PRESS RELEASE

NO.158/2022

SIAHA, 24 Phiata, 2022, Hriatuanoh  – Atazâ dawh 6:30 PM pa ta DRDA Conference Hall, Siaha Vaihpi liata Rev. Reginald Arthur Lorrain Documentary Film Lakher Pioneer Mission's Missionary Documentary Board pachhuahpanohpa cha Puhpa H. Malvina, CEM MADC ta palâhâhna programme â hmâkhei ei.

Programme he S. Linda nata MC. Beichônôchai ta chhihtha ei ta, TT. Jacob, Secretary ta welcome speech reina a hnei. Rev. VL Ngaia Hlychho, Senior Secretary, ECM HQ, Siaha ta devotion  daihti â hmâh. FC. Minela, Director ta report piena hnei ta, Z. Beibiekhai nata C. Lalramhlunmawii zy ta  pahnie kawpa ta hlasapa ta zawpi ama palôhpahawh. Rev. AZ. Beirôna, GS, CCI(M), ECM HQ ta short speech pha kawpa reina a hnei.

LD. Vabeihruasa, chairman ta memento raina hnei ta, Rev. Violet Louise Annie Mark ta film palâhâhna a hnei.

Puhpa H. Malvina, CEM, MADC ta pasyunabie a reipa tlâhpi viapazy:

A hmiatua ta daihti phapa maniah pietuhpa eima Khazohpa hnohta alynabie reih na ta, Rev. R.A. Lorrain Documentary Film Release na liata bietana chyupa reih awpa ta sai nâ heituhpa The Lakher Pioneer Mission’s Missionary Documentary Board hnoh chhaota alynabie ei reih.

Khazohpa ta Reginald Arthur Lorrain khopasana hlao patlohpa ta Kô 1905 pa khata Lakher Pioneer Mission he London khihpi liata paduapa a châ. He daihti no ta Lôlei liata Baptist Missionary Rev. JH Lorrain cha a uhta a châ.

Mararâh liata chakaona raihria awpa ta Awnanopa liazy ta a hiana zydua a hlaotloh lei tawh chhao ta hnabeidy leipa ta Khazohpa ta a tuana râh lâ kaw pangaipa R.A. Lorrain he James Lorrain sawpachapaw pa 5 (papangawh) hry liata a seihnai chaipa a châ.

Rev. R.A Lorrain nata a viasanô Pihnô Maud Louise Ulander Lorrain cha Khazohpa ta a tuana râh pangaipa ta târi 18 January 1907 pa khata London khihpi puasaipa ta amâ kaw thao. Rairuna hluhpi chatôh papuapa ta târi 25 September 1907 pa khata Marapa khih amâ kaw ngia tua chaipa cha Paitha a châ. Chatanachata amâ chhuahna su Saikao khih cha târi 26 September 1907 pa khata a tlâh kawpa ta kaw tlôpa ama châ.

Rev. R.A Lorrain ta Thâtihpha bie a rei hmiatua chaipa cha Saikao Beipa tlyhmia liata Saikao Beinô  hnoh ta “Hy chanô, thyu la, khaih teh. Na khaihna cha a vaw tlô haw. Zehôvah rônah na chô liata a vaw khaih haw.” tahpa Isaiah 60:1 a châ.

Rev. R.A Lorrain nah Nôvah cha ama chakaonazy pazao lymâpa ta Mara Alphabet dei châ leipa ta târi 18 March 1908 khata Siku thlai maniah paduapa ei ta, Bible nata Hlabu zy chhao Mara reih tlai ta palie lymâpa ta Kô 1910 pa liata cha Hlabu chhao eima vaw hnei thei haw.

Cha tlupo ta ama chakaona liata ama hriapasa tawhna chhao chata kô 1915 liana khata chyhsa pa 7 (pasari) deita ta Krizyhpa ama vaw châ chy; Marapazy pi he chyhsa kuhchha kawpa eima vaw châ.

Châhrasala eima Beipa Zisu Krista cha maniah pachhatuhpa, Khazohpa dopa a châzie vaw pahnopasia pi ta, kô 1926 rachhôh tawhna khata cha Marapa zydua cha Krizyhpa eima vaw châ khai haw.

Biehrai thiehpa chhao Kô 1927 khata Mara reih ta palie khaipa châ ta, Holy Bible pôhpalôhpa chhao cha Mawrâh liata eima reih tlai ta Bible palie khai tua chaipa, hnei tua chaipa châpa ta Kô 1956 khata Mara reih tlai ta eima vaw hnei ha hra. Abeipa ta Rev. R.A Lorrain nata Nôvahzy chakaona byhnâ a piepa zydua he Marapazy châta my thei rimâ awpa châ ma pi, a rônah ngaita.

