PRESS RELEASE

NO.91/2022

SIAHA, 2 Thlazoh, 2022, Hriaheinoh – Hâta hmiatuapa tawhta Differently-abled (mochaopa) Student K. Beimopha (25), S/o K. Kiacho, Vahia, NEHU, Shillong liata MA â chu pazao thei nawpa ta bao awpa ta Social media liata ahawna taopa cha Samari chyhsa phapa - Mara chyhsa phapazy ta vaw thyu lymâ ei ta, tlaw Rs.1,15,100/- avaw tloh pakhypa cha atanoh dawh 1:30 PM pa ta cha Puhpa HC. Lalmalsawma Zasai, Dy. CEM, MADC ta MSO General Headquarters nôpawpazy hnoh ta a hlâ.

Hlâna Programme he Puhpa HC. Lalmalsawma Zasai, Dy. CEM zachhihpa room liata programme chyupa taopa châ ta, Puhpa Beirokhu Beita, I & PO, MADC ta chhihtha ta, Pihnô Nazee Khaila, Sr. EO ta Abeipa lâ thlahchhâna hneipa ta sô a vaw thyu tuhpazy châta Khazohpa lâ byhnâ hiah ta, Puhpa Byhna Chozah, General Secretary, MSO General Headquarters: Siaha ta chhôhkha vyuhpa ta alynabie reina a hnei.

Puhpa HC. Lalmalsawma Zasai, Dy. CEM chata sôh hlâna a hneina liata biereina chyupa hnei pâ ta, Khazohpa ta chyhsazy he kuphei akipa ta eima khopazy tao thei awpa ta miah tao ta, anodeikuacha Khizaw lia he ta heih akho leipazy vaw pih tyh hra ei ta, he hawhpa chyhsazy he Bei Zisu ta pachâ peimawh ngâsâ ta, Khizaw liata a vaw charei daihti no chhao kha ano VIP zy ama vaw tah tyhpa a châ. Chavâta keimo chhao ta he heih akholeipazy he kyh eima pachâ awpa nata eima pachâ peimawh awpa byuh ta, K. Beimopha ta MA â chu pazao nawpa liata chyhsa apasaihpa nata phahnai ngiahpazy ta sôh hluhpi ama vaw thyu thlâhpa he aly â chhih a tahzie nata a vaw pie tuhpa zydua chô liata â lyzie a reih.

K. Beimopha bao awpa ta Social media liata ahawna taotuhpa Puhpa Beirokhu Beita, I & PO, MADC chata sôh avaw thyu tuhpa zydua hnoh ta alynabie reih chanei ta, “ato ahnei tuhpa eima Khazohpa chata alie hluhpi byhnâ chapie chyu heih mawh ei sy” tahpa ta sôh a vaw thyupa zydua châta byhnâ awpa ta, Student K. Beimopha â chu pazao nawpa ta hmah a vaw la tuhpa MSO General Headquarters nôpawpazy hnoh ta alynabie a reih.

He sôh hlâna liata MADC officials tawhta Puhpa K. Chhihrua, Executive Secretary nata Pihnô Patricia T. Azyu, SWO zy a hlao ei ta, MSO General Headquarters: Siaha tawhta Puhpa Byhna Chozah, GS, Laihsa Daphney Lapi, Treasurer nata St. Golden Jubilee, office assistant zy amâ hlao.

ISSUED BY:

Information & Publicity Department

Mara Autonomous District Council

Siaha.