PRESS RELEASE

NO.135/2024

SIAHA, 06 Di, 2024, Chutynoh – Atanoh my dawh 11:00 AM khata Puhpa Beirahmo Syhly, Executive Member i/c Road Transport, etc., MADC ta a Office chhôhpadâh (Chamber) liata MADC Enforcement Road Transport Department Jersey a palâhâh.

Programme he Puhpa John Kenneth Syhly, RTO, MADC ta chhihtha ta, Pihnô CTS. Hlychho, HA ta Abeipa lâta pavaosana devotion daihti â hmâh.

Puhpa Beirahmo Syhly, EM chata, "MADC Enforcement Road Transport ta Jersey thiehpa eima vaw hnei  heih  theipa he aly’pa châ hmeiseih ta, RTO nata a hrialâhpazy tiamana nata hmahlana vâta eima hnei theipa châ ta, ama chôla liata alynabie ei reih hmeiseih," a tah.

"Râh hneituhpa cha keimo châ pi ta, keimo, Road Transport Department, MADC liata hriapazy pi ta maophaohna a chaba khai ta, Traffic Police zy, DTO Siaha liata hriapazy nata hriaparaohna phapa eima hnei lymâ awpa he a peimawh ngâsâ," tahpa ta EM ta a reih.

EM chata, " Kôthieh lâ liata training zy hnei thei achhuah pi ta, a pha viapa ta hmahla lymâ eimâ chhuah aw. Nâmo a duty penawh châ chhao namâ huatlâ via n’awpa nata hmah nama sie via n’awpa awpa, training hnei leipa ta cha, nama pahno thai leipa hluhpi a y awpa vâta training nama hnei lymâ bâ aw," a tah.

"Nôpawzy ta miah ama khokheinapa he pahno thai ta, tiama nama papua via lymâ awpa a byuh. A pha kawpa ta eima hria thei n’awpa awpa ta staff zy miah ama bai tahpa he a thiehpa ta nama pahno awpa a châ. Nama duty lia chyu heta tiama nama papua via lymâ awpa he a peimawh ngaita kaw," tahpa ta EM ta a reih.

EM chata, "Nama duty daihti liata chyhsa thokha lâlao kawpazy vaw y thei ei ta, palôh apahsisa ta, mao-oh theina hnei ta, pahnothaina chhao nama hnei lymâ awpa a byuh. Zawpi hrialâh thai byuh ta, Traffic Police hrialâh thai byuh ta, DTO zy nata hrialâh thai byuh ta, a râh hneituhpa, azipa palôhru hnei ta, apanai a byuhna liata apanai ta, hrialâh thai kawna chôta nama hria lymâ awpa ta ei cha pasyu ei," a tah.

Puhpa LM. Beingalai, ARTO, MADC ta vote of thanks reina a hnei khai tawhta Abeipa thlahchhâna (The Lord's Prayer) reihparaohpa ta daihti pachhâsapa a châ.

ISSUED BY:

Information & Publicity Department

Mara Autonomous District Council

Siaha.