PRESS RELEASE

NO.13/2023

SIAHA, 23 Nawh, 2023, Hriatuanoh – Atamy dawh 11:00 Am kha ta Siaha District Volleyball Association (SDVA) pachhuapanohpa “2023 Republic Day Volleyball Tournament” cha pahyna hneipa châ ta, he liata Puhpa Beirahmo Syhly, EM, MADC cha khichhai laipa châpa ta pahyna programme a hmâkhei.

Programme he Puhpa CZ. Hluna, President, SDVA ta chhihtha ta, Puhpa Steve Azyu, Assistant Secretary, SDVA ta Player-zy bietaina (oath taking) a pahneisa.

Chairman ta Puhpa Beirahmo Syhly, EM zachhihpa biereina hnei awpa ta hrua ta, ary liata palâsapa he a bierei tlâhpi viapazy a châ:-

1. Chairman, SDVA leaders nata Players zydua hnoh ta alynabie reih na ta, nâ zi tuhpa Puhpa TT. Kholaw, RTO, Puhpa JH. Beihnai, S&YO nata Puhpa T. Pabua, Cameraman zy hnoh ta alynabie ei reih. 12th Term MADC, sawhkhâna ei 2-na â vaw thao tawhta Tournament hmiatua chaipa liata khichhailaipa ei vaw châ theipa he ei ly hmeiseih.

2. Eima râh chhihthatuhpazy nata eima officer nahzy ta eima thyutlia nahzy he sports lâ liata kheihta ma hmah ama sie thei aw tahpa he ama pachâ peimawh kawpa a châ. Eima râh sôhthih rairuna vâta atakô Republic Day alyna chikha châta sports discipline sâ 16 hlei ypa liata Volleyball he atlypa a vaw châ; he he Volleyball players eima thyutlia nahzy liata hnabeiseihna lai kawpa eima hnei vâta a cha tahpa nama pahno awpa ei reih khoh kaw. 

3. Eima player nahzy, eima district liata Tournament lia ngâlâh apuapa châ leipa u la, eima national level liata player châ papha awpa ta namâ chhuah awpa ei khoh. 

4. Leaderzy chhao ta Sports lâ ta eima hmahlana palôhzy thla laih hra si la, Tournament taopa nata players phapa tluapa ngâlâh tao leipa ei si la, eima district tawhta players phapa, State, National nata International liata papua thei awpa eimâ chhuah awpa ei khoh kaw. 

5. Puhpa T. Seido, EM i/c Sports zachhihpa chhao ta eima thyutlia nahzy sports lâ hmah nama sie thei nawpa ta pachâ peimawh kaw ta, nâmo chhao ta eima râh nôpaw nata officer nahzy ta Sports lâ hmah eima sie thei awpa ta ama khonazy hlao patloh awpa ta palôh hneipa ta nama tiama awpa ta khoh na ta, local tournament nata district level liata chhâ thlâh leipa ta â sâh viapa liata alâ thei awpa ta atahmâ tawhta namâ patoh patia awpa ta ei châ haw ei.

Atahmâ tournament liata chapaw Team 8 nata chanô Team 5 zy amâ hlao thei.

ISSUED BY:

Information & Publicity Department

Mara Autonomous District Council

Siaha.