PRESS RELEASE

NO.10/2023

SIAHA, 18 Nawh, 2023, Pakhynoh - Atamy dawh 10:15 Am pa ta Dy. Chairman, MADC thiehpa Puhpa C. Chehnei, Chapi biatuhpa ta ano a pahrâ nawpa office châta raopa Dy. Chairman room, MADC Main Complex liatahpa cha Khazohpa lâ pavaosana thlahchhâna programme a hmâh.

He thlahchhâna programme daihti thaona liata Puhpa C. Chehnei, Dy. Chairman chata biereina chyupa hnei ta, atamy daihti acha-ie kawpa liata thlahchhâna programme avaw hlao theipa Legislative Department liata officer nata staff zy, hrua-eihpa officer thokhazy, Satlia Delson Nôtlia, National Secretary of Bharatiya Janata Party, Minority Morcha zy hnoh ta alynabie reih ta, a eih pachaipa ta Thlahchhâna nata byhnâ a awpa tuhpa Rev. K. Beisa hnoh ta alynabie a reih.

He liata ahlaopazy hnohta deichhy awpa nata pasopakâ lymâ awpa ta ahawna tao ta, abyuhna lia maihta hrialâh phapa châ lymâ awpa ta officers & staff zy hnoh ta ahawna a tao.

He khai tawhta Rev. K. Beisa chata Ryhpachaneina 15:4-5 nata Ryhpachaneina 32:8 tawhta Khazohpa Biehrai Pathaihpa reipapuana nata reipakawhna hnei ta, Khazohpa ta Mara Missionary-zy hmâpa ta lyuri bâkhâh miah a taopapa Mararâh he vaih tah pabohsa awpa ta Marasawzy eima maophaohna châ ta, he kyh liata râh luhpazy deichhy tah, apha kawpa ta rai ama hria thei nawpa ta zawpizy chhao eima peimawh tahpa reih ta, Mawsi chôchahrei cha Khazohpa bie a châ, keimo eima chochahrei awpa cha Khazohpa bie he a châ; nôpaw, anoeih tlaita sathaw thupa MADC nôpawpa a châna hawhta adona & ngâchhihna lâpi achhih lymâ awpa ta Puhpa C. Chehnei hnoh ta pasyuna bie pha kawpa reih ta, he khai tawhta thlahchhâna nata byhnâ awna ta thlahchhâna daihti he pachhâsapa a châ.

ISSUED BY:

Information & Publicity Department

Mara Autonomous District Council

Siaha.