PRESS RELEASE

NO.92/2022

SIAHA, 4 Thlazoh, 2022, Pobienoh – Zâhnia dawh 1:00 PM pa ta Puhpa HC. Biakcheuva, EM i/c Forests etc. ta ano office chamber liata Press Meeting awpa ta Mizoram Journalist Association (MJA) Siaha zy apakyhna nata thopi dolâhna a hnei.

Puhpa HC. Biakcheuva, EM zachhihpa chata MJA zy he eima râh liata sawhkhâ hmahlana thâtihzy, zawpi lâ miah apahnosatuhpa ama châpa vâta alynabie reih ta, a eihpachaipa ta E & F Department, MADC zy ama hrialâhna liata alynabie a reih; hmialâ sie lymâ nawpa liata hrialâh via lymâ awpa ta ahawna chhao a tao. 

Atahmâ liata Press Meeting a awna chhâpa he Pala Tipo, Ramsar Site ta phuahpa a châpa vâta châ ta, International, National nata State news liata Pala Tipo, Ramsar site ta phuahpa a châpa thata thâtih y ta, Mararâh lia chhao zawpi pahno awpa ta a kawh thei chaina hawhta vaw phualuah awpa ta MJA lâ ahawna a tao. 

Puhpa HC. Biakcheuva chata Pala Tipo, Ramsar site châta phuahpa a châpa he MADC nôpaw hmiatuapazy nata E & F Department hriapasana a châ tah ta, ano EM i/c Forests liata â vaw tyuna daihti liata Wetland of International Importance châ awpa ta Pala Tipo, Ramsar site châta phuahpa a châpa he â lyzie reih ta, MADC Golden Jubilee byhnâ a châ tahpa chhao reih ta, a ry liata palâsapa he zawpi pahno awpa ta MADC Monsoon Session 2022 liata a rei papua hleikhô ta atahmâ lia chhao a tlâhpipa reina a hnei:-

“Mara Autonomous District Council (MADC) ry liata Department sâkha, Environment  & Forest (E & F) Department he Mararâh chhôh zydua liata râhmâhpa nata chavah kao zydua mohôh awpa nata pabohsana raihria awpata eima District Council ta a paduapa a châ. PCCF pasyupakâna ta, kô 2003 liana khata, a eikha nawpa ta Pala Wetland Management Plan (Record Bu) cha Department ta pachhuapanoh ta, he Management plan he MoEF (Central) lâ forward awpa ta paphaopa a châ.”

“He Management Plan Bu he Puhpa S. Kaul, Director, Wetland Ministry of Environment and Forest, Government of India kô a tlô tawhta, Delhi tawhta Mawrâh kaw tlô ta, Lengpui Airport tawhta  Phura Forest Guest House lâ Pala Tipo moh awpa ta a kaw palâh pâpa a châ. Delhi a tlô tawhta Pala Tipo nata a chheipâh râhmâhpa zy he kô 2005 liata India Wetland List liata pahlao pa a vaw châ haw.”

“Kô 2019-20 liata Sikim nata Manipur liata Wetland Seminar Cum Workshop hneina liata Ramsar Site ta phuah awpa ta, Forest Department, MADC ta Ministry nôpaw penawh liata pahruana zy vaw pangia ha ta, February 2021 PCCF Conference Hall, Forest Officer Meeting liata he proposal he pangiapa châ heih ta, he meeting liata bie pathluna hawhta Puhpa Jitendra, PCCF, Mizoram ta CF MADC hnohta Pala Wetland he Khizaw liata Tipahnapa su peimawhpa hry liata - Ramsar sites châta pahlao hra awpa ta pahruana (suggestion) vaw pie ta. Cha pahruana pachâ  peimawhsapa ta, a râh hneituhpa MADC Executive apyhkheina ala tawhta, Executive Secretary MADC siepahliepa ta, Mawrâh sawhkhâ lâ approval awpa ta paphaopa a châ. Mawrâh sawhkhâ ta liahsa a mohpasia tawhta  Ministry of Environment and Forest (MoEF) lâ recommendation nata apykhei awpa ta châ (letter) a paphao. MoEF tawhta Ministry of External Affairs lâ paphao hei ei ta, âmo ta Ramsar Administrative Office, Switzerland lâ ama paphaopa a châ. Ramsar Administrative office ta direct ta (via e-mail) Environment & Forest Department official email liata Ramsar Information Site (RIS) link vaw paphao ta, cha cha Ramsar Compilers team (1) Puhpa Thaly T. Azyu, CF (2) Puhpa B.Hleisa, ACF,  (3) N. Sangi, UDC (4) N. Zachhua Staff (5) B. Ngote Comp. operator nata  Dr. Seikuti Nohro Forest Department ta consultant hawhta a hmâhpazy ta, online ta Ramsar Information Sheet (RIS) pabie byuhpazy pabie khai tawhta paphao pa a châ. Administrative Officer (Ramsar) ta pasia byuhpa (Clarification) tao awpa ta MoEF lâ vaw paphao lilaw heih. MoEF ta a byuhna dâh hawhta a mopasia khai tawhta , Ramsar Office lâ paphao pakhua heih ei ta, chatawhta eima (E & F, MADC) form pangiapa cha 31st, August, 2021 lia khata apyhpa ta pahnopa châta, Official ta atakô 2022 July liata phuahpa a châ.”

