PRESS RELEASE

NO.168/2022

SIAHA, 03 Phiapi, 2022, Pobiehnoh – Atanoh dawh 10:00 AM pa ta Puhpa HC. Lalmalsawma Zasai, Dy. CEM, MADC ta Government High School, New Siaha nata Government Middle School, New Siaha  a tly. 

He Government High School, New Siaha nata Government Middle School, New Siaha he Mawrâh sawhkhâ ry liatapa châhrasala, he school liata ahriapa pachutuhpazy ta Dy. CEM he ama school tly awpa ta ama hrua vâta a tlypa a châ.

Government High School, Siaha liata ahriapa Puhpa Lalhlupuia, Headmaster nata a hrialâhpazy ta Dy. CEM hnohta ama peimawhpazy tlôkhei ei ta, Dy. CEM chhaota Siaha District chhôh liata School ypa a châpa vâta a pachâ peimawhzie nata a theina hawhta biehneituhpa lâ hmahlakhei â chhuahzie a chho hra ei.

Dy. CEM heta Government Middle School, New Siaha liata a hriapazy ta ama School tly hra awpa ta ama hruapa cha pachâ peimawhpa ta tly hra ei ta. He Gov't Middle School, New Siaha heta Class - V châta Class Room ama hnei leipa vâta Class V 2021 - 2022 Academic session châta admission chhao ama pahy leizie Dy. CEM hnohta ama vaw reih. Dy. CEM chata pachâ peimawh kaw ta a theina hawhta hmahlakhei awpa ta a chho hra ei.

Dy. CEM chata Siaha District liata school sycharie (80) hlâ hluh via tly ha na ta, School hluh via ta school building ama hnei pha leizie zy, Infrastructure ama hnei pha leiziezy pahno na ta, cha hnaihta, school ta ama peimawh ngiahpa zydua he Sawhkhâ ta tao khai thei leipaw ta cha hnaihta, VC Members nata MTP zy lâ ta ahawna tao na ta, Khihto VC heta Job Card nohkha tha he School châta thyu ei sala, MTP ta tlâhrai pahruapa châ sala, school peimawhpa bench tao ngiahpa zy, School O repair byuhpa etc zy hriapa châ sala tahpa ta ahawna tao na ta, hlao a tloh nah ta ei pangiasa tahpa ta a reih.

Dy. CEM chata Gov't High School Computer Room zy mopa ei ta, atahmâ khizaw liata cha châ thai ngâlâh chhao adaih khao leipa ta Computer chhao thai pâ awpa he a peimawh ngaita kaw tahpa ta siku hawtizy a chho ei.

Siku hawtizy nata interaction hneikhei ei ta, Class 8, 9 nata 10 liata English Grammar namâ chupa he peimawh kaw ta, palôh zydua pie khaipa ta namâ chu awpa a byuh ngaita. Atahmâ nota English Grammar namâ chu pha vei khiahta la, BA, MA nama kaw châ tita chhao English Grammar nama rairukhei kaw aw tahpa ta siku hawtizy a chho ei.

Dy. CEM chata Mawrâh he chi hropazy tawhta eima boh thei nawpa peimawh chaipa cha achuna (education) he palôh hmeiseihpa ta pachâ peimawhpa ta eima hria khoh awpa he a peimawh ngaita tahpa ta a reih. Education liata tiama papua ta eimâ sâh kaw khiahta la, eima râh châta hmahsiena y aw ta, eima chi nata pho eimâ bohna chhao a châ hra. Achuna su he pachâ peimawhpa ta a thiehpa ta hmahla heih awpa ta pachutuhpazy a hrua ei.

Puhpa HC. Lalmalsawma Zasai, Dy. CEM he Official lâ tawhta Puhpa Herbertson Syuhlô, AEO (P/S), Puhpa John VT. Hniehu, AEO (M/S),  Puhpa Pawsa Lava, AITO, Puhpa David K. Azyu, AHPO, MADC, Puhpa S. Zatha, CEO, MADC nata Puhpa T. Pabua, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.