PRESS RELEASE

NO.46/2022

SIAHA, 31 Patô, 2022, Hriaheinoh – Atanoh my dawh 10:30 Am pa ta MADC Session Hall liata 12th Term MADC CEM Puhpa H. Malvina sawhkhâna pasiana “Vote of Confidence” hneipa châ ta, Puhpa H. Malvina cha pahniena a to.

Daihti pathaona liata Chairman ta Biehrai Pathaipa Hlazy 100:3 reina a hnei khai tawhta Puhpa C. Chehnei, Chapi biatuhpa MDC ta pavaosana thlahchhâ a hnei.

He CEM, MADC pasiana he Puhpa N. Viakhu, Chairman, MADC ta chhihtha ta, Puhpa H. Malvina chhihthapa sawhkhâna pasia awpa a châ vâta Chairman ta opposition lâ tawhta ruling zy ta sawhkhâna ama tao thei awpa lâ ta bie reina hnei awpa daihti a pahypa liata Puhpa M. Laikaw, Opposition leader nata Puhpa K. Hrahmo zy ta biereina hnei ei ta, ruling lâ tawhta Puhpa HC. Lalmalsawma Zasai nata Puhpa H. Hrangchuanga zy ta sawhkhâna thapatlônazie ta bie ama reih hra.

Puhpa H. Malvina chata House liata a chhihtha awpa Sawhkhâna cha zawpi sawkhâna dopa a châ awpazie reih ta, member zy lâ ta deichhyna â haw khai tawhta bâh chaluahpa ta pasiana hnei pazipa a châ.

Sawhkhâ support lâ ta member 12 ta vote pie ei ta, support leina lâ ta vote 12 ama pie hra. CCB Rules ta biehneipa a piepa hawhta Chairman Puhpa N. Viakhu chata Casting vote hmâpa ta Puhpa H. Malvina sawhkhâna cha a support-zie nata pahniena a to tahpa phuah pazi ta, he khai tawhta Puhpa H. Malvina chata alynabie reina daihti a hmâh.

Puhpa N. Viakhu, Chairman chata Deputy Chairman atly nawpa ta nomination file theina daihti châta târi 1.6.2022, dawh 10:30 Am tawhta pahypa châ aw ta, târi 2.6.2022, dawh 10:30 Am liata Deputy Chairman atlyna a y awpa tahpa pahnosana tao ta, dawh 11:30 Am liata session he pachhâsapa a châ.

ISSUED BY:-

Information & Publicity Department

Mara Autonomous District Council

Siaha.