PRESS RELEASE

NO.112/2022

SIAHA, 9 Thlarâh, 2022, Chutynoh - Atanoh kha Puhpa HC. Lalmalsawma Zasai, Hon’ble Dy. CEM, MADC ta Siaha khichhôh liata school sâ 2 - Beaulah School, New Siaha nata Gov’t Primary School, New Siaha East-II zy tly ta, Pachutuhpazy hnoh ta pasyunabie pha kawpazy reina a hnei pâ laih hra.

Dy. CEM zachhihpa chata Mararâh liata school zydua tlypapua khai â chhuah tahpa reih ta, atahmâ he School 50 zy a tly ha tahpa a reih. Ary liata palâsapa he school sâ 2 liata a bierei tlâhpi viapazy a châ.

“Sawhkhâ ta Headmaster chapie ei ta, nama za kaw awpa a châ. Headmaster zy chhao ta Staff zy zachhina pahnona chô ta eima School mohôhpazy a vaw pha via lymâ thei nawpa ta Staff zy nahta apha kawpa ta hriaparaoh awpa apeimawh ngaitapa a châ.”

“Senior Teacher zy, pachuna kyh liata rairuna ahneipazy cha Headmaster hnoh ta tlôkheipa ta biehneituhpazy asaohiahna chô ta ryhraona tao laih awpa a châ.”

“Kheihawh school lia rai, eimâ phana rakha chyu ta eimâ mohôhpa a châ. He hawhta a châ no ta School ta eima peimawh kawpa a y cheingei aw; Teacher zy ta Headmaster nata Sawhkhâ lia ngâlâh apahnieh thlâh leipa ta eima furniture parohpa thla byuhpazy cha eima hlao tawh zy ta chalei tyh hra si la, eima Schoolzy kyhpachâna chô ta School liata eima rairunazy eimâ phana rakha liata patohpatia achhuah suh u.”

“Nelson Mandela kha ta Khizaw eima pahnie theina cha Education he a châ tah ta. Education hmâpa he ta eima râh eima taopathi thei tahpa pahno si la, tiama papua via lymâ suh u.”

“Pachutuhpa rai he Khazohpa chakaona raina a châ tahpa my leipa ta eima student nahzy hmah ama vaw sie via lymâ thei nawpa nata eima schoolzy avaw pha via lymâ thei nawpa ta Teacher zydua tiama papua via chyu heih awpa ta ei châ haw ei.”

Puhpa HC. Lalmalsawma Zasai, Dy. CEM zachhihpa he Puhpa John Kenneth Syhly, EO, Puhpa John VT. Hniehu, AEO, Puhpa Herbertson Syuhlo, AEO, Hilei Lakher, DDPC, Samagra, Puhpa Halelui Lalhuapzaua, PA to Dy. CEM zy ta ama zi.

ISSUED BY:

Information & Publicity Department

Mara Autonomous District Council

Siaha.