PRESS RELEASE

NO.102/2022

SIAHA, 28 Thlazoh, 2022: Târi 26-27, 08, 2022 pa ta Puhpa HC. Lalmalsawma Zasai, Dy. CEM i/c School Education Department, MADC ta Amôbyuh Vaithieh, Tipa nata Saikao khihzy tly ta, Amôbyuh Vaithieh nata Tipa khih liata Primary School nata Middle School zy tlypa ta Pachutuhpazy (Teachers), VC nata NGO zy apakyhna a hnei.

Puhpa HC. Lalmalsawma Zasai, Dy. CEM Amôbyuh Vaithieh nata Tipa khih liata Schools 12 tly ta chazy cha: 1. Amôbyuh Vaithieh Primary School - II 2. Government Amôbyuh Vaithieh Middle School 3. Government P/S & UPS Amôbyuh 'CH' 4. Amôbyuh 'B' PS-I 5. Amôbyuh 'B' PS-II 6. New Light School, Tipa 7. Government Primary School - II, Tipa 8. Government Middle School Tipa 'V' - III 9. Government Primary School - I & UPS Tipa 'V' II 10. Government Primary School II & III Tipa Dairy II 12. Government Tipa 'D' II Middle School.

Khihto liata pati pahâh kawpa amâ chhuanohpa cha aly kawpa ta dôh chyupa a châ. Puhpa HC. Lalmalsawma Zasai, Dy. CEM heta Shillong liata aviasapaw ta ti pathaihna a piepa cha School to liata a rai/piepa chyu ei.

Puhpa HC. Lalmalsawma Zasai, Dy. CEM zachhihpa pasyuna bie a reipa tlâhpi viapazy:

1. Nama khih chyu liata achuna School hmah pasiesa awpa chhaota VC (Village Council) nata NGO zy nama peimawh kaw. Nama area chhôh chyu liata pachutuhpazy school ama kiah pha ma, pachutuhpa hry liata sahma doh ta pachuna papeimawhsa leipa ama y ma, etc tahpazy eima hriaparaoh awpa a byuh. Education Department, MADC Officer ngâlâh ta school to liata pachutuhpa check tiah vei. VC nata NGO zy nata eimâ baopasu awpa a byuh. Khitlâh phana awpa kyh lia heta VC nata NGO zy nama maophaohna â sâh kaw.

2. MADC ry liata School zy a pha kawpa ta mohôhpa a châ thei nawpa ta eima theina papua lymâ achhuah pi ta, keima nata ei Department mohôhpa School Education Department liata hriapazy y pathâ leipa ta eima theina zydua eima papua ngâhai.

3. School O taopathi byuhpazy a vaw y nahta sawhkhâ sai eima hâ thlâh hapa a châ khiahta la, sawhkhâ ta tao khai tiah vei. Khitlâh VC nata NGO zy abaopasupa ta Job Card nohkha thazy chhâ school châta thyupa ta, tlâhrai pahruapa ta, school O repair, School O Râhvâ sai-ie ta a pyu hapa zy, dyuchhai hmâtlâh châ khao leipa taopathi byuhpa, tihry lona (side drain) taopathi byuhpazy education papeimawhsana palôh hneina chôta rai eima hria awpa he a peimawh ngaita kaw.

4. Mara reih he Mara identity (Marapa châna) miah identify (châna palâsa) tuhpa a châpa vâta eima cheih hluh via lymâ awpa a byuh ngaita kaw. A pachaipa ta, Tipa khih liata a pahrâpa Marapa châ thlâh tlôh ta, Mara reih a cheih thai leipa, a thei leipazy nama y. Atahmâ tawhta la Mara reih thai a vaw chhuah chyu u la, cheih hluh u la, Mara reih thai cheingei namâ vaw chhuah chyu awpa ta ei châ haw ei. Reih thai hluhpa cha a pha. Reih hropa thai kaw tlôh ta eima reih Mara reih eima thai tlôh vei khiahta la, chyhsa ta miah ama pahneisao aw. Cha vâta, atahmâ tawhta la, Mara reih thai achhuah chyu suh vy.

5. Suhrawh-sukha (tithe) he papeimawhsa u la, â do kawpa ta vaw pie chyu awpa ta ei châ haw ei. Nama sawzy byhnâ ama to awpa nama khoh khiahta la suhrawh-sukha piepha lymâ a vaw chhuah muh vy. Nama sawzy sawhkhâ rai ama hria awpa nama khoh khiahta la, suhrawh-sukha nama pie pha kaw awpa a byuh. Suhrawh-sukha a pie khoh bohbi leipazy ta ama sawzy sawhkha rai ama hriapa chhaota, ama hlao cha sahma dona nata drugs taona liata ama pachhâ lilaw ha tyh. Chhôhkha liata buana taotuhpa tlao ama vaw châ ha tyh. Cha vâta, suhrawh -sukha nama vaw papeimawhsa ta nama vaw pie pha lymâ awpa he  ei châ haw khoh ngaita kaw ei.

6. Eima rai lia chyu heta eima palôh eima patlâhsa tua awpa a byuh. A kheihawhpa su lia rai miah so hra ei sala, palôh apatlâhsa ta tiama kawpa ta pachuna rai eima hria awpa he a peimawh ngaita kaw. Pachutuhpa eima châna lia heta eima palôh tlâh tua sala, miah ama sona su lia chhao heta eima palôh tlâh tua sala, he eina sona su he kei châta la, ei chakaona su na a châ e tahpa ta palôh eima phaoh chyu khiahta la, eima rai liata eima palôh tlâh aw ta, tiama kawpa ta pachu thei pi ta, raihria thei pi ta, eima hro chhao aly pi ta, hmahsiena chhao a y via lymâ aw.

7. Siku hawhti pachuna kyh lia nata a kheihawhpa rai eima hriana kyh liata Khazohpa hmia pasahna chôta rai eima hria lymâ khiahta la, aly kawpa nata tiama kawpa ta raihria thei pi ta, eima râh Mara râh chhao hmahsiena lâ a pangai via lymâ aw. Areipachhie, amaochhie, thâchhie â reih leipa ta palôh pathaih kawpa ta, thlahchhâ lymâna chôta, tiama papua via lymâna chôta eima râh Mara râh châta khâpa e ei tao thei hra aw tahpa palôh phaohna chôta tiama kawpa ta raihriana chôta hmialâ pangai achhuah lymâ suh sy.

Ei châ ly kaw ei.

Puhpa Beihruakhai, EM, MADC nata Puhpa FC. Rehmo, Ex- MDC chhaota Saikao khih liata pasyuna bie pha kawpa reina ama hnei hra.

Party lâ tawhta  Puhpa FC. Rehmô, Ex- MDC, National Council Member, Puhpa C. Vadu, Ex- MDC, Adviser, Puhpa R. Paṭhuama, GS, Puhpa ST. Lalzarmawia, Asst. Secretary, Media & Publicity Deptt., Puhpa FC. Hnaikhu, Secretary, Puhpa K. Beiparylai, Secretary nata hlasa thaipa laihsa Chhingpui Azyu zy ta ama zi.

Puhpa HC. Lalmalsawma Zasai, Dy. CEM zachhihpa he Official lâ tawhta Puhpa John VT. Hniehu, AEO (MS), Puhpa L. Lalduhkima, Addl.DPC (Samagra Shiksha, Siaha), Puhpa Pawsa Lava, AITO, Puhpa R. Beilochai Khithie, Inspector, Puhpa V. Beireithai, PA (Samagra Shiksha, Siaha) nata Puhpa Michael Lalhmangaihthangzuala, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.