PRESS RELEASE

NO.74/2022

SIAHA, 4 Khihpa 2022, Hriatuanoh - Atanoh dawh 12:00 Noon khata Siaha DFA Playground, Meisatlâh liata Siaha District Football Association (SDFA) pachhuahpanohpa SDFA Cup 2022 Kick Off Programme cha Khichhailaipa (Chief Guest) Puhpa H. Malvina, Chief Executive Member(CEM), Mara Autonomous District Council (MADC) ta hmâkhei ei ta, Tournament a pahy.

Pahyna Programme he Puhpa VT. Martin Vabeiduakhei, President, SDFA ta chhihtha ta, Puhpa J. Kholai, Exe. Member, SDFA ta devotion hmâh ta, Puhpa F. Vanlalmuanpuia, Honorary Secretary, SDFA ta welcome speech reina hnei ta, Puhpa Khusa Khaila, Joint Secretary, SDFA ta football team captain nata football player zy hnohta bietaina (oath taking) a pahneisa ei. Laihsa Emilia Byhnadisô nata Satlia John Litas zy ta pahnie kawpa ta hlasapa ta zawpi ama palôhpahawh.

Laihsa T. Cassidy (Cindy), Treasurer, SDFA ta SDFA vyuhpa ta ryuchâ (citation) Khichhai laipa Puhpa H. Malvina, CEM, MADC hnohta a hlâ. Puhpa H. Malvina, CEM, MADC chhaota Puhpa VT. Martin Vabeiduakhei, President, SDFA hnohta sôh a hlâ pâ hra.

Puhpa H. Malvina, CEM, MADC ta biereina chyupa hnei ta, a ry liata palâsapa he a bierei tlâhpi viapazy a châ:-

“Ahmiatua ta atanoh noh phapa nata hnatlâna phapa zy miah pie ta, he su miah tlôkheituhpa Khazohpa moh cha reithaipa ta y mawh sy. SDFA Cup 2022 akhaih n'awpa liata khichhai laipa (Chief Guest) châ awpa ta nama saiheinazy vaw dao na ta, aly kaw na ta, keima mo pakhapa chhao he Sports lâta pahâh kawpa ei châna zawhzi ta a pahchaipa ta a vaw ly via heih na ta, atanoh ta nâ palysa via rili heihpa hmo sâkha cha eima za tlô pataw nahta Puhpa VT. Martin Vabeiduakhei, President, SDFA ta eina vaw pahmôpa cha Playground thiehpa eima hneipa nata achievement rônah kawpa - chanô lâ chhao chapaw lâ chhao players pha kawpa vaw hnei pi ta, ISL Team liata Hyderabad liata try ngâ kawpazy chanô under 23 national team liata try ngâ kawpa zy vaw hnei pi ta, a rônah hmeiseihpa ta pahno na ta, he hlâ chhao ta thyutliapazy a hluh via ta ISL Team liata zy under 23 national team liata zy angia awpa namâ chhuah via lymâ awpa ta ei châ haw khoh ei.”

“He Playground eima hneichhôhpa he chado thai ta a hmâh dâh thaipa ta, he eima hneichhôhpa tawhta hlaotlohna hnei awpa ta atanoh ta tournament ngâlâh a daih leipa sala, hmialâ eima sie laih lymâ nawpa liata state level lia chhao national level lia chhao player phapa pua namâ chhuah via lymâ awpa ta ei châ haw ei.”

“Eima râh nôpaw chhao ta thyutliapazy châta Sports lâchhâh lia heta ama palôh amâ pahy ngâsâna tahpa he reih khoh na ta, atahmâ sawhkhâ thiehpa lia chhaota nama hyutuhpazy ahawna zawhzi ta Siaha DFA zy ahawnapa pachâ peimawhpa ta High Level Tournament pachhuahpanoh awpa khoh pi ta, MADC Golden Jubilee kôzy vaw châ ta, Golden Jubilee Cup zy pachhuahpanohpa khoh pi ta, thyutliapazy châta Football Academy zy chhao he pachâna hmâh ngâhaipa châ ta, siku hawti ta siku bâ khai tawhta hmo pha leipazy ama tao lei nawpa ta Football Academy zy pachâpa châ sala tahpa eima nôpawzy ta ama pachâ ngâhaipa a châ.”

“Eima district chhôh lia heta thyutlia thokhazy châ achu hoh khao leipa nata sports lâta guide tuhpa hnei leipa hluhpi y ei ta, cha nahzy châ chhaota eima nôpawzy chhaota hmahla achhuah haipa hnei ei ta, building zy chhao hostel y nawpa, Football Academy y nawpa project zy ama buakhei haina tahpa nama hry lia ei reih khoh kawpa a châ.”

“Atliata lia khata Mizoram State AIDS Control Society (MSACS) liata ahriapazy ta ei room liata na vaw charei ei ta, Siaha District chhôh liata thyutliapazy paritheipa sahma dopa lia zy thohna ataopa liazy heta papangawh (5) ama test pa liata pathôh (3) Hepatitis a veipa ama hmô lymâ cha maw. Cha dei châ leipa ta HIV heta thata eima râh miah a ngiahnao ta, cha hnaihta paritheipa tawhta asohsi kawpa ta nama y awpa ei châ haw ei. Paritheipa tawhta namâ boh awpa a byuh. Chanô chapaw liata namâ sohsi awpa a byuh.”

Atanoh SDFA Cup a vaw hlaopa zydua paritheipa tawhta asohsi u la, paôpazypazy etc. tawhta nama khôkhâh awpa a byuh. Paritheipa hria rai rai leipa ta nama y awpa a byuh. Pha kawpa ta hro hmâh tah, Sports nama pahâh awpa ta ei châ haw ei.”

“Achhâ chaina liata eima theina rakha ta Sports liata thyutliapazy châta hmah eima cha lakhei lymâ aw tahpa ei cha chho khoh ei. Ei châ ly kaw ei.”

Puhpa H. Malvina, CEM, MADC he Official lâ tawhta Puhpa J.H. Beihnai, Sports & Youth Officer, MADC, Puhpa Syuhlo Beichakhei Mara, PS to CEM, MADC, Puhpa Pawsa Lava, AITO nata Puhpa K. Nehemia, Cameraman, I&PD zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.