PRESS RELEASE

NO.101/2022

SIAHA, 26 Thlazoh, 2022, Chutynoh - Puhpa HC. Biakcheuva, EM i/c Forests, MADC ta noh 2 chhôh official tour programme taopa ta zâhnia târi 25.8.2022 nata atanoh târi 26.8.2022 he ta Chakhei a tly.

EM zachhihpa he zâhnia kha Siaha tawhta athaopa ta, zâlâ liata Chakhei angia ta, Chakhei liata VC sâ 3 ypa Joint VC zy ta VC Court House, Chakhei-II liata ama vaw ydy. He su liata Chakhei Joint VC nôpawpazy nata khitlâh nôpaw kô lâta uhthei viapazy chhao ta apakyhna hneipa châ ta, zâ pati dôlâhna hnei pâpa a châ.

Atamy liana kha ta Chakhei Tourist Lodge, Chakheitlâh liata Joint VC zy nahta anoeih ta apakyhna hneipa châ ta, Joint VC nôpawpazy ta MADC E & F Department tawhta ama hnabeiseihpazy nata EM zachhihpa tawhta tao awpa amâ hnawpazy tlôkheina chhao ama hnei pâ hra.

He apakyhna liata Puhpa HC. Biakcheuva, EM zachhihpa chata biereina chyupa hnei ta, E & F Department cha ti nata râh pha nawpa châta rai hriapa châ ta, eima chhâ asie ngâhaipa lia dei châ leipa ta hmialâ daihti, sawchhâ nawhchhâ a vaw y awpa kyhpachâna chô ta eima râh liata tihnawh nata thokhô rihkôzy pabohsa awpa nata papôhsa via lymâ awpa he â chhuah chaipazy hry liatahpa a châ tah ta, atanoh liata he hawhta ti nata râh kyh rei lâhna daihti phapa miah pie tuhpa Khazohpa hnoh ta alynabie a reih.

Sawhkhâ Department tawhta Mararâh liata kuhnie pathlapa â hno chaina cha E & F Department a châ; hriatuhpazy tiamana nata zawpi hriaparaohna vâta a châ tah ta,  Chakhei liata Mawma tlâh he Ecotourism tao awpa vaw châ ta, tobina rai ama vaw hria ti ta, originality pahlei lei awpa ta ahawna a tao.

“12th Term MADC liata Chhituhpazy he Abeipa raopa chyhsa eima châ; miah namâ tly patloh daidao cha miah deichhy awpa ta ei châ haw ei” tahpa ta Chakhei Joint VC zy hnoh ta ahawna a tao hra.

Joint VC zy apakyhna a hnei khai tawhta Chakhei tawhta Siasi pangaina lâthlôh liata Thlahchhâna O sa nawpa ta bao awpa ta KPP zy amâ hawpa cha a su tly ta, he khai tawhta Office of the Range Officer, MADC, Chakhei tly ta, Chakhei RO Office liata hriapazy hleikhô ta Chakhei Range (Chakhei, Chheihlu, Siata, Iana, Siasi, Mawhrei, Chapi) liata hriapa Officers, Staff, Forester nata Forest Guard zy ta he office tlyhmia liata vaw ydypa ta amâ vaw ly. 

He office liata programme chyupa taopa châ ta, Puhpa NT. Beithlapalo, FRO, Chakhei ta chhihtha ta, Chakhei Range hmahlana tlâhpipa report chyupa a pie. Puhpa Z. Matia, Forest Guard, Chheihlu ta pavaosana a hnei. He khai tawhta Puhpa HC. Biakcheuva, EM, Puhpa Thaly T. Azyu, CF nata Puhpa Beirôkhu Beitâ, I & PO zy ta pasyuna biereina hnei ei ta, khichhôh vâtlâh zawpi vyuhpa ta Puhpa FC. Nahlo, VCP, Chakhei-II ta biereina a hnei khai tawhta E & F Department Chakhei Range ry liata Staff lâ tawhta aokhohpa nata ama paveihpazy reina ama hnei hra. Daihti chhâna lâ liata Puhpa FC. Haisa, Forest Guard, Chakhei ta thlahchhâna hneipa ta programme khawpa châ ta, Puhpa NT. Beithlapalo, FRO nata a hrialâhpazy ta mypati pahâh kawpa amâ chhuanohpa cha aly kawpa ta dôh chyupa a châ.

Puhpa HC. Biakcheuva, EM zachhihpa ta RO office liata pasyunabie a reipa tlâhpi viapazy:-

1. Atanoh liata daihti phapa miah pie tuhpa eima Khazohpa hnoh ta alynabie reih na ta, Siaha lâ tawhta nâ kaw zi tuhpazy nata he eima programme liata a vaw hlaopa Chakhei nôpawpazy hnoh ta alynabie ei reih. 

