PRESS RELEASE

NO.151/2023

SIAHA, 18 Di, 2023, Hriatuanoh - Atanoh dawh 11:00 AM pa ta Siaha District Volleyball Association (SDVA) pachhuahpanohpa MADC Chairman Trophy Programme cha Siaha District Volleyball Court New Siaha East - II liata â hmâhpa châ ta, he Volleyball Tournament programme lia heta Puhpa C. Chehnei, Deputy Chairman, MADC cha khichhai laipa (chief guest) châpa ta â hmâkhei ei.

Programme he Reuben Hlychho, Vice President, Siaha District Volleyball Association ta chhihtha ta, Puhpa PC. Lalhmingthanga, Sr. Vice SDVA ta Abeipa lâ pavaosana thlahchhâna nata technical report piena a hnei.

Puhpa C. Chehnei, Deputy Chairman, MADC chata, "khizaw liata Sports liata alâluapazy he râh hmahsie viapa zy, a tiamapazy châ ei ta, Sports liata alâluapazy heta ama râh ama cheihchalo kaw tyh. Cha hnaihta, atanoh he su liata avypazy tiama kawpa nata palôh hnei kawpa ta akhaih u la, Mararâh cheihchalotuhpa châ namâ chhuah chyu awpa ta ei châ haw ei," tahpa ta a reih.

"Râh châta hmâhtlâh châ achhuahpa ta tiamapa ta namâ chuna lia chhao tiama kawpa ta achu u la, Mararâh ta namo thyutliapazy ei chi he hnabeiseihna laipi cha hnei pi ta, nâmo thyutliapazy ei chi he chhôhkha, khihtlâh nata Mararâh ta eima châ pahniehna nama châpa he a thiehpa ta nama pahno chanei heih awpa he aza peimawh ngaita kaw," tahpa ta khichhai laipa ta a reih.

"Self-discipline hneipa he peimawh kaw ta, self-discipline nama hnei vei khiah nama hlaotloh thai vei. Chyhsa self-discipline a hnei phapa maih he chyhsa hlaotlohpa ama châ tyh. Chavâta, paritheipazy arâsai ta hmopha leipa rai tao leipa ta self-discipline hnei pha kawna chôta hmahsie achhuah lymâna chôta hmia nama tôh lymâ awpa ta ei châ haw ei," tahpa ta Deputy Chairman ta a pasyu ei.

"Thyutlia thokhazy talent hnei pha kaw ei ta, châhrasala, paritheipa ama tao vâta hmâhtlâh a châ khao leipa hluhpi y ei ta, cha hnaihta, nama viasa paritheipa a taopazy ama tao khao lei n'awpa ta sports nama taona lâzy achhi u la, pathleihsa namâ chhuah chyu awpa ta ei châ haw ei," tahpa ta khichhai laipa ta ahawna a tao.

Deputy chairman chata, Kristmas nata Kôthiehpa a pha kawpa ta ahmâh chyu awpa ta khokheina a hlâ chyu ei.

He Volleyball tournament liata akhaih awpa lia heta chapaw he teams 9 y ei ta, chanô he teams 8 ama y.

Puhpa C. Chehnei, Deputy Chairman, MADC heta sôh nata Volleyball SDVA zy hnohta a hlâ (pie) pa hra ei.

Puhpa C. Chehnei, Deputy Chairman, MADC he Official lâ tawhta Puhpa Pawsa Lava, AITO, Puhpa AZ. Hnaute, PA to Deputy Chairman, MADC nata Puhpa T. Pabua, Cameraman zy ta ama chakaochahlâh.

Puhpa F. Remlalnghaka, General Secretary, SDVA ta vote of thanks reina a hnei khai tawhta programme pachhâsapa a châ.

ISSUED BY

Information & Publicity Department

Mara Autonomous District Council

Siaha.