PRESS RELEASE

NO.71/2022

SIAHA, 1 Khihpa, 2022, Chutynoh – Atanoh dawh 11:45 Am pa ta Puhpa HC. Biakcheuva, EM i/c E & F Department etc., MADC ta a bia chhôh - Siahatlâh liata Primary School nata Middle School zy a tly. 

Government Eastern Middle School, Siahatlâh zy ta Puhpa HC. Biakcheuva alykheina pawpi sao (bouquet) ama vaw hlâ.

Puhpa F. Lalrinawma, Headmaster, Primary School, Siahatlâh-I, Puhpa Zasawna, Headmaster, Primary School, Siahatlâh-II, Puhpa M.Thawngling, Headmaster, Primary School, Siahatlâh-III nata Puhpa C. Lalramnghaka, Headmaster, Government Eastern Middle School, Siahatlâh zy ta ama School chôchâh report piena hnei ei ta, School châta amâ ngiahpa nata peimawhpazy biatuhpa EM hnohta ama tlôkhei. 

Puhpa HC. Biakcheuva ta biereina chyupa hnei ta, ary liata palâsapa he a bierei tlâhpi viapazy a châ:-

“Atanoh, he su liata eimâ vyna chhâpa cha kheihawh pi tlyma ta pachâ leipa u la, ei vyna chhâpa cha he liata Khazohpa ngiachhiena vâta râh chakao hra awpa ta Abeipa ta hlao miah patloh hra ta, cha liata eima khitlâh liata School duasuzy pahno tah, khâpa ma namâ phahlapa nata rairuna, he School lia heta School hawti pakhazie ma y ei ta, pachutuhpa pakhazie ma y ei chi, biatuhpa ei châna hawhta pahno awpa khoh na ta, chyhsa chhao ta na bia liata School khazie ma y, School detail zy na hiahri ei sala, ei pahno vei khiahta la, biatuhpa nokhih leipa ei châ awpa vâta atanoh ei cha vaw tlypa ei a châ.”

“Biatuhpa ei châna lâ tawhta School châta namâ ngiahpa nata peimawhpa cha Office lâ tlôkhei leipa ta, kei biatuhpa ei châna hawhta ei hnohta vaw tlôkhei u la, hmah eima la khoh lymâ aw.”

“Parent-Teacher Meeting (PTM) he nama hnei tyh awpa ta ei châ haw ei. PTM nama hnei hluh khiahta la, nama hmahsiena zy, rairuna zy, achuna liata hmahsiena a y thei nawpa ta hmahla namâ chhuahnazy reikhoh tyh aw ei chi ta, hmahsiena thata a y aw.”

“School hawti chhao ta châ chu ama ai tu lei nawpa ta Sports zy nama pahneisa hluh via awpa  peimawh kaw ta, ahawna ei tao pâ hra. Atahmâ ta nama School hawtizy he, he tawhta chyhsa hmâtlâh châpa ta papua namâ chhuah awpa ta ei châ haw ei.” 

Azi tuhpa Puhpa Herbertson Syuhlo, AEO, School Education Department chhaota pasyuna bie pha kawpa reina a hnei hra.

Puhpa HC. Biakcheuva he Official lâ tawhta Puhpa Herbertson Syuhlo, AEO, Puhpa Pawsa Lava, AITO, Puhpa C.H. Lalhriatpuia, PA to EM (F), MADC nata Puhpa K. Nehemia, Cameraman, I&PD zy ta ama chakaochahlâ.

ISSUED BY:

Information & Publicity Department

Mara Autonomous District Council

Siaha.