Mara Autonomous District Council (MADC), Siaha, Government of Mizoram, India

PRESS RELEASE

NO.9/2024

SIAHA, 31 Nawh, 2024, Pakhynoh - Atanoh dawh 2:00 Pm kha ta Mizoram Journalist Association (MJA), District Headquarters: Siaha zy ta I & PR Hall, Council Vaih liata 39th MJA Annual Conference programme ahmâh ei ta, he liata Puhpa Beirahmo Syhly, Hon’ble EM i/c Rural Development etc. cha Khichhai laipa châpa ta programme a hmâkhei ei.

Programme he Puhpa V. Pawhla, Vice President ta chhihtha ta, Puhpa B. Dawpho, Prominent Journalist ta devotion a hmâh. Khichhai laipa hleikhô ta Puhpa M. Baithai, President, Puhpa Beirôkhu Beitâ, I&PO, Puhpa K. Thangvela, Prominent Journalist nata Puhpa CZ. Hluna, Newly elected President zy ta biereina daihti chyupa ama hmâh chyu hra.

Atanoh liata Khichhailaipa Puhpa Beirahmo Syhly, Hon’ble EM bierei tlâhpi viapazy:-

1. MJA Siaha member zydua kôthieh anaohna Samaw cha hlâ ei na ta, atanoh khichhai laipa châta eina rao vâ ei chi ta alynabie ei chahlâ ei.

2. MJA Siaha zy he member chyh kawpa châ hra u la, chyhsa pata kawpa, nama pachiahpa cha reader-zy châ ei ta, member hluh kawpa tlao nama châ.

3. Jounalist role he peimawh kaw ta, role play thaina lia maih khizaw hmah a sie. Chavâta eima râh châta chhaichhi peimawh ngaitapa nama châ.

4. COVID-19 tawhta moto ta eima thazei ta, MJA zychhao nama diathlâ pathao khiahma tah thei awpa a châ, eima râh â do leina liata padona rai a hria theituhpa cha MJA zy nama châ, apatiah via ta, nama tiama via awpa a peimawh kaw.

5. Nochareih newspaper nama papuapa he document pitlohpa châ ta, ryu tlohpa a châ tahpa eima pahno awpa apeimawh kaw. Puhpa Laima Chozah, IAS ta a hlaotlohna liata a phahnaikheipa cha daily newspaper a reipa vâta a châpa hawh ta a reih. Newspaper he competitive exam awpazy châta phahnai kawpa, thaina sona eima la papuana a châ. Chavâta tiama kawpa ta tao hnolo u la, mo hropazy châta byhnâ châpazao lymâ teh u.

6. Eima râh pado theituhpa nata Mararâh sie nawpa a guide theituhpa nama châpa apahno u la, Social life ataopathi theituhpa chhao nâmo nama châ - thyutliazy ta pari theipa chi nano nanopa nata drugs sei châna liata atâh hai ei ta, he nahzy vâta eima râh rao hai ta, population chhao tla pahnai ta, eima râh liata apihpa nata athipa zie a kho laih ha ta, Marapa a pôh thei khao ma pi. Paritheipa adyuhna kyh liata MJA nahzy nama peimawh kaw; he kyh liata hmah miah lakhei awpa ta ei châhaw ei.

7. News collect chôchâh nata news source he internet tawh ngâlâh tlua leipa ta keimo pôhpa cheingei ta siehnao laih ei si la, a châna dopa pahno awpa ta eima tiama via awpa a peimawh kaw.

8. MJA nahzy cha politics liata ahniahni leipa, a châh viapa chhao hnei leipa ta eima neutral awpa a peimawh.

9. Term parohpa liata leader zy Mararâh châta ama hriapasana vâta alynabie reih ei na ta, term parohpa hawhta term thiehpa liata leader nahzy chhao Mararâh hmahsie nawpa ta hmah miah lakhei lymâ awpa ta ei châ haw ei.

10. MJA Siaha term thiehpa liata atlypatloh thiehpazy châ lykhei ei na ta, hmialâ nama sie lymâ nawpa liata khokheina sâh chaipa ei cha hlâ ei.

Atanoh 39th Annual Conference hneipa liata kô 2024-2026 chhôh châta MJA District Headquarters, Siaha leaders atlyna hnei pâpa châ ta, chhituhpa châta atlypatlohpazy cha:-

President : Puhpa CZ. Hluna, Stinger, DDK Siaha

Vice President : Puhpa Jeffrey Khara, Editor, Moonlight

Treasurer : Puhpa V. Pawhla, Editor, NSV.

Executive Members :

1. Puhpa H. Sabi (DDK Stringer)

2. Puhpa T. Lalrosiama (Editor, Tipa Express)

3. Puhpa B. Vanlalhriata (Editor, Siaha Post)

4. Puhpa C. Lalramnghaka (Editor, Kawleng)

5. Puhpa PT. Lalhnehzoa (Asst. Editor, NSV).

Puhpa Beirahmo Syhly, Hon’ble EM he Puhpa Vabeikhaihmô Solo, SCO, Puhpa Beirôkhu Beitâ, I&PO, Puhpa Pawsa Lava, AITO zy ta ama chakaochahlâ.

ISSUED BY:

Information & Publicity Department