PRESS RELEASE

NO.172/2022

SIAHA, 10 Phiapi, 2022, Pobienoh - Mara Chanô Py (MCHP) Sub Headquarters: Phura General Conference ei 6-na (2022) cha Kiasie liata tlôpa châ ta, zâhnia târi 9.11.2022 my dawh 7:00 Am pa ta Programme taopa liata Puhpa H. Malvina, Hon’ble CEM cha Khichhai laipa ta hruapa a châna hawhta programmme a hmâkhei ei.

He programme liata Puhpa H. Malvina, Hon’ble CEM chata biereina chyupa hnei ta, daihti phapa apie tuhpa Khazohpa nata Phura MCHP Sub HQ nôpawpazy hnoh ta alynabie reih ta, zawpi avypa zydua hnoh ta MCHP General Conference anaohna Samaw hlâna a hnei.

MCHP Conference hnei daihti lia he ta a vaw hlaopa zydua ta MCHP â vaw duana chhâpazy nata Aims & Objects sâ 10 ypazy my lei awpa ta memberzy pasyu ta, chanô zachhihna cha MCHP zy ta pahno thlâhna chôta O chhôh nata khitlâh hro â thaona sôpi chaipa cha chanôzy châ ei ta, MCHP nahzy ama peimawh zie reih ta; sawzy he asa thlâhthlipa châ thlâh leipa ta Awnano, khitlâh nata râh châta hmâ tlâh achâpa saw hnei thei awpa ta mohôh pha achhuah chyu awpa ta pasyu ta, “Khizaw hmahsiena ta â chakaihpa eima râh liata lâpi laipa vaw pua laih lymâ bâ ta, he hmahsiena he ta pari theipazy chhao achakaih ta, eima saw, eimâ vahpazy ta pari theipa tawhta amâ boh ma tahpa eima pachâ peimawh awpa a châ.”

“Kaladan Multi-modal Transit Transport Project lâpi apazao awpa Lômasu khih dady liata hleidy dao awpa ta tahmâ he MADC ta ground survey siekhei pathao ha ta, he hmahsiena lâpi a vaw y awpa he patlôpa a châ hlâ tawhta avaw sohsi tah, saichhielie, apachyh chhielie awpa apeimawh kaw bâ. Kaochao-Phura-Tokalo Road chhao tao chatlie awpa ta eimâ hawna hawhta tahmâ cha thlai tao bâ awpa a châ ha hra; he hawhta lâpi phapa eima vaw hnei laih bâ awpa a châ no ta chi hro pho hropazy ry liata eimâ bôh lei nawpa ta chi hro râhrozy hnoh ta eima râh leilô phapazy he zuah tlâ lei awpa ta ahaw pi ta, eimâ hrua hmeiseih.”

“Officers, râh ryureihtuhpa nata chihthatuhpazy athaona cha Nô zy nama châ; Hârâ, nôhmei nata paripanga theipa ataopazy châta nô-thlôh nô-iah châ lymâ awpa ta MCHP Member zydua cha khokhei ei na ta, ei châ haw ei” tahpa ta pasyuna bie pha kawpa a reih.

Puhpa H. Malvina, Hon’ble CEM chata Kiasie a tlôpa rypaohna chaleipa ta School sâ 3 - Kiasie Primary School, Kiasie Middle School, Kiasie Primary School - II zy tlypa ta School Building nata infrastructure hropazy a moh pâ hra.

CEM zachhihpa he a lahpinô Pihnô T. Lalnunsawmi nata a sawchapaw Jordan zy ta zi ei ta, MADC officials tawhta Puhpa Beirôkhu Beitâ, I & PO, Puhpa Syuhlo Beichakhei Mara, PS to CEM, Puhpa JF Hluchho, PA to CEM, Puhpa Lalnunfela Nk, PSO to CEM, Puhpa T. Pabua, Cameraman zy ta zi ei ta, Artistes tawhta Pihnô S. Ngodei, Ls. B. Priskili nata Ls. FC. Suna Chanô zy ta zi ei ta, MDCC tawhta Puhpa V. Beihmosai, Secretary, Puhpa KT. Vaha, Secretary nata S. Rachael zy ta ama zi.

MCHP Sub HQ: Phura General Conference he noh 8.11.2022 pa ta tlôpakipa châ ta, târi 11.11.2022 pa ta pai awpa a châ. 

ISSUED BY:

Information & Publicity Department

Mara Autonomous District Council

Siaha.