PRESS RELEASE

NO.154/2022

SIAHA, 19 Phiata, 2022, Pakhynoh  –  Atanoh dawh 11:30 AM pa ta Forest Conference Hall, MADC, Siaha liata Environment & Forest Department, MADC, Siaha pachhuahpanohpa One Day Forest Field Staff Building Capacity Training cha Puhpa H. Malvina, Chief Executive Member, MADC, Siaha ta â hmâkhei ei.

Programme he Laisangi Nôtlia ta chhihtha ta, Rev. Beipisa Miehlo, ECM Siaha biatuhpa ta devotion daihti hmâh ta, Puhpa Thaly T. Azyu, CF, MADC ta welcome address reina a hnei khai tawhta introduction piena hnei ta, cha khai tawhta Power Point Presentation daihti â hmâ pâ heih hra.

Puhpa HC. Biakcheuva, EM (Forest), MADC ta speech pha kawpa reina hnei ta, Puhpa VT. Beihrothie, Secretary, FSA ta short speech reina a hnei hra. Pihnô S. Siamkungi ta  pahnie kawpa ta hlasapa ta zawpi a palôhpahawh.

Puhpa H. Malvina, CEM, MADC ta pasyunabie a reipa tlâhpi viapazy:

Forest Staff zy châta he Training peimawh kawpa ahmâh thei awpa ta daihti phapa maniah pietuhpa eima Khazohpa hnohta alynabie reih na ta, Puhpa HC. Biakcheuva, Executive Member i/c Forest Dept. zachhihpa, he programme pachhuahpanohtuhpa Forest Department, MADC nata ahriatuhpa zydua hnoh chhaota alynabie ei cha hlâ ei.

Department of Environment & Forest, MADC he eima râh châta department peimawh ngaitapa châ ta, eima ti nata râh leilô amohôhtuh chaipa department a châpa vâta ahriatuhpazy chhao tiama ngaita kaw ei chi ta, MADC sawhkhâ palyupalihtuh chaipa chhao nama châpa ta pahno na ta, alynabie ei cha hlâ chanei ei.

Marapa chyhsa pi he lyu a taopa, râhmâhpa tawhta eima peimawhpa torai ala tyhpa, O sana nata niebaw tluana kyh lia chhao ta râhsa nata râhmâhpa liata khâ apahnieh tyhpa eima châpa vâta Forest Department chakaona he hmo rainao kawpa châ vei tahpa he a sia kawpa ta pahno chyu pi ta, eima hriaparaoh chyu awpa deikua a peimawh kawpa ta ei pahno. Cha hai nota Mara sawzy pi he eima manô mapaw tawhta râh pakâ awpa chi ngaita kawpa, lyu rao awpa no chhao ta, asohsi ngaita kawpa eima châ. Khizaw a vaw sosâh lymâ ta, lyu tao leipa ta nie tluapazy chhao eima hluh ngaita kaw bâ.

Râhmâhpa nata râhsa pabohsa awpa ta cha amohôhtuhpa department nata chyhsa a pahrâpazy eima hrialâhna a pha awpa peimawh ngaita ta, ti nata râh a hneituhpa chyhsa palôhrupa liata pabohsa khohna hmeiseih a y tua awpa a peimawh hra. Pakhâna bie nata pacheisapa dei heta eima ti nata râh pabohsa awpa a rairu ngaitapa vâta, chyhsa palôhrupa eima pahnie tua awpa a peimawh ngaita.     

Lyu nata sahdôzy rao daihti liata riethei ngaitapa ta sahdô liata chi eima cheipazy, râhmâhpa eima pabohsa ngâhaipa zy, râhsa nata hmohrohhneipa eima pasô ngaitapazy â boh thei na awpa ta eimâ sohsi chyu awpa nata thata eimâ pachu awpa a peimawh.

Eima ti nata râh pabohsa awpa he sawhkhâ nata khitlâh nôpawpazy dei maophaohna châ leipa ta, eima zydua hria paraohna nata maophaohna a châ. 

Forest Department Staff zy he a hluh via cha eima ti nata râh châta Siaha khihpi khôtho lâta a ypazy châ ei ta, ama yna su nochâ liata ti nata râh châta chakaona rai peimawh kawpa a hriapa ama châpa vâta kyhto liata amopâtlâh châpa ama châ awpa he a peimawh ngaita. Cha cha Forest Department, MADC mohphana dei châ leipa ta khitlâh nata Mararâh châ chhao a peimawh kawpa a châ. 

Forest Staff zy cha khitlâh nôpawpazy hriaparaoh thai ta, sawhkhâ scheme nata policy zy hlao a tloh thei na awpa ta sawhkhâ vyuhta aduah lymâ awpa ama châ.

Atanoh he training programme peimawh ngaitapa department of Environment & Forest Dept. MADC ta a daihti ta liata nama vaw pachhuahpanoh theipa he a rônah tah hmeiseih na ta, he heta Staff nata zawpi hriaparaohna phapa, novâhna nata deichhyna liata tha maniah patlô chyu awpa ta hnabeiseihna ei hnei. Atanoh he liata training avypa zydua athôhkhei chyu awpa ta khokheina sâh chaipa ei cha hlâ ei. 

Ei châ ly kaw ei. 

Puhpa S. Sikô, UDC, E&F Dept., MADC ta vote of thanks reina a hnei khai tawhta Bei Zisu thlahchhâna miah pachupa reihparaohpa ta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.