PRESS RELEASE

NO.164/2022

SIAHA, 29 Phiata, 2022, Pachynoh  – Atanoh dawh 11:30 AM pa ta DFA Playground, Siaha liata Vyhphao Sports Organising Board pachhuahpanohpa Vyhphao Sports Meet 2022 Closing Ceremony liata Puhpa H. Malvina, CEM, MADC cha khichhai laipa (chief guest) châpa ta â hmâkhei ei.

Programme he T. John Tennyson, Chairman, Vyhphao Sports Organising Board ta chhihtha ta, Puhpa Jeffrey J Khara, Moonlight Editor ta Abeipa lâ pavaosana (devotion) daihti â hmâh. T. JB. Rona, President, MSO Gen. HQ, Siaha ta Greetings daihti hnei ta, S. Beikhochhua, Secretary, Vyhphao Sports Organising Board ta report piena a hnei.

Puhpa H. Vabeitha, Chairman, Siaha District, Sports Committee nata Puhpa VT. Martin Vabeiduakhei, President, DFA, Siaha zy ta short speech pha kawpa reina ama hnei.

John Litas, Jessica Hlychho (Mara Idol) nata AZ. Zarzomawii zy ta pahnie kawpa ta hlasapa ta zawpi ama palôhpahawh.

Puhpa H. Malvina, CEM, MADC ta pasyunabie a reipa tlâhpi viapazy:

Atanoh thyutliapazy paritheipa tawhta nama khôkha thei nawpa ta he Vyhphao Sports Meet he a pachhuahpanohtuhpa MSO General Headquarters chhihtuh pha kawpa nama hneipa he vâhnei â chhih tah na ta, chhituh phapa nama hnei vâ heta thyutliapazy paritheipa tawhta namâ boh lymâ awpa ta hnabeiseihna sâhpi hnei na ta, nâmo chhaota nama chhhituhpa nama palyupalih thai ta nama cheihchalo thai kaw awpa ei châ haw khoh kaw ei.

MSO Gen. HQ chhituh pha kawpazy ta siku hawtizy parithepa tawhta namâ boh thei nawpa ta he programme laipi he ama pachhuahpanoh e tahpa he atanoh a thiehpa ta nama pahno awpa ta khoh kaw na ta, chhituh hmiatuapazy, nopaw hmiatuapazy hriapasana zawhzi ta atanoh ataopasuana su Playground pha kawpa hnei pi ta, he khôlâ lia chhaota eima hnei baichhi laih awpa ta hnabeiseih sih la. Thyutliapazy ta he Playground eima hnei tlakaihpa he pasô ta hmâh thai kaw ta, a phahnainazie ta hmâh ta, paritheipa khôkhâh ta, Sports lâ ta hmahsiena châta eima hmâh awpa ta ei cha hrua ei.

Nama thyutlia noh daihti lia heta nama nôchâ hrozie he namâ sohsi kaw awpa he peimawh ngaita ta, thotlâh khih tawhta Siaha pangaipa ta châ chu awpa ta y ei chi ta, palôh hmeiseihpa ta tiama kawna chôta, hlaotloh ta pitloh cheingei achhuahpa ta namâ chu awpa he a peimawh ngai ta. Thokha nama sia kaw nota thokhazy deikua cha ypha khoh leipa ta nôpaw palôhru rie patheipazy ama y. Azo dawh 7 - 8 rachhôh heta chhôhkha lâ hmo buabâkhei awpa ta pua na ta, thyutlia thokhazy cha khiliah lia mobile hriahrâ ta daihti hmâhpa ama y hôlô. Achuna papeimawhsa leipa ta he hawhta daihti hmâh thlâh hapazy he a vaw pha lei kaw. Cha hawhta a ypa nama hry liata nama y pathleipa a châ khiahta la nama pathleih awpa ta ei châ haw ei.

Thokha siku hawtizy o tawhta a daihti ta liata pua ta Night Hostel pangai awpa ta pua ei ta, anolei lâ tleipa ta khih ama padei thlâh tyh. Nama hry liata cha hawhta a ypa nama y pathlei khiahta la nama pathleih awpa ta ei châ haw ei.

Paritheipa nama khôkhâh thei nawpa ta achuna nata Sports nama vaw pahâh lymâ awpa ta ei châ haw ei. Atahmâ ta thyutliazy ei chi he mylâ hânoh Mararâh apahniehna na nama châ e tahpa he ei cha chhoh khoh kaw ei. Atahmâ ta râh nôpawpazy nata Officer-zy he ama châna ualuapa liata y ngâthlâh leipaw ei ta, nâmozy he a kaw thlatuh awpazy nama châ tahpa he nama pahno awpa a byuh. Chavâta, palôh hnei kawpa ta achuna liata tiama nama papua awpa ta ei châ haw ei.

Khizaw athaipazy ta ama patlâh thei leipa AIDS, HIV zy he paritheipazy tawhta achakaihpa na a châ e tahpa he nama pahno awpa a byuh. He tawhta eimâ boh thei nawpa ta cha paritheipa nama tao rai rai lei awpa ta ei châ haw ei. A vaw tao tlamaw hapa nama y khiah nama pathleih para awpa ta ei châ haw ei.

Ei châ ly kaw ei. 

Puhpa H. Malvina, CEM, MADC he Official lâ tawhta Puhpa Syuhlo Beichakhei Mara, PS to CEM,  Puhpa Pawsa Lava, AITO nata  Puhpa T. Pabua, Cameraman zy ta ama chakaochahlâh.

Beirachhitha Bohia, Assistant General Secretary, MSO Gen. HQ, Siaha ta vote of thanks reina a hnei khai tawhta Puhpa H. Malvina, CEM, MADC lahpinô Pihnô T. Lalnunsawmi (Jordan Nô) ta thlahchhâna ta daihti a pachhâsa.

ISSUED BY:

Information & Publicity Department

Mara Autonomous District Council

Siaha.