PRESS RELEASE

NO.163/2022

SIAHA, 28 Phiata, 2022, Chutyhnoh  – Atanoh dawh 9:30 AM pa ta Puhpa HC. Lalmalsawma Zasai, Dy. CEM, MADC ta Siaha Town area chhôh liata School sâno (2) Government Middle School, Meisavaih 'W' nata Government Primary School - 1, Meisavaih East zy a tly.

Dy. CEM chata a school tlyna liata school châta ama peimawhpazy mokheipa ta Headmaster nata staff zy ta ama peimawh ngiapazy Dy. CEM ama chho. Gov't Middle School, Meisavaih 'W' cha main road tawhta school pangaina Step phapa ama peimawzie nata pachutuhpa amâ daih leizie ama reih. Dy.CEM ta ama school aza tlypa amâ lyzie chhao ama reih pâ hra.

Dy.CEM chhao ta Headmaster, Staff nata VCP zy hnohta ahawna tao ta, cha ahawna cha, JOB Card nohkha tha he School O abyuh ângiahna liata taopathi nawpa châta amâ pasaih awpa peimawhzie reih ta, kha Job Card nohkha tha School O a peimawh ângiahna maih liata hmâh awpa ta ama thyupa kha MTP ta nohkha tlâhrai pahrua ei sala, volunteer pa ta school O ta a peimawhpa taopâna tlâhrai hria awpa ta ei châ haw ei a tah.

Meisavaih 'W' he Siaha Khihlôpa châ ei chi ta, chavâta, nama school he nama mohôh pha kaw awpa a byuh. Nama zydua ta school hmahpasiesa achhuah ta hriaparaohna phapa nama hnei awpa a byuh tahpa ta Dy.CEM ta pasyunabie a reih.

Dy.CEM ta Gov't Middle School, Meisavaih 'W' a tly khai tawhta Government Primary School - 1, Meisavaih East tly ta, ama peimawh angiahpazy a reikhei hra ei. Ama Headmistress ta ama School chôhkâ a pha khao leizie nata taopathi a byuhzie reih ta, ama school ochhôh (Room) partition Plywood pha kawpa hmâpa ta taopathi â ngiahzie chhao a reih pâ hra. 

Cha hleikhô ta, student châta question set nawpa châta Computer ama hnei leizie nata ama peimawzie chhao Dy. CEM hnohta ama chho pâ hra.

Dy.CEM chhaota ama School ynapa he Siaha vaih lialôhpa nata vaih hlôpa ama châpa vâta bao amâ ngiazie reih ta, a bao theina rakha liata bao âchhuahzie chhao a chho pâ hra ei.

School hmahsie nawpa châta School Headmaster/Headmistress zy reingiah peimawhzie chhao staff zy hnohta Dy.CEM heta a chho pâ hra ei.

Puhpa HC. Lalmalsawma Zasai, Dy. CEM he Official lâ tawhta Puhpa P. Tluasa, SE (PWD, MADC), Puhpa John Kenneth Syhly, EO, Puhpa John VT. Hniehu, AEO (MS), Puhpa Herbertson Syuhlô, AEO (PS), Puhpa Pawsa Lava, AITO, Puhpa Halelui Lalhuapzaua, PA to Dy. CEM nata Puhpa Michael Lalhmangaihthangzuala, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.