PRESS RELEASE

NO.84/2022

SIAHA, 22 Khihpa, 2022, Chutynoh - Atanoh dawh 12:30 PM pa ta Puhpa HC. Lalmalsawma Zasai, Dy. CEM  i/c School Education, MADC ta ano office room liata MTP General Headquarters(HQ), Siaha Office Bearers zy apakyhpa ta Mararâh Education hmahsie via nawpa liata a hmo khohpa nata achhuahpazy reikheina a hnei.

Puhpa Lalmalsawma chata ary liata palâsapazy hawhta MADC School Education Department nata MTP Gen. HQ zy hriaparaohna (MoU) hnei awpa ta khona a reih:-

1. Village Level Education Committee paduapa ta, cha Committee syhpahmaoh awpa ta District Level Education Committee padua awpa. Committee paduapa he School Education Department, MADC ta a tao aw.

2. He Committee he ta ama khih/vaih level liata School Administration nata Infrastructure Development liata maophaohna ama chaba aw.

3. Sôh hmô nawpa dâh nata ahmâ khai nawpa dâh chhao Village Level Committee ta a pachâ aw. 

4. School Administration chôchâh liata chhao Village Level Education Development Committee ta maophaohna sâh kawpa ama hnei aw.

He hleikhô ta Puhpa Lalmalsawma Zasai chata eima râh hmahsie via nawpa a châ khiah MTP zy ta abyuhna liata tha nata zâh taihna vaw thyu thei ei sa la, School Bench taozy tlâhrai tly ma, School O taopathiehna rai hria awpa liata tlâhrai tly ma, abyuhna hawhta khitlâh châta hria awpa ta ahawna tao ta, MTP Gen. HQ OB zy chhao ta MTP Dâh & Chhihthana Bu 2016, Bo 1:4(7) MTP Paduana chhâpa nata a chhuahpa (Aims & Objectives) liata “Marapa sawzy achuna liata hmah pasiesa awpa” tahpa arohpa pahno thlâhna chô ta eima râh Education hmahsie via nawpa kyh liata ama theina papua amâ chhuahzie reih ei ta, Dy, CEM zachhihpa ahawna nata khonazy cha OB meeting ta abyuhna hawhta hmah vaw lapazi awpa ta amâ chhy hra.

He hleikhô ta Village Level Education Committee thatlô kawpa ta a sie thei nawpa ta MTP zy he key post patupa châ sala tahpa khona chhao MTP Gen. HQ nôpawzy ta reih ei ta, MTP kôphuahpa Chipho, reih pabohsana kyh lia chhao MADC School Education Department nahta hrialâh awpa apha ama tahzie ama reih hra.

Puhpa HC. Lalmalsawma Zasai chata atanoh liata a hruanazy pachâ peimawhpa ta apakyhna liata avy theipa MTP Gen. HQ OB zy hnoh ta alynabie a reih.

ISSUED BY:

Information & Publicity Department

Mara Autonomous District Council

Siaha.