Pala Tipo he RAMSAR site avaw châ ha tawhta hmahsiena (development) hro hropa y lymâ theipa zy cha:

1. Tourism development: Mizoram liata Tipo lai chaipa a châ hleikhô ta Ramsar site (Wetland of International importance) a châpa vâta, Tourist hluhpi vaw y aw ei ta, cha chata Transport Operator nata Hotel taotuhpa nata Small business taopazy châta, athôhna hluhpi vaw tlô thei awpa a châ. He he keimo Council Authority chhaota hmah thata eima la awpa abyuhpa ta â lâ.

2. Sustainable village: Ramsar achâpa heta a chheipâh khihzy châta sustainable development planning tao thei awpa a châ aw. A chheipâh zy châta ativyna scheme nano nanopazy chhao he tao pasaipa a châ ha aw. 

3. Educational research: Pala tipo he Ramsar site a châna hawhta achuna lâta pahno pasia khohpa hluhpi y aw ei ta , cha chata eima râh liata cha thai penawh research taopa ta, Doctorate hluhpi ama vaw puana awpa su a châ.

4. Cultural promotion: Tipo nata a chheipâh avaw moh tuhpa ama vaw hluh via lymâ khia cha, tourist destination sakhâ hawhta châ ha awta, Foreigners nata National tourist zy chhao amâ vaw pôh via lymâ awpa chalâ ta, cha liana chata eima Mara cultural dance zy nata dress zy chhao chihropa zy hnohta apalâhâhsana phakawpa a châ hra.

5. Ramsar site avaw châpa vâta, Conservation NGOs ie. WWF (World Wide Fund for nature) zy chhaota Project Fringe village (a khih chheipâh) zy châta athôhna a y thei awpa a châ.

He Pala Wetland Ramsar site (Wetland of international importance) avaw châ theipa he Khazohpa ta eima Mararâh kyh a pachânazie a palâsa kaw. He hawhta eima râh liata hmo sôhpa eima hneipa he Keimo, a râh hneituhpa sawzy ta pasô thai ta, pabohsa lymâ awpa ta eimâ chhua chyu awpa ta ei châ haw ei. “For God and Maraland.”

Puhpa Thaly T. Azyu, CF ta Pala Tipo châta E & F Department, MADC hmahlanazy reina hnei hra ta, aeihpachaipa ta Pala Tipo pabohsana kyh liata Pala Tipo chheipâh liata khih ypa nata sahdô, leipalie nata râh ahneipazy hnoh ta alynabie reih ta, âmo y leipa ei sala, Pala Tipo atahmâ duahmo hawhta pabohsa thei awpa a châ leizie reih ta, thokha chhochhi cha ama sahdô, râh nata leipalie zy cancel pa châ ei ta, he nahzy he ti nata râh kyhpachâtuhpa ama châ tah ta, reithai tlâh ama châzie a reih. Atahmâ chhochhi cha Ramsar site ta phuahpa a châhapa vâta thapi phia viapa ta mohôh tah VC, NGO nata a chheipâh zawpi zy hleikhô ta a tlytuhpa zawpizy, pabohsana kyh liata hrialâh chyu heih awpa ta ahawna chhao a tao. 

He Press Meeting liata Siaha MJA zy puapha kaw ei ta, Official lâ tawhta Puhpa Beirokhu Beita, I & PO, MADC â hlao hra.

ISSUED BY:

Information & Publicity Department

Mara Autonomous District Council

Siaha.