PRESS RELEASE

NO.12/2022

SIAHA, 1 Hmypi, 2022, Hriaheinoh – Atanoh my dawh 11:00 AM pa ta Siaha District Cricket Association (SDCA) pachhuapanohpa “K. Ratha (L) Memorial Cricket Tournament”, noh 5 chhôh ô awpa cha Puhpa Beirahmô Syhly, EM, i/c Sport & Youth Services etc., MADC ta a pahy.

Puhpa Beirahmô Syhly chata biereina chyupa a hnei khai tawhta Tournament pahyna châta bowling nata batting ei kha chyu a tao raihrie. A ry liata palâsapazy he a bierei tlâhpi viapazy a châ:-

1.  Atanoh liata Chief Guest châta nâ hrua tuhpa SDCA nôpawpazy chô liata alynabie reih na ta, he su liata Officials, players nata fans a vypazy, nama zydua hnoh ta alynabie cha hlâ ei na ta, zana nata anaohna Samaw ei cha hlâ chyu ei.

2. Puhpa Ratha he châ eimâ chu no ta eima senior châ ta, ano pachuna ry liata Football nata Cricket zy a vaw khai tyh hra na ta, ano he chyhsa tha pathyu thai kawpa, hlâta hawti viapazy daodo thai kawpa, talent hnei pha kawpa châ ta, uhthei viapa a châpa chhao ta viasa hawhta ei pakyh theipa a châ. He hawhta ano athei thlâh-na Tournament liata Chief Guest ei vaw châpa he ei no âh kaw ta, ei ly kaw no ta, kao kha lâ deikua ei palôh â lie kaw.

3. Cricket he British chyhsazy ta 18th Century chhaichhyh liata India râh liata a vaw ngiakhei ei ta, cha tawhta India râh liata akhaih pathaopa avaw châ. Eima râh lia deikua kô 2000 khô lâ liata hmia eima vaw pahno pathao chyuchyuhpa châ ta, py hawh chhochhi ta cha py hawti kaw chypa a châ no ta py thatlô kawpa nama châ tahpa atanoh liata mo ta hmô pi ta, ei ly ngâsâ.

4. Nama chhihthatuhpazy pha ei ta, ama thatlô ta, ama hmahlana zawhzi ta eima District he ta Cricket liata hmahsiena thata eima hnei nahta hnabeiseihna sâh kawpa ei hnei.

5. Keima hmôna dâh ta cha Cricket lia he ta pôraoh pha kawpa vaw peimawh hlei leipa ta, a technique he thaipa ta, mo thatlô awpa he apeimawh chaipa ta ei pahno. He mia 2-pazy eima hnei thei khiah Cricket player pha kawpa eima châ thei nahta ei hnabeiseih. Chavâta mo tha patlô thei awpa niebaw liata âhna lasi nie hluhpa ta, sa lâ chhâh nie chyh via awpa he apeimawhpa ta ei pahno.

6. Atahmâ he SDCA nôpawpazy hmahlana zawhzi ta eima district liata Cricket Tournament he ei khazie tlai ma cha vaw tao ha bâ hra pi ta, aly’pa a châ hmeiseih. Atanoh lia chhao Memorial Tournament akhaih thei heih awpa a châpa he, Memorial eima tao ngâhaipa chhôhkhazy nata SDCA leaders zy hnoh ta alynabie ei reih chanei.

7. Player zy chhao ta, apahâ leipa ta he hawhta akhaih theina rypaohpa miah taopa tuhpa eima leader nahzy chô lia chhao eimâ ly thei kaw awpa apeimawh kaw aw.

8. Sports Discipline nano nanopazy liata Leader zy thatlô awpa nata Discipline tha tlô awpa ta cha player zy ta Discipline eima hneipha awpa apeimawh. Chavâta Cricket player zydua, atahmâ tawhta Discipline pha kawpa ta sie lymâ u la, leader zy deichhypa ta ama bie eima zyh lymâ khiah eima District tawhta India râh liata a khaih thei awpa taihta Player phapa eima vaw pua thei nahta ei hnabeiseih. Chahawhta châ awpa cha ta, hmah la u la, tiama papua lymâ awpa ta player zy khokheina cha hlâ ei.

9. K. Ratha (L) Memorial Cricket Tournament he apalâ kawpa ta a sie thei nawpa ta Player zy ta aly kawpa nata thapha kawpa ta akhai chyu awpa ta khokheina cha hlâ ei na ta, a ei-chhiana nata a pabuana y leipa sa la, a tao chheipa ama y hapa chhao ta pahno thai lymâpa ta eima hyutuhpazy rei angiah awpa he eima tao awpa a châ tahpa pahno thlâhna chô ta, Team to liata Captain & Player zydua ta reingiah chyu awpa ta châ haw khoh ei na ta, K. Ratha (L) Memorial Cricket Tournament he a pha kawpa ta hnei patlô awpa ta khokheina sâh chaipa ei cha hlâ ei, ei châ ly kaw ei.

ISSUED BY:

Information & Publicity Department

Mara Autonomous District Council

Siaha.