SIAHA, 25 Thlazoh, 2022, Pobiehnoh - Atanoh zâlâ 1:30 Pm khata Puhpa HC. Lalmalsawma Zasai, Dy. CEM i/c School Education Department, MADC ta Board of Mara Literature (BML) meeting ano Office chamber liata a hneikhei ei.

Agenda zy reipahmaohpa châ ta BML Vice Chairman atlyh byuhna kyh reipahmaoh khai tawhta Secret Ballot paper hmâpa ta vote pathlapa châ ta Puhpa Laicho Notlia atlyhpatlohpa a châ. BML Assistant Secretary châta Puhpa MC. Pabei atlyhpatlohpa a châ.

BML Meeting biepathlu chiehpa H. Sawlawmaw, B. Tekô, Laila Khithie zy hla achuna Seminar pachhuahpanoh awpa kyh, COVID-19 vâta pachhuahpanoh thei khao leipa daihti rypaohpa liata hnei awpa khona kyh vâropi reihpahmaohpa a châ tawhta Vice Chairman zy, Pihno Patricia T Azyu, Puhpa John VT Hniehu nata Puhpa FC Chhuasa zy avaw chadaipazi ta vaw buabâkheipazi awpa ta raopa ama châ.

BML Meeting biepathlu chiehpa Mara reih Hlaphôh areipasuana pachhuahpanoh awpa khona kyh vâropi reihpahmaohpa a châ tawhta achô liata moh palâsapa board padua thiehpazy ta vaw moh pazi ta vaw buabâkhei awpa ta pathlupa a châ.

BML Meeting biepathlu chiehpa Phurâ liata Seminar pachhuahpanoh awpa khona kyh vâropi reihpahmaohpa a châ tawhta board thiehpa paduapazy ta resource person awpazy vaw pachâ ei ta, hmah vaw la pazi awpa ta pathlupa a châ.

Elementary School liata Mara reih pachutuhpazy châta Mara reih rozie pachuna pachhuahpanoh awpa khona kyh vâropi reipahmaohpa a châ tawhta board thiehpa paduapazy ta vaw buabâkhei pazao awpa ta âmo ku liata sopa a châ.

BML Office chata Proof Reader la byuhna kyh vâropi reihpahmaoh khai tawhta official ta moh pazi awpa ta pathlupa a châ. 

Mara Writers' Club, Siaha tawhta VSE liata Hâtachareih Mara reih pachu tyh awpa ta amâ hawna kyh vâropi reihpahmaopa a châ tawhta Education Department, MADC ta pachâpazi awpa ta pathlupa a châ.