PRESS RELEASE

NO.92/2023

SIAHA, 18 Khihpa, 2023, Hriaheinoh – Atanoh dawh 12:00 Noon kha ta Siaha District Football Association (SDFA) Ground, Meisatlâh liata 7th SDFA Cup 2023 Tournament pahyna programma ahmâpa châ ta, he liata Puhpa Beirahmo Syhly, EM i/c RD, MADC cha khiachhai laipa châpa ta programme a hmâkhei.

Puhpa Khusa Khaila, Joint Secretary, SDFA ta programme chhihthapa ta Welcome Speech reina hnei pâ ta, Puhpa JB. Fachhai, Executive Member, SDFA ta devotion a hmâh. 

Khichhai laipa Puhpa Beirahmo Syhly, Hon’ble EM chata biereina chyupa daihti hmâ ta, SDFC Cup 2023 Tournament pachhuapanoh theipa a châpa cha aly âchhih a tahzie reih ta, a pachhuahpanoh tuhpa SDFA nôpawpazy hnohta nata Tournament pachâ peimawhpa ta a vaw hlao tuhpa Club nahzy hnoh ta alynabie reih ta, eima zydua tiamana nata hriapasana zy vâta Tournament pachhuapanoh theipa a châ tahpa a reih.

“Khizaw hmahsiena zawhzi nata nôpaw nahzy hmahlana ta Mararâh lia chhao sipo chô lia football akhaih theipa vaw châ ha ta, aly’pa a châ kaw. SDFA ta Mararâh châta a theina hawhta hmah la lymâ ta, atahmâ cha State hro lâ taihta player nahzy paphao theipa ama châ haw. Eima nôpaw nawhzy nata eima SDFA leader nahzy khona nata khokheina hawhta eima player nahzy chhao palôh eima hnei via lymâ awpa a peimawh ngaita kaw.”

“Mararâh liata kô khachâ rakha tawhta football he hmia vaw pahno pi ta, kô 2000 tawhta SDFA he paduapa a vaw châ hra – SDFA ta â chhuah chaipa cha player zy promote awpa nata talent papôhsa awpa hleikhô ta niebaw tluana taihta chhihtha awpa he a châ.”

“Eima Player nahzy ama tlôpasâh thei leina cha discipline hnei lei vâ nata sasy asohsi thei leina - self control a phahlana vâta châ tyh ta, apahâ leipa ta taopazao awpa zy peimawh ta, Tournament he apathiepahlâhna hawhta apachâ si la, a chhâ tawhta tao pazi awpa a peimawh. District level lia ngâlâh chhâ thlâh awpa châ leipa ta. National level taihta akhaih thei awpa ta tiama papua awpa ta akhokhei pi ta, eimâ pasyupa a châ.”

“Atanoh liata player nahzy, eimâ vaw khaih ti ta, eima rie a thei nahta pathichhiena y thei aw ta; opponent zy diahdâ ta chakho chakhâ eima vaw khoh tlamaw thei aw; he hawhpa hmo khochhih leipa nata angia leipa zy he tao leipa ta, â ngia kawpa ta akhaihna dâh a chu awpa eima châ. Zawpi lâ chhao aw dâh thai awpa ta ahaw pi ta, he 7th SDFA Cup 2023 Tournament he aly kawpa ta namâ hmâ awpa ta khokheina cha hlâ ei na ta, he Cup he ta thyutliapazy hnabeiseihna apie tuhpa vaw châ mawh sy” tahpa ta pasyuna bie nata khokheina bie a reih.

Programme likawh liata Laihsa Rovina Khaimeichhao ta hla ei 2 sapa ta zawpi palôpahawh ta, daihti chhana liata Puhpa Martin VT. Beiralai, Finance Secretary, SDFA ta Vote of thanks reih ta, pahyna programme ha pachhâsapa a châ.

Khichhai laipa he Puhpa T. Seido, EM i/c Sports, MADC, MADC Officers nata Staff thokhazy ta ama zi.

Atakô SDFA Cup he atanoh tawhta pathaopa ta târi 29.7.2023 pa ta Final a khaih awpa a châ.

ISSUED BY:

Information & Publicity Department

Mara Autonomous District Council

Siaha.