PRESS RELEASE 

NO. 28/2026

SIAHA, târi 31 Pamih, 2026(Hriaheinoh) - Atanoh dawh 11:00 Am khata Mizoram Maxi Cab Owner's Association, Siaha District zy ta MYA Multipurpose Hall, New Siaha liata Assembly nata Chhithatuhpa atlyhna daihti a hmâh ei ta, Puhpa Beirahmo Syhly, Executive Member, i/c., Road Transport etc., MADC, Siaha cha Khichhai Laipa (Chief Guest) châ pata a hmâkhei ei. 

First Session he Puhpa K. Hmangaihliana, President, MMCOA ta chhihtha ta, Puhpa Saptawna, Treasurer ta Devotion a hmâ. Introduction nata Association member âpahâ hapazy taokheina daihti hmâ khai tawhta Khichhai Laipa ta biereina a hnei. 

Puhpa Beirahmo Syhly, EM chata ''Mizoram Maxi Cab Owner's Association, Siaha District chhithatupazy ta Assembly ama hneina liata Khichhai Laipa châ awpa ta khokheina eina patosa vâ ei chi ta nama chô liata alynabie ei reih hmeiseih".

"Politician nata Driver nahzy he alyuna hnei pita, rai eima hria pha kaw khiahma eima tah ngâno chhaota, chyhsa thokhazy tawhta reipachhiena dao pyly tyh pita, reipachhiena eima dao vâta hnôh asy thlâha leipa ta, eima theina rakha hawhta eima raizy hria lymâ awpa ta eimâ pasyu. Driver rai he chakaona rai rônah ngaita pa châta, bao ngiahpazy bao tyhpa nata chyhsa rairuviapazy châ ta byhnâ nama châ tyhpa he mopâ tlâh nama châna a châ. Chyhsa châ ta byhnâ nama châ tyhpa kha bâhsai thlâha leipa ta, ahlu viata byhnâ châ lymâ awpa ta ei châ haw ei". 

"Maxi Cab (Sumo) a pua hlâ cha Siaha tawhta Aizawl lâ eima sie tyhpa he Bus liata kia tyh pi ta, Ticket eima toh leina daihtizy vaw y tyhta, riethei âchhi ngâsâ tyh. Atahmâ deikua cha Maxi Cab zy vaw pua ta, nâmozy zawhzi ta thadâh kawpa ta Aizawl tlô thei bâ pita, alypa a châ ngaita". 

"Passenger a phaoh tyhpa ama châpa vâta Chyhsa hluhpi hrona ama ku liata a y tahpa pahno u la, phahnai namâ ngiah tuna vâ nata phusâ nama khoh tupa vâta Motor Ahneituhpazy ta nama Driver nahzy riethei tupa ta motor pa service sa lei awpa ta ei châ haw ei. Riethei tupa ta motor haohpa heta apiepasiena tlôkhei thei ta, chavata Motor Ahneitupa nata Driver nahzy a pahnothai kawna chôta motor zy eima mohôh awpa a peimawh kaw". 

"Driver nahzy chi Khazohpa pahno thlâh nachô ta Motor haoh tyh awpa ta châ haw ei na ta, pari pangana chôta Motor haoh lei awpa ta ei châ haw hmeiseih ei. Ngâchhihna nata tiamana chôta nama rai nochâ chyu hria awpa ta ei cha haw ei," tahpa ta Khichhai Laipa ta a biereipa a pachhâsa. 

Mizoram Maxi Cab Owner's Association, Siaha District ta Siaha District moh papha tuhpa, Puhpa C. Hminghlua, New Siaha (MADC Driver) hnohta palyupalina ryuchâ nata hmosai hlâna a ma hnei. 

Lalrindiki Renthlei, Khawbel nata Jacob Lalawmpuia, Siaha zy ta hla sapa ta zawpi ama palô pahaw. 

Puhpa Beirahmô Syhly, EM, MADC he Official lâ tawhta Puhpa NS. Beihruasa, CAO, Puhpa L. Khaiu, UDC, Pihno Dinary Byhnadaongia, T.C (RT Dept), Puhpa Martin L. Hlychho, Cameraman nata BJP Party tawhta Puhpa KT Apaw, Convener (IT) BJP zy ta ama zi. 

ISSUED BY :

Information & Publicity Department, 

Mara Autonomous District Council, 

Siaha.