PRESS RELEASE

NO.15/2025

SIAHA, 04 Hmypi, 2025, Hriaheinoh - Atamy dawh 7:30Am khata Siaha Vaihpi Traffic Point liata Siaha District Level Road Safety Committee pachhuahpanohpa "Asohsi kawpa nata âboh kawpa ta ahluahtheipa haoh tyh mah y" tahpa biepipa hmâpa ta Road Safety Month 2025 Inaugural Programme ahmâhpa châ ta, Puhpa Beirahmo Syhly, EM i/c Road Transport, etc MADC cha khichhai laipa (chief guest) châpa ta â hmâkhei ei.

Programme he Dr. Menesia Khaimeichho, MCS, District Transport Officer, Siaha ta a chhihtha.

Puhpa Beirahmo Syhly, EM chata, Road Safety Month 2025 pahyna hnei ta, Motor haohtuhpa (Driver) zy asohsi kawpa ta Motor haoh peimawhzie reih ta. Zawpi chhaota lâlai liata lâthlôh cross daihti liata aparaparô kawpa ta cross chakhyh thlâ leipa ta, lâthlôh cross chyta chachâh chavei moh khai tua ta, avaih kawna chôta lâthlôh cross peimawhzie, a reih.

"Motor lâthlôh liata ahlaihlâ daihti liata chyhsa sie n’awpa footpath liata sie ta, Motor ahniatu leipa ta sie achhuah chyu sih la, avaih kawna chôta Motor lâthlôh liata siepa nata ahlaihlâpa he hmopha chaipa a châ. Apiepasina (Accident) he buakhata liata tlô theipa châ ta, avaih kawna chô nata asohsi kawna chôta lâthlôh eimâ chhih awpa he papeimawhsa chyu suh vy," tahpa ta khichhai laipa ta a reih.

Puhpa K. Lalrinsanga, MVI chhaota biereina hnei hra ta, kô tloh leipa ta Motor haoh chi â chhihzie reih ta, kô tloh leipa ta Motor haoh penawh he, papeisana hnei leipa ta Motor haoh tyh ei ta, apiepasina thata a tlô tyh. Nôpawzy ta sawzy kô tloh leipazy Motor pahaosa khao lei awpa ta chho chyu thei ei sala a pha kaw aw, tahpa ta a reih.

Mizoram State Road Safety Council ta Road Safety Pledge ama pachhuahpanohpa cha a paro kawpa nata â raohpa ta reihparaohpa a châ. He hawhta:

1. Ahluahtheipa Accident a tlô hluh theina chhâ chaipa cha parina chôta ahluahtheipa eima haoh tyhpa vâta a châ. Chavâta, Accident tawhta ei boh theih n’awpa ta cha, atlâboh kawpa ta ei haoh tyh awpa a châ.

2. Ahluahtheipa achatlie kawpa ta eima haoh tyhpa vâta Accident a tlô hluh chai tyh. Chavâta, Accident tawhta eimâ boh theih n’awpa ta dâh ta a pasaina khô lâta Ahluahtheipa haoh aw va na.

 3. Traffic rules zy he Ahluahtheipa nata phei ta asiepazy amâ boh theih n’awpa nata arainao viapa ta taopa a châpa hawhta, a pha kawpa ta zyh ei chhuah aw.

 4. Ahluahtheipa haoh ngâ nota Mobile Phone hmâpa he pathipalôh pachâna siekhei chhei ta, Accident a tlôkhei tyh. Chavâta, ahluahtheipa haoh nota Mobile Phone hmâ’pa eima khoh khiahta cha Lâpi kâ lâta paduapa ta eima hmâh awpa a châ.

5. Lâlai he chyhsa hluhpi ta eima hmâpahlaopa a châpa vâta chyhsa hropazy vaih pâ kawna chôta ahluahtheipa ei haoh tyh aw.

6. Lâlai liata asohsi kawpa ta nata ahluahtheipa â vy awpa hâna chôta   ei sie tyh aw.

7. Ei chhôhkha sanawh, viasa nata hrialâhpazy Lâlai liata asohsi awpa ta ei chho tyh aw.

 8. Ei hmia nata hnôh arâpazy tawhta eimâ boh theih n’awpa ta asohsi kawna chôta ahluahtheipa ei haoh tyh aw.

 9. Phei ta asiepa, Hawtipa nata Machâ thatlô leipazy pachâthai kawna chôta ahluahtheipa ei haoh tyh aw.

10. Traffic Rules & Regulations zy he a pha kawpa ta ei zyh aw.

Asohsi kawpa nata aboh kawpa ta Ahluahtheipa haoh teh.

Puhpa Beirahmo Syhly, EM he Official lâ tawhta Puhpa John Kenneth Syhly, RTO, MADC, Puhpa Pawsa Lava, AITO, MADC nata Puhpa K. Nehemia, Cameraman zy ta ama chakaochahlâh.

Dr. Manesia Khaimeichho, MCS, District Transport Officer, Siaha ta vote of thanks reina a hnei khai tawhta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.