PRESS RELEASE

NO.161/2022

SIAHA, 27 Phiata, 2022, Pobiehnoh  – Atanoh dawh 12:00 Noon pa ta Forest Hall, MADC, Siaha liata Sports & Youth Department, MADC pachhuahpanohpa Beinô Football Academy pahyna nata ISPL Player-zy thopi dokheina programme liata Puhpa H. Malvina, CEM, MADC cha khichhai laipa (chief guest) châpa ta â hmâkhei ei.

Programme he Puhpa JH. Beihnai, Sports & Youth Officer ta chhihtha ta, Puhpa BM. Khaimeichhô, Dy. Secretary, MADC ta Abeipa lâ pavaosana (devotion) daihti â hmâh. B. Vabeichakao, Coach (Beinô Football Academy) MADC ta introduction & report piena hnei ta, Puhpa VT. Martin Vabeiduakhei, Manager, ISPL MADC team chhaota report piena a hnei hra. 

Puhpa John Beizachhi Phuto ta  pahnie kawpa ta hlasapa ta zawpi a palôhpahawh.

Puhpa K. Chhihrau, Executive Secretary, MADC chhaota pasyunabie pha kawpa reina a hnei hra.

Puhpa H. Malvina, CEM, MADC ta pasyunabie a reipa tlâhpi viapazy:

Thyutlia (thyudyu) daihti lia heta nama daihti ruapa nama hmâh thai kaw awpa he a za peimawh ngaita. Nama daihti ruapa (free time) liata Sports (Football, etc) practice nawpazy ta nama daihti nama hmâh tyh awpa ta ei châ haw ei. 

Sports lia chhao, Sôhpaliena, etc a kheihawhpa lia rai ta hlaotlohpazy he ama thâtih eimâ zâ chupasia nahta, palôh hnei kawpa nata tiama kawpa ta vaw hriapasa kawpazy ama châ tyh. Chavâta, atahmâ tawh heta palôh hnei kawpa nata palôh zydua pie khaipa ta tiama kawpa ta hlaotloh cheingei achhuah awpa ta, nama hmotaona lia maihta tiama nama papua awpa ta ei châ haw ei. 

Khizaw liata Footballer hlaotloh kawpa nata alâluah kawpa Pele, Maradona, etc zy he râh riethei kawpa nata football ama practice tyh daihti lia chhaota Field (football akhaihna playground) hmahta pha lei kawpa tawhta kaw practice hualua laihpa châ ei ta, palôh hmeiseipa nata tiama kawna chôta ama tao hualua vâta a kaw hlaotlohpazy ama châ. Chavâta, field hnei pha ma pi, facility hnei pha ma pi tahpa cha excuse tao ngâ kaw hlei veih ei.

Sports liata hlaotloh awpa heta Pa-ôpazypa zy, drugs, Sahma, Châhnamei, Khaini, Sâdâ, etc tao lei awpa, a vaw tao hapa nama y pathlei hapa chhaota nama pathleih cheingei awpa ta ei châ haw ei.

Atahmâ stage he nâmo châta stage peimawh chaipa châ ta, atahmâ ta nama daihti namâ hmâhpha khiah nama future châta hlaotlohna nama kaw hnei nawpa châ ta, atahmâ ta nama daihti (stage) he nama hmâh thai vei khiahta la, hlaotloh leina lâ ta cha pangaikheituhpa a châ aw.

A pachaipa ta, Football lâ ta a pahâhpa nama châ khiahta la, nama coach zy rei namâ ngiah kaw awpa a byuh. Sports & Youth Department, MADC ta Beinô Football Academy ama paduapa he nama hmâh phahnai kaw awpa byuh ta, hlaotlohna to cheingei awpa ta tiama kawpa nata palôh zydua pie khaina chôta hmia nama tôh lymâ awpa ta khokheina sâh chaipa ei cha hlâ ei.

Ei châ ly kaw ei. 

Puhpa ST. Vanmalsawmliana, EM (Sports) chhaota atanoh ta he programme hlaotloh kawpa ta ahmâh theipa a châna chhâpa cha Sports & Youth Department hriaparaohna phapa vâ deita a châzie reih ta, ama chô lâ liata alynabie a reih pâ hra.

Thyutliazy hro paraotuh chaipa cha paritheipa taopa he châ ta, chavâta, thyutliazy ta paritheipa drugs, sahma, châhnamei, etc nama pathleih khai awpa ei châ haw ei tahpa ta a reih.

Atahmâ he nâmo thyutliapazy châta hmahsiena â thaona châ ta nama daihti nama hmâh thai kaw awpa he a peimawh ngaita kaw.  Kei chhao Sports (EM) ei châna hawhta ei theina rakha ta thyutliapazy hmahsie thei nawpa ta tiama papua via lymâ ei vaw chhuah hra aw tahpa ta pasyunabie pha kawpa a reih.

Puhpa H. Malvina, CEM , MADC he Official lâ tawhta Puhpa TT. Kholaw, RTO, MADC, Pihnô S. Lalmuanpuii, DS&CA, Dr. Beizakaw Vyhtuchho, Veterinary Officer, Pawsa Lava, AITO nata  Puhpa K. Nehemia, Cameraman zy ta ama chakaochahlâh.

Puhpa JH. Beihnai, Sports & Youth Officer, MADC ta vote of thanks reina a hnei khai tawhta Bei Zisu thlahchhâna miah pachuhpa reihparaohpa ta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.