2. Forests Department EM ei châna hawhta office ryureina dyuchhai tawhta rai hria ngâlâh padaihsa leipa na ta, ei theina hawhta eima nawhta nahzy rai hriana su he tlô lymâ ei chhuah.

3. Hrialâhpazy likah liata ahnawna y leipa ta hmia asahtuhpa châ lymâ u la, rai liata ngâchhihpa nata tiama kawpa ta eima hria awpa a châ.

4. Sawhkhâ rai he nie tluana dei châ leipa ta Khazohpa nata ei râh châta khâpa ma ei hria thei tahpa palôh liata hneina chô ta hria awpa ta ei châ haw ei.

5. Chakhei Range Office liata office administration sianô kawpa nama siekheipa ta ei pahno; nama office chhôh pathaih ta, a chheipâh chhao namâ vao pahnie tahpa mo ta eima vaw hmô. 

6. Nama office chhôh liata ahyrai mo thei awpa ta Chakhei Range Revenue Collection Board liata sôh hmôna record sianô kawpa vaw hmô pi ta, miah a palysa kaw. 

7. Chakhei Range ôna liata khi 7 ypazy liata hriatuhpa zydua, daopathla leipa ta, khisaw vâtlâh nata MADC ta a châ hnawna ei hawhta tiama kawpa ta nama vaw hria pazao lymâ awpa ta khokheina ei cha hlâ ei.

Puhpa Thaly T. Azyu, CF ta biereina chyupa ahneipa liata a bierei tlâhpi viapazy:-

1. Eima theina hawhta eima Forest range zy he mohôh lymâ eimâ chhuah. E & F Department OE zy he kho â khi lei vâta khodâh hawhta range tly nawpa sôh hnei tyh ma pi; pahluh via awpa eima peimawh kaw. Range Office-zy liata Infrastructure zy he apha kawpa eima hnei mâh leipa chhao ta apathaih kawpa ta avao lymâ ei suh u.

2. Rai hria awpa a y lei no chhao Office hours he zana chô ta office kiah ei suh u. Eima Post chyu liata y lymâ si la, Department, Awnano nata khitlâh châta hmâtlâh châ achhuahpa ta khitlâh liata hmopha tao ei si la, Awnano nata NGO liata ahmâh lymâ ei suh u. He he ta zawpi ta miah ama hrialâh laih hra aw. Eima khih chyu liata eima ypa he free nawpa châta hmâ leipa ta MADC nata eima râh tha pasana chô ta hria suh u. 

3. Eima (E & F Department mohôhpa) râh liata encroachment a y ma y lei ma tahpa moh si la, eima chô liata biehneipazy order ngâlâh hâ thlâh leipa ta eima area chyu liata hmah la chyu si la,  Uniform aky noh liata akypa he za chhih ta, discipline avao pha kawpa ta y ei suh u.

4. Chakhei range liata Revenue lana sianô kawpa record y ta a pha kaw; khihsawzy ta forest product eima la khiah Royalty chei cheingei awpa a châ tahpa zawpizy pachu hluh via ei suh u. Revenue eima hnei hluh khiah MADC hmahsiena awpa nata Mararâh hmahsiena awpa a châ.

5. Duty apha kawpa ta patlô ei suh u; niedo liata asohsi ta, apha kawpa ta O eima puasaipa hawhta adi hra ei suh u. Posting & Transfer he politics vâta châ vei; apha eima tahpazy he su peimawhpa liata eima soh tyhpa a châ. Phahnai ngiah kawpa ta eima rai chyu hria awpa ta eimâ pasyu chanei.

Puhpa HC. Biakcheuva, EM zachhihpa he a lahpinô Pihnô N. Pawngia ta kaw zi ta, Puhpa Thaly T. Azyu, CF nata a lahpinô Pihnô N. Nango ta kaw zi hra ei ta, Puhpa Beirôkhu Beitâ, I & PO, Puhpa CH. Lalhriatpuia, PA to EM, Puhpa T. Pabua, Cameraman, E & F Department staff tawhta M. Kyhpachaso, N. Beingolakhongia zy ta kaw zi ei ta, Puhpa HC. Van Hmung, Secy. MNF District HQ ta a kaw zi hra. 

Chakhei amâ ngiana daihti liata hawka liata Thopi nata Viachhâ chhao ta a vaw dy tuhpa ECM KHP Branch, Chakhei, VC Court House,  Chakhei-II liata a vaw ydy tuhpa Chakhei khih nôpawpa zydua nata Chakhei Range Office liata a vaw ydy tuhpa E & F Department ry liata hriatuhpazy hnoh ta Puhpa HC. Biakcheuva, EM zachhihpa chata alynabie reih ta, zâpati achhuanoh tuhpa Joint VC, Chakhei nata my pati achhuanoh tuhpa Puhpa NT. Beithlapalo, FRO, Chakhei zy hnoh ta alynabie a reih.

ISSUED BY:

Information & Publicity Department

Mara Autonomous District Council

Siaha.