PRESS RELEASE

NO.67/2022

AIZAWL, 26 Chhiepa, 2022, Abeipanoh - Atanoh dawh 3:00 PM pa ta Puhpa HC. Lalmalsawma Zasai, Dy. CEM nata Puhpa M. Manasia, Dy. Chairman zy ta MADC ta Hostel a taopa Mara Girls Hostel, Zonuam, Aizawl liatahpa ama tly.

He hostel ama tlyna liata Hosteller-zy apakyhna programme daihti chyupa hmâh ei ta, he liata Puhpa Lalmalsawma chata biereina chyupa hnei ta, “Khazohpa khokheina topa ta Aizawl khihpi liata eima chhituh hmiatuapazy hmahlana zawhzi ta Mara Boys & Girls Hostel pha kawpa, achuhaipa rairupazy nata yna hnei leipazy châta paduapa a châpa he aly achhih kaw ta. He Hostel paduapa a châna chhâpa hawh tlai ta mo laipa nata mo chyhpa apanano eih-na y leina hostel châ sala, ahy hmahta khihsa riethei nata hneirôh eima châna palâsana su ta hmâ tlâ lei awpa ta ei châ haw ei. He he MADC taopa a châna hawhta reih liata a pahnia kawpa ta eimâ chuna su châ thei sa la, kho â chhih kaw aw; kheihawhpa vâta ma Mara reih ahmâh thei âh kaw leipazy châ chhao ta Mara reih nama thai thei nawpa ta - he su liata - practice hnolo awpa ta ei cha hrua ei.”

“Mararâh kyhpachâpa ta Politics liata azaw pangiapa hluh kaw pi ta, cha nahzy pi cha ta eima zydua ta eima hlaotloh thei hlei leipa ta, chacha ta chhôhkha duahmo rairuna tlôkhei ta, nôtloh pawtloh châ ha ta, rai hriana eima hnei lei khiah eima chhôhkha nata sawzy Educution ta tao ngaita ta, chavâta râh nata chipho kyhpachâna do hmeiseihpa ta eima châthaipazy chi he ta sawhkhâ rai liata su peimawhpazy nama patu byuh ta, he hawhpa liata namâ tyu hôlô khiah eima chi nata pho châta pha ta, palôh-eih chhao â chhih via syulyu awpa a châ.”

“Chavâta atanoh liata eima châthaipazy nata achuhaipazy he ta hriapasa leipa ta movi hlâta hneirôh nata niedo achhuah thlâh leipa ta hriapasana nata tiamana hmâpa ta hlaotlohna to chyu awpa ta apatohpatia awpa ta ei châhaw ei.”

“Mizoram nata eima râh khôtho lâ liata Marasawzy officer nata rai hriata atyudua awpa ta eima chapaw nah hlâta eima chanô nahzy he ta, atahmâhlâ khizaw liata thatlôna nata theina nama hnei tahpa pahnona chô ta tiama papua lymâ awpa ta ei châhaw ei.”

“Châ achuhaipa eima chahneipazy liata eima râh nata chipho ta hnabeiseihna dâh chahnei pi ta, eima hneina zydua khôlâ taihta achuna phapa nama dao thei nawpa ta lâhla pi lâ châ chapachusa pi ta, thokha chhochhi cha eima chhôhkha nah niedo phapa chhao nie khoh leipa ta namâ chu nawpa ta dyuchei chhyhpa ta eima cha mohôhpa a châ. Chahawhta a châ no ta my tawhta zâ taihta mobile hria thlâhpa nata atobina zy ngâlâh pachâpa ta daihti nama hmâ khai awpa he, chapasaih ma pi. Asosâhna achupa ta, châ achuna patlô tawhta chhôhkhazy apachyhsa pazao awpa châ thlâh leipa ta, achuhaipa ta cha namâ sosâh kaw leipa chhao ta châ thai kaw awpa nata hlaotlohna to awpa ta cha hnabeiseih pi ta, eima râh lâ liata nama chhôhkha nahzy ta ama cha mokhâh thlâh ha na tahpa he nama my lei awpa apeimawh hmeiseih” tahpa ta a reih.

Puhpa Manasia chhao biereina chyupa hnei ta, “achuhaipazy, rairuna asiepahlie leipa nata sasyh rie apathei awpa apasaih leipazy châta hlaotlohna hmeiseihpa hnei thei vei ei; hlaotlohna he eikha pi ta hmô a thei lei ta, rairuna tao hnolo ta, sasyh rie apatheipa ta achu lymâpazy he hlaotlohna khochhihpa ama to tyh” tahpa ta a reih.

Mara Girls Hostel mohôhtuhpa Pihnô M. Rili, Warden nata Hosteller zy ta Puhpa HC. Lalmalsawma Zasai, Dy. CEM nata Puhpa M. Manasia, Dy. Chairman zachhihpazy ama tlypa cha aly kawpa ta avaw ly ei ta, Puhpa Lalmalsawma nata Puhpa Manasia zy ta ama chô liata alynabie ama reih.

ISSUED BY:

Information & Publicity Department

Mara Autonomous District Council

Siaha.