAAC Peer Team ama kaw visit awpa lia heta Siaha District chhôh liata NGO zy, MADC lâ tawhta zy, eima Minister zy chhao ta miah nama baokhâ chyu awpa he apeimawh ngaita kaw. Abyuh, ângiapa zy asianô kawpa ta write up vaw tao tah, achâ vaw daoh awpa zy eimâ chhua. MADC chhochhi cha a host tuhpa nama châ awpa he eima khoh ngaita kaw tahpa ta a reih. 

 

MSO Gen. HQ lâ tawhta avaw hlao hrapa Puhpa John M. Beilaisei, Secy. i/c Education chhao ta pasyunabie pha kawpa reina a hnei hra.

 

Puhpa HC. Lalmalsawma Zasai, Dy. CEM chhaota abyuh angiana mai liata baokhâ awpa â chhuazie, Government Siaha College Principal nata a hrialâhpazy hnohta a chho hra ei. 

 

Puhpa HC. Lalmalsawma Zasai, Dy. CEM he ta Government Siaha College atly khai tawhta Lorrain English Medium School tly ta, Lorrain English Medium School liata programme ahmâna lia heta Pihnô S. Meryl Vanramngaihzuali, Principal i/c Lorrain English Medium School ta chhihtha ta, he ary liata palâsapazy he Puhpa HC. Lalmalsawma Zasai, Dy. CEM biereipa tlâhpi viapazy a châ:

 

1. Lorrain English Medium School zy eima Missionary zy athei thlâna châta paduapa châ ta, chavâta, thlahchhâna chô ta nama pachu awpa he ei châ haw khoh kaw ei. He school liata pachutuhpazy ei chi he peimawh kaw ei chi ta, Missionary school pha chaipa pachâsa namâ chhuah chyu awpa he ei châ haw khoh ngaita kaw ei.

 

2. He school liata a hriapazy ei chi he suhraw-sukha (tithe) he nama papeimawhsa kaw awpa he a peimawh ngaita kaw. Anodeikuala, ahy hmahta cha force vei na; kei chhao he duasu liata ei vaw dua thei chhâpa cha einâ nata eipâ tah suhraw-sukha ama vaw pie hualua vâta na a châ e tahpa he ei cha chho khoh ngaita kaw ei. Suhraw-sukha a pie phapa cha ama sawnah zy chhao byhnâ ama to via lymâ.

 

3. Punctuality he nama papeimawhsa awpa he ei châ haw khoh ngaita kaw ei. Rule and regulation nama taopa he nâmo pachutuhpazy ta nama zyh tuachai awpa a byuh. Nâmo pachutuhpazy ta nama punctual khiatala nama student zy chhao ta nama hâ a châla aw ei ta, punctuality ama papeimawsa hra aw.

 

4. Eima sawnah zy chhao Mongyu school liata soh pi ta, ama pachutuhpazy cha PU zy, BA zy tlâ ama châ. Chahnaita, nâmo chhao he school he English medium achâpa hawhta pahnai ngia kawpa ta nama pachu theihrana tahpa he ei reih khoh kawpa a châ.

 

5. Nâmo nama school cha Missionary school achâna hawhta ECM Assembly ta Principal awpa zy raopa châ ta, ECM Assembly ta ama raopa maih kha eimâ pykhei. Chavâta, School hropa deikua cha seniority hawhta tao lymâpa a châ aw.

 

6. School O taopathi byuhpa zy avaw y na lhta sawhkhâ sai eima hâ thla hapa a châ khiatala, sawhkhâ ta tao khai tiah vei. Khitlâh VC nata NGO zy abaopasupa ta Job Card tawh chhao rai etc. tlâhrai pahruapa ta tlyma, school O repair byuhpa zy education papeimawhsana palôh hneina chô ta rai eima hria awpa he a peimawh ngaita kaw.

 

Pihnô Nazee Khailah, Sr. EO nata Puhpa Jeffrey Khara, Secretary, MJA, Siaha District, Editor (Moonlight) chhao ta pasyuna bie pha kawpa reina ama hnei hra.

 

Government Siaha College nata Lorrain English Medium School tlyna lia heta Puhpa M. Baithai, President, MJA, Siaha District, (Editor) Chhim Aw, Puhpa Jeffrey Khara, Secretary, MJA, Siaha District, Editor (Moonlight) nata Puhpa John M. Beilaisei, Secy. i/c Education zy amâ hlao thei hra.

 

Puhpa HC. Lalmalsawma Zasai, Dy. CEM zachhihpa he Official lâ tawhta Pihnô Nazee Khailah, Sr. EO, Puhpa John Kenneth Syhly, EO, Puhpa John VT. Hniehu, AEO (MS), Puhpa Herbertson Syuhlô, AEO (PS), Puhpa John Chozah, CEO, Puhpa S. Zatha, CEO, Puhpa HC. Zodingliana, PEO, Puhpa Pawsa Lava, AITO, Puhpa Halelui Lalhuapzaua, PA to Dy. CEM nata Puhpa T. Pabua, Cameraman zy ta ama chakaochahlâh.

 

ISSUED BY:

Information & Publicity Department

Mara Autonomous District Council

Siaha.