Atanoh he Rev. R.A Lorrain nata a chhôhkhazy; Rev. Albert Bruce Lorrain Foxall nah Nôvah, Pihnô Vaili nata chhôhkhazy hleikhô ta; Rev. R.A Lorrain chakaona deichhy awpa ta eima râh kaw tlô hrapazy;  Ms.Gladys Ramsey, Ms. Irene E. Hadley, Ms. Gladys E. Gorst, Mr. John Yelle Mark, Mr.Jelly nata a sawnahzy he eima my lei awpa nata alynabie eima hlâ ngathlâh ha awpazy ama châpa ta ei pahno.

Rev. R.A.Lorrain he chyhsa riahphapa nata ngâchhihpa châ ta, Assam Governor Sir. Robert Reid ta Kô 1937 khata Mararâh liata a hmotao phana vâta Coronation Medal lymâ chhao a vaw hlâ phapa a châ.

Atanoh ta daihti rônah ngaitapa eimâ hmȃh theina chhȃpazy he eima pachȃpasia awpa a pha kawpa ta ei pahno; eima my thei lei awpa hluhpi a y.

Abeipa ta Missionary Rev.R.A Lorrain nata a chhôhkhazy maniah kaw tuapa ta thâtihpha ta maniah pakhaihsa ta, byhnâ hluhpi a daopa eima châ. Khazohpa baona ta Mararâh nôpaw hmiatuapazy hmahlana nata hriapasana zydua chhao my thei rimâ awpa châ ma pi. Eima Missionary nahzy deichhyna nata pasopakâna vâta Mara Beizy siepahliepa ta ryureina eihrâhpa hnei awpa ta vaw hiah ei ta, cha zawhzi ta atanoh, he duahmo liata a vaw duah theipa eima châ. A rônah ngaita.

Lakher Pioneer Mission zawhzi ta Mararah byhnâ eima topa zydua pachâpa ta he Documentary Film he pasô tlâh a châ kawpa ta pahno na ta, a pachhuahpanohtupazy amâ piepasana he a rônah ei tah ngaita.

Film Industry zy heta zawpi hnohta thâtih phapa nata peimawhpazy tlôkhei tyh ei ta, sawhkhâ nata zawpi likah liata lyuhchâna rai ama hria tyh hra. Chyhsa hluhpi pachâdâh nata palôhrupazy chhao taopathi thei ei ta, ama panano thei ngaita hrapa a châ. Chavâta eima râh liata Journalist nahzy dei châ   leipa ta Film Industry pitlohpazy chhao eima hnei awpa peimawh ngaita ta, eima chi nata pho Culture nata Tradition chi nano nanopa taozie cheihchalo theituhpa nata pabohsatuhpa chhao a châ.

Marapa sawzy palôhrupa cheihchalo thei ei ta, nô nata pawzy pachâna tha a padâh theituhpa nata hmahsiena a tlôkhei theituhpazy ama châ hra. Thyutliapazy hrozie chhihthana nata deichhyna lia chhaota a peimawh ngaita. Chavâta Film Industry pitlohpazy eima hnei awpa he peimawh ta, khitlâh hro liata hmophapa nata hmopha leipa tlôkhei theituhpa nata taopathina chakaona rai peimawh ngaitapa a hria theituhpa a châ.

He “The Lakher Pioneer Mission’s Missionary” documentary film heta eima Missionary, Rev. RA Lorrain nata chhôhkhazy chakaona vâta Khazohpa byhnâ eima topa zydua maniah a chhopasia kaw awpa ta hnabeiseih na ta, eima pachâpasia awpa nata achu awpa hluhpi chhao maniah a pahnosa awpa ta khâ ei hnabeiseih.

He Documentary Film pachhuahpanohna kyh liata kyh nano nanopa liata chakaona rai a hriatuhpa zydua hnohta palôh hmeiseihpa ta châ ly ei na ta, Abeipa ta byhnâ hluhpi a cha baichhi awpa ei ta khokheina sâh chaipa ei cha hlâ ei.

Ei châ ly kaw ei. 

Puhpa H. Malvina, CEM, MADC he Official lâ tawhta Puhpa Syuhlo Beichakhei Mara, PS to CEM, Puhpa Pawsa Lava, AITO nata Puhpa K. Nehemia, Cameraman zy ta ama chakaochahlâh.

Femina Hlychho, Treasurer ta vote of thanks reina a hnei khai tawhta Rev. T. Salaw, Moderator, ECM HQ, Siaha ta thlahchhâna ta daihti a pachhâsa. Programme chhâ tawhta zawpi ta he Documentary film he big screen ta moh pazaopa a châ.

ISSUED BY:

Information & Publicity Department

Mara Autonomous District Council

Siaha.