PRESS RELEASE

NO.69/2022

SIAHA, 1 Khihpa, 2022, Chutynoh – Zâhnia zâ dawh  8:30 Pm kha ta Puhpa HC. Lalmalsawma Zasai, Dy. CEM, MADC ta Assam Chief Minister Puhpa Himanta Biswa Sarma cha a office liata ahmô ta, Guwahati liata achuhaipazy duahmo nata a eihpachaipa ta Mizoram chho lâ tawhta Guwahati liata achuna vâta a y haipa, rairu kawpazy khazie tlaima y ei ta, o tlô awpa ta rairu khei kawpa hluhpi ama y vâta Student Hostel tlyma, râh tlyma pachâpa awpa ta ahawna a tao.

Puhpa HC. Lalmalsawma Zasai (Puhpa Patea Zasai) he ta, Assam CM ta râh zy miah a pie thei khiata cha Hostel nata Achuchaipazy y nawpa su nata O phapa sa hra awpa a khoh zie reih ta, Guwahati he North East India liata supi chaipa a châpa vâta by lei thei lei pi ta, Guwahati su lia heta achuhaipazy duahmo nata hmialâ hmo (future) awpa miah mokheipa ta râh pha kawpa miah pachâpa awpa ta Assam CM hnoh he ta â haw.

Assam Chief Minister he ta a Secretary cha a room liata awpa ta Autonomous District Council ôna chhôh liata achuhaipa rairu kawpazy châta Hostel su phapa, O pha kawpa ama sa thei nawpa ta lâpi tlua khei tah, a su pachâ awpa ta chho pâ ta, priority pie awpa ta a chho pâ heih hra.

Assam CM he ta Mizoram ta a tliata liata Silchar liata ti laipa vâta Silchar zawpizy rairuna atyh haipa liata Mizoram zawpi ta pachâ peimawhpa ta, Ti do awpa phapa nata baona chi nano nanopa ama daopa cha aly’pa a châ hmeiseih tahpa Puhpa Patea Zasai hnohta a vaw chho.

Puhpa Himanta chata Mizoram sawhkhâ – Puhpa Zoramthanga sawhkhâ nahta apha kawpa ta ama hrialâh hleikhô ta apeimawhna hawhta telephone liata bie achhopa ta State sâ 2 zy hrialâhna liata ama palôh â raoh tahpa bie chhao a reih. Assam CM he ta aly kawpa ta ano office lia cheingei ta, Puhpa Patea Zasai he â vaw pakyh.  

Puhpa Patea Zasai he Guwahati MSO zy ta vaw dy ei ta, a tlôna liata hmosai pie sôh kawpa chhao ta, MSO chhihthatuhpazy he ta Guwahati a tlôpa amâ vaw ly.

ISSUED BY:

Information & Publicity Department

Mara Autonomous District Council

Siaha.