PRESS RELEASE

NO.114/2024

SIAHA, 20 Phiapi, 2024, Pakhynoh – Atamy dawh 11:00 AM khata District Industries Training Hall, Council Vaih, Siaha liata 71st All India Cooperative Week Closing Function Programme ahmâhpa châ ta, Puhpa Beirahmo Syhly, Executive Member i/c RD, Co-operation, etc., MADC cha khichhai laipa (chief guest) châpa ta â hmâkhei ei.

Programme he Puhpa K. Mara, President, SDCU ta chhihtha ta, Rev. Thylua Hlychho ta Abeipa lâta pavaosana devotion daihti â hmâh.

Puhpa Beirahmo Syhly, EM, MADC chata, "Mo pakha deita ta raihria ta hmahsie awpa he hmo rairu kawpa châ ta, chavâta, hriaparaohna phapa he peimawh kaw ta, Co-operative department zy hmâpa nata py hawhta raihria parao dâh thai ta, khizaw hmahsiena achadai thai awpa he a peimawh ngaita kaw," tahpa ta a reih.

"India sawhkhâ chhaota Co-operative hmâpa ta India chyhsazy raihria paraohna kyh liata thata hmahlâ lymâ a chhuah ta, Co-operative lia zy society liazy member thlâhthlipa châ thlâh leipa ta, tiama kawpa ta raihria ta, pha kawpa ta patuapalua ta, palôh hnei kawna chôta raihria lymâ awpa he a peimawh ngaita kaw," tahpa ta khichhai laipa ta a reih.

EM chata, Co-operative role he peimawh kaw ta, Co-operative liata   lôraoh kawpa ta hriaparaohna phapa he peimawh kaw ta, eima râh liata society liata member châ thlâh tlôh ta, active kawpa nata tiama kawpa ta, raihriapa nata hmahlatuhpa he chyh kaw tyh ei ta, atahmâ tawhta la tiama nama papua chyu awpa ta ei châ haw chyu ei. Society liata chhôhkha ngâlâh member pachâsa thlâh hapazy he a pha lei kaw. Atahmâ tawhta cha Co-operative he hmâh phahnai ta, tiama kawpa nata palôh hnei kawpa ta hmahsie a chhuah chyu awpa ta zawpi lâta ahawna a tao.

"Chhihtuhpazy chhaota châna ngâlâh patu chakhyh thlâh leipa ta, sahlaozy pasyu thai ta, tiama kawpa ta rai ama hria thei n’awpa ta ama tha papawh thaizy namâ chhuah awpa a châ," tahpa ta khichhai laipa ta a reih.

Puhpa N. Lalhmingmawia, Executive Officer, SDCU, Pihnô Lalbiaknii, Manager, Mizoram Cooperative Apex Bank, Ltd., Siaha Branch nata Puhpa Joseph Lallungmuana, Manager, MIZOFED, Ltd., Siaha zy ta report piena ama hnei.

Laihsa Clara K. Melita ta pahnie kawpa ta hlasapa ta zawpi a palôhpahawh.

Puhpa Beirahmo Syhly, EM, MADC he Official lâ tawhta Puhpa Pawsa Lava, AITO, MADC nata Puhpa K. Nehemia, Cameraman zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.