PRESS RELEASE

NO.45/2023

SIAHA, 25 Hmypi, 2023, Pachyhnoh - Târi 23-24, 2023 pa ta Puhpa Beirahmo Syhly, EM i/c Rural Development Department, Soil & Water Conservation Department, Transport Department, MADC cha a bia New Laty, Maisa, Palâ nata Laty khih zy a tly.

Maisa khih liata biatuhpa Puhpa Beirahmo Syhly, EM, MADC âlykheina programme liata Puhpa LC. Kholai ta chhihtha ta, Palâ khih liata âlykheina programme liata Puhpa K. Othaniel ta a chhihtha. New Laty liata âlykheina programme liata Puhpa HC. Beichatlai ta a chhihtha hei hra. Maisa nata Palâ khisaw zy ta ama biatuhpa EM hnohta âlykheina ryuchâ (citation) ama hlâ. Puhpa A.Chhualai, FC.Nipari, Gospel Byhnadaorili Azyu nata Jenifer Khithie zyta  pahnie kawpa ta hlasapa ta zawpi ama palôhpahawh.

Puhpa Beirahmo Syhly, EM, MADC ta bie a reipa tlâhpi viapazy:

Nama ngiachhiena vâta nata Khazoh ngiachhiena vâta navaw tly patlo hei ei chita ei ly hmeiseih. Ei bia zawpizy chô lâ liata alynabie ei reih hmeiseih. Namo vâta EM vaw cha na ta, ei bia châta ngahlah EM chaleipa na ta, Mara zawpi châta EM ei cha na tahpa he ei reih khoh kawpa a châ. 

Puhpa S. Lalremthanga, EM, MADC ta ei bia liata school zy zatly ta a chô lâ liata ei ly hmeiseih.

Ei sia leina liata nama deichhyna ângiah ngaita kaw na ta, chahnaita, nama thlahchhâ kheina ei ngiah ngaita kaw. Ngiachhiepa ta nama thlahchhâna liata eina thei ty awpa ei chita ei cha haw ei.

Ei bia châta ângiah âbyuhna lia maita ei kô navaw tlô khei lyma ula, ei theina rakha ta eima baokhâ lyma aw.

Ei châ ly kaw ei.

Puhpa S. Lalremthanga, EM, MADC ta New Laty biatuhpa âlykheina programme liata bie a reipazy:

Ei term chhôh heta ei theina rakha ta Khazoh hmiapasah lyma na chôta education hmahpasiesa ei chhuah. Competition phachaipa cha achuna education liata chyhsa hropa hlata thai via achhuah tuasa tahpa palô hneita tiama kawpa ta châ achu he a châ. Mara chanô nata Chapaw lathli he chhie tiara vei. Satlia KC. Zalena tawh heta a la pasia kaw. Atahma ta siku hawti zy ei chi he, myla hano ta eima râh chhihtuhawpazy namâ châ.

Khizaw lia heta Marasaw pi he chhipho chy kawpa chahrapisala eima special kawna y ta, chacha Khazohpa ta Mongyuh râh tawhta Missionary miah vaw tuapa ta, eima vahnei patlua ngaita kaw.

Nôpaw pakah tawhta reikah apuapa he sawzy ta copy chatlie kaw ei ta, chahnaita, nama sawzy mohôna ky lia heta Khazoh hmiapasah ta nama reikah chhao nama chado (sohsi) kaw awpa abyuh.

Puhpa Beihu Nôhro, Deputy Chief Whip, MADC chhaota bie reina a hnei hra. A bie reipazy: 

Khitlâh kyhpachâtuhawpa heta chyhsa hropa y vei ei. Namo pyly hena he khitlâh kyhpachâtuhawpa cha nama châ. Hawti zy he ama hawti noh tawhta Khazoh hmiapasahna chô ta a sie nawpa lâthlô dopa liata nopawzy ta nama chhihtha awpa âbyuh ngaita kaw.

Nama biatuhpa he Khazohpa ta miah piepa na a châ e tahpa nama pyh khiatacha ano thapatlôtuhpa cha nama vaw chhuah chyu awpa ta ei cha haw ei.

Ei châ ly kaw ei.

Puhpa Beirahmo Syhly, EM, MADC he Official lâ tawhta Puhpa Vabeikhaihmo Solo, Soil & Water Conservation Officer, Puhpa TT. Kholaw, Road Transport Officer, Puhpa Rakhu Chozah, AE, RD Department, MADC, Pihnô Patricia T. Azyu, Social Welfare Officer, Puhpa Herbertson Syuhlô, AEO (PS), Puhpa Pawsa Lava, AITO, Puhpa R. Beilochai Khithie, Inspector of Statistics, Puhpa Z.Beichono, PA to EM (RD), Puhpa T. Pabua, Cameraman, Puhpa Pakhai Hlychho nata Party lâ tawhta Puhpa Pawkhu T. Azyu, GS, BJP Siaha nata Puhpa Thychha Chozah, Secretary, BJP Siaha zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.