PRESS RELEASE

NO.171/2022

SIAHA, 10 Phiapi, 2022, Pobiehnoh  – Atanoh dawh 11:00 AM pa ta KVK Complex, Siahatlâh - III, Siaha liata Krishi Vigyan Kendra (KVK) pachhuahpanohpa Jal Shakti Abhiyan Mela Programme 2022 cha Puhpa HC. Lalmalsawma Zasai, Dy. CEM, MADC cha khichhai laipa (chief guest) châpa ta â hmâkhei ei.

He programme châta theme hmâpa cha "Catch the rain, where it falls, when it falls" tahpa a châ. Programme he Dr. H. Vanlalhmuliana, Sr. Scientist and Head, KVK Siaha ta chhihtha ta, Pihnô Rachael Chozah, Scientist (Plant Protection) ta Abeipa lâ pavaosana devotion daihti â hmâh. He programme liata special invitees zy cha EE, SDO PHE, DAO, DHO, DVO, DFDO, DSO, Sr. DAO & DCF MADC, PD ATMA, Joint VC President, President & Secretary AMFU nata Siaha Town chhôh liata Farmers zy ama châ.

Puhpa NT. Jevis, SDO, PHE, Siaha ta "Rain water harvesting for village water supply/irrigation" tahpa biepiepa hmâpa ta pahnie kawpa ta PowerPoint presentation a hnei. Pihnô J. Vanlalhluzuali, SMS (Agri. Extension), KVK chhaota "Conservation of water & afforestation" tahpa biepipa hmâpa ta PowerPoint presentation a hnei hra.

Puhpa Wilkinson B. Khuhly ta  pahnie kawpa ta hlasapa ta zawpi a palôhpahawh ei.

Puhpa HC. Lalmalsawma Zasai, Dy. CEM, MADC ta pasyunabie a reipa tlâhpi viapazy:

KVK heta Siaha District chhôh liata lyu, sahdô, etc ataopazy chhaichhi peimawhpa pachâpa ta, taotia dâh ahmâh dâh nama pachu lymâ awpa ta châ haw khoh kaw ei na ta, Organic chicheipa he Mararâh liata Phura khih ngâlâh châ leipa ta Siaha District liata khih hropazy ta Organic chicheipa palôh hnei kawpa nata tiama kawpa ta ama chhei thei hra nawpa ta KVK heta hmah nama lakhei awpa ta ei châ haw ei.

Rain harvesting he eima papeimawhsa via lymâ awpa he a peimawh ngaita kaw. Avâ suah lei daihti lia chhao ta eima rain harvesting tawhta chichei eima loh thei ta eima mohôh pazi thei awpa he namâ vaw chhuah chyu awpa ta ei châ haw ei.

Eima mindset he thla bâ ei sih la, tiama papua ta agriculture lâ lia heta hmahsie via lymâ eimâ chhuah awpa he a peimawh kaw bâ.

Israel râh tatawpa parabypi (desert) chhao agriculture lâ liata tiama kawpa ta raihria ei ta, khizaw liata âhnalasi export hluhpa ama châ thlâh haw. Khizaw liata su hro râh hro liata Agriculturist zy he a hneirôh chaipa ama châ thlâh haw. Eima râh liata eima mindset thlapa ta tiama eima papua via awpa he a peimawh ngaita kaw.

Eima râh Siaha District lia heta vaozy eima zao hôlôpa vâta, vao ie roh chhie leipa ta taodâh ei cha share khoh kawpa ei la:- Vao-o ry liata Leizaih, Meihei nata Alô dipa paso khoh aw ei chi ta, vao-ie roh pahnâh khao leipaw ta, cha hleikhô ta, kha kha alei phapa lâta a vaw lie ta, chicheipa lo nawpa châta a pha kaw. Cha hawhta nama vaw tao chyu awpa ta ei châ haw ei.

Atanoh he su liata lyu taopa, sahdô taotuhpazy ta nama chichei âhnalasi lahsi pha kawpa vaw cheih ei chi ta, aly'pa a châ kaw nota a peimawh chaipa deikua cha, kha nama lyu, sahdô taopa tawh khata chhôhkha khihsa nawpa ta namâ tivy tlai ma tahpa kha na hmo peimawh chaipa cha a châ. Palôh hmeiseih piepa ta nata tiama kawpa ta chhôhkha chyh nawpa ta raihria ta ativy he namâ chhuah chyu awpa ta ei châ haw ei.

KVK, AMFU nata Agriculture Department, MADC zy he hriaparaohna phapa hnei awpa ta ei châ haw ei. Siaha District liata lyu taopa nata sahdô taopazy kyhpachâna thapasana palâsana chôta hriaparaohna phapa nama hnei awpa ta ei châ haw ei.

Ei châ ly kaw ei.

Puhpa HC. Lalmalsawma Zasai, Dy. CEM, MADC he Official lâ tawhta Puhpa Beimosa Azyu, P&DO, MADC, Puhpa S. Chozah, EE, PHED, MADC, Pihnô Catherine M. Chozah, Sr. AO, MADC, Puhpa Pawsa Lava, AITO nata Puhpa K. Nehemia Cameraman zy ta ama chakaochahlâh.

Dy. CEM heta DIET Hostel, Siaha liata sa ngâhaipa a tly pahra.

Dr. Lalzaidami, SMS (Animal Sc.), KVK ta vote of thanks reina a hnei khai tawhta inspection of stall hneipa châ ta, cha khai tawhta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.