PRESS RELEASE

NO.94/2022

SIAHA, 11 Thlazoh, 2022, Pobienoh - Atanoh kha Puhpa HC. Biakcheuva, EM i/c Forests, MADC ta a bia Tisôpi khih liata School ypa - Gov’t Primary School: Tisôpi, Gov’t Middle School, Tisôpi, Gov’t Aided Primary School (Old Tisôpi) zy tlypa ta School Teacher zy hnoh ta pasyuna bie pha kawpa nata school zy hmahsie nawpa liata apachâ peimawhpazy reina a hnei.

School to liata Teacher zy chhaota school duahmo report zy hleikhô ta ama school chyu liata ama peimawhpazy, EM zachhihpa hnohta pakah nata châropata ama tlôkhei chyu hra.

Ano azipa Puhpa L. Khaichyu, Ex-MDC & Adviser, MNF Dist. HQ, Siaha, Puhpa Thaly T. Azyu, CF, MADC, Puhpa John Kenneth Syhly, EO, MADC zy chhao pasyuna bie nata eima râh School hmahsie nawpa liata ama paveihpazy reina ama hnei.

Ary liata palâsapazy he Puhpa HC. Biakcheuva, EM zachhihpa ta School to liata a bierei tlâhpi viapazy a châ:-

1. Atanoh daihti pha kawpa miah pie tuhpa eima Beipa hnoh ta alynabie ei reih.

2. School eima kaw tlyna chhâpa cha School zy duahmo nata hmah la peimawhpazy pahno awpa ta akhypa eima châ; bia zawpizy ngiachhiena nata khokheina zawhzi ta 12th Term MADC liata nama biatuhpa rai hria awpa ei châna hawhta ti nata râh hmahsie nawpa ta School zy tly awpa he ei maophaohna a châpa ta ei pahno hra.

3. Teacher nahzy pi he ti nata râh hmahsie lymâ nawpa liata eima peimawh hmeiseih; keimo ta aphapa ta eima rai eima hria lei khiahta la, râh ta tao aw ta, hmialâ chhâ a vaw y awpa liata Marasaw châthaipa eima y khao lei khiah chi hro pho hropazy ta eima râh liata ryu vaw reih aw ei ta, eima ti nata râh cha Teacher zy ta eima parao khai thei tah na a châ.

4. Teacher hluh via cha a khih hneituhpa châ pi ta, eima sawnahzy châ thaipa eima papua thei lei khiah a maoh cha keimo eima châ aw. Theilâ phapa eima papua nahta papua lei cha keimo sasyh ta eimâ pahno chyu aw; daihti eima hnei chhôh he ta tiama papua lymâ suh u. 

5. Hâtizy, châthaina liata ama laiseih nawpa liata a thaby tawhta pathao pathi abyuh thei aw, tiama suh u. Rairuna a y khiah MSO nata MADC School Education Department zy ta tiama miah papua khei aw ei ta, hmah eima la khoh lymâ aw. 

6. Chhôhto ta sawhkhâ rai miah a daih tiah aw vei; Sawhkhâ rai angia khai vei hra ei si la, châ eima thai khiah nohto nietluana kyh liata miah bao tuhpa châ aw ta, atahmâ duahmo hlâta eima hmahsie via cheingei aw.

7. Nama biatuh awpa ta nâ tlyh ha ei chi ta; chavâta Education hmahsie nawpa ta eima theina hawh ta hmah la lymâ ei chhuah.

8. Eima râh liata Râhmâh nata Pazu pavaw pabohsana kyh liata School tawhta eimâ pachu awpa he apeimawh kaw.

9. Daihti khô chiehpa liata School teacher zy pi ta eima tao pado leina a y ngyu thei aw; my khai ha si la, atahmâ tawhta palôh thiehpa phaopa ta hmah lakhoh lymâ awpa ta cha hrua ei na ta, Teacher zy pi he eima maophaohna â sâh kawna tahpa pahno si la, siku hawti zy ama pahâna lâpi mokhei lymâ awpa ta ei châ haw ei.

10. Eima chakaona nata nietluanazy he pachâ peimawh ei si la, tiamana, apiena nata râh thapasana hneipa ta phahnai ngiahna chô ta rie tiama papua via chyu awpa ta ahaw pi ta, eimâ hrua chanei hmeiseih. 

Puhpa HC. Biakcheuva, EM zachhihpa he Official lâ tawhta Puhpa Thaly T. Azyu, CF, Puhpa John Kenneth Syhly, EO, Puhpa Beirokhu Beita, I & PO, Puhpa CH. Lalhriatpuia, PA to EM(Forest), Puhpa T. Pabua, Cameraman zy zi ei ta, Puhpa L. Khaichyu, Ex-MDC & Adviser, MNF Dist. HQ, Siaha nata a tunônô Laihsa Jennifer zy ta ama chakaochahlâ.

MSO Gen. HQ: Siaha tawhta Daphney Lapi, Treasurer, NT. Beichhisa, Secy. i/c Property, Clinton B. Hlychho, Exe. Member, Radhica Notlia, Exe. Member zy ta kaw zi ei ta, MSO Gen. HQ vyuhpa ta pasyuna bie pha kawpa ama reih hra.

Puhpa HC. Biakcheuva, EM zachhihpa ta ano a kaw zi tuhpa zydua hnoh   ta alynabie reih ta, Tisôpi liata Teacher zy nata khitlâh nôpawpazy hnoh ta alynabie a reih hleikhô ta, Zâpati achhuanohtuhpa Old Tisôpi MNF Unit Vice President Puhpa HC. Fakzualua nata a chhôhkhazy hnoh ta palôh hmeiseihpa ta alynabie a reih.

ISSUED BY:

Information & Publicity Department

Mara Autonomous District Council

Siaha.