PRESS RELEASE

NO.157/2022

SIAHA, 20 Phiata, 2022, Pobienoh - Atanoh dawh 10:30 AM pa ta MYA Hall, New Siaha liata Samagra Shiksha Siaha District, Siaha pachhuahpanohpa ta training on community mobilization for Siaha block programme liata Puhpa HC. Lalmalsawma Zasai, Dy. CEM, MADC cha khichhai laipa (chief guest) châpa ta â hmâkhei ei.

Programme he Puhpa T. Chatlua, Addl. DPC, Samagra Shiksha Siaha District, Siaha ta chhihtha ta, Puhpa JC. Lalthansanga, BRCC, Siaha ta devotion daihti â hmâh. Puhpa C. Lalbiakzauva, DPC, Samagra Shiksha, Siaha ta pasyunabie pha kawpa reina a hnei. FC. Suna Chanô ta pahnie kawpa ta hlasapa ta zawpi a palôhpahawh.

Programme he Siaha Block chhôh liata pachutuhpazy, VC nôpawpazy nata NGO (MTP Chhituhpazy) zy amâ hlao.

Puhpa HC. Lalmalsawma Zasai, Dy. CEM, MADC ta pasyunabie a reipa tlâhpi viapazy:

Atanoh he su liata a vaw hmôpakhy ei chi ta, bie ei reih khoh kawpa cha Siaha block chhôh liata pachutuhpa zydua, VC nôpaw zydua nata MTP chhihtuhpazy Mararâh education hmah pasiesa via awpa ta hriaparaoh awpa ta ei cha hrua ei. MADC ry liata keimo education department liata ypa nata atanoh he su liata avypa Officer-zy heta nama school chyu liata khâhmah tao theipa hnei ma pi, keimo ta la facility eima cha provide aw, nama school eima theina rakha ta repair byuhpa cha repair pa aw pi ta, hmobaoh eima cha pie aw, hmobaoh eima cha piepa kha nâmo ta nama hmâh phahnai awpa a byuh. Nama school châta hmobaoh, etc eima cha piepa kha pha kawpa ta mohôhpa kha nama maophaohna châ ta, a pha kawpa ta nama mohôh awpa ta ei châ haw ei.

Nama yna su lia heta nama palôh a tlâh ma? tahpa he ei cha hiahri khoh ei. Nama yna su liata nama palôh a tlâh vei khiah, rai pha kawpa ta hria thei leip'aw ei chi ta, pachutuhpazy chhao ta a pha kawpa ta nama school hawhtizy pachu thei hr'aw veih ei chi. Khazohpa ta nietlua nawpa, chhôhkha mohôh nawpa châta rai miah a piepa hlâta hmohropa papeimawhsa viana palôh hneipa he a vaw pha lei kaw. Eima rai liata ngâchhih kawpa ta hria ta, tiama kawpa ta eima hria awpa he hmo phapa a châ hleikhô ta Khazohpa khodâh chhao a châ hra tahpa he a thiehpa ta nama pahno awpa ta ei châ haw ei.

Nama rai liata nama palôh a tlâh khiahta la, aly kawpa nata tiama kawpa ta nama hria thei aw. Bible liata Zawsi (Josefa) chhao kha a yna maih liata palôtlâh kawpa ta y ta ngâchhih kawpa nata tiama kawpa ta rai a hria lymâ tahpa eima pahno. Jail liata â tâh no hmahta aly kawpa ta y ta, aly kawpa nata ngâchhih kawpa ta rai a hria. A chhâna liata cha chhituh phapa nata biehneina laipa chaba ta rai laipa a kaw hria haw. Kei chhao CEM châ awpa achhuah kaw ty na ta, châhrasala, Dy.CEM liata vaw y na ta, education department mohôh na ta, ei palôh a tlah ngâsâ. Palôhtlâh kawpa ta rai ei hria. Eima rai liata eima palôh a tlâh khiahta la, aly kawpa nata tiama kawpa ta rai eima hria thei.

Education papeimawhsa ta eima khitlâh chyu liata eima school o châ heta Job Card nohkha thazy he school o repair nawpa zy, school bench, dawhkâh, etc châtazy thyu ta, MTP, VC, tlâhrai pahrua ta raihria tua ei suh u. Khitlâh, School, eima saw châ heta eima Job Card nohkha tha eima thyupa tawh heta raihria ta, ku pathla hra tua suh u. Khih thokha liata cha School Mid-Day Meal châ heta ama lyu, sahdô liata âhnalasizy thyu ei ta, aly'pa a châ hmeiseih. He hawhta ataopa khihzy nama y khiah Mararâh education papeimawhsana nata eima sawzy education liata hmahsiena ama hnei thei via nawpa ta tao hra tua ei suh vy. Olyu pha kawpa hnei ta, Motor mâ ru kawpa hneipazy hlâta hmahta a pha via. 

Education he cha eima râh châta peimawh tu ha ta, ei palôh eina hria chaipa cha Siaha New Colony school (Gov’t Comprehensive Elementary School) liata ama pachutuhpazy ta ama saw âmo ama pachuna school lia cheingei ta pakiasa pâ ei ta, ei vaw ly ngaita, he school liata a hriatuhpazy ta ama school liata ama sawnah ama pakiasa khiahta cha school phapa a châ tahpa ei reih khoh.

Puhpa HC. Lalmalsawma Zasai, Dy. CEM, MADC he Official lâ tawhta Pihnô Nazee Khailah, Sr. EO, Puhpa John VT. Hniehu, AEO, Puhpa Pawsa Lava, AITO, nata Puhpa T. Pabua, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.