PRESS RELEASE 

NO. 187/2022

SIAHA, 22 Phiapi, 2022 Hriaheinoh - Mararâh liata khih alaluah kawpa nata khih peimawh kawpa miakha Kaochao East khih, kô 50 tlohna (Golden Jubilee) cha atanoh dawh 11:00 Am kha ta MTP Tlylia, Kaochao East liata aly kawpa nata thapha kawpa ta ahmâpa châ ta, biatuhpa MDC Puhpa Beihruakhai, Hon'ble EM i/c Agriculture etc. MADC cha khichhai laipa châpa ta a hmâ khei. 

Golden Jubilee alyna programme he Puhpa MB. Ratlua,  Chairman, Golden Jubilee Managing Board ta chhihtha ta, Rev. Tlyzawbeihlô Lapi, ECM Laty biatuhpa ta Devotion a hmâ khai tawhta Golden Jubilee Choir, Kaochao East nahzy ta Jubilee pahy nawpa ta Hallelujah Chorus hla angia kawpa ta sa ei ta, cha khai tawhta khichhai laipa Puhpa Beihruakhai, Hon'ble EM ta bietana a reih.

"Atanoh daihti ngiatlâh châpa nata alychhih kawpa eima vaw tlô theipa he aly kaw na ta, Kaochao East khihsaw zydua Golden Jubilee anaohna 'Samaw' ei cha hlâ ei. Golden Jubilee Managing Board nahzy ta khichhai laipa châ awpa ta khokheina na patosa ei ta, Kaochao East khihsawzy nata Jubilee Managing Board nahzy chô liata alynabie ei reih hmeiseih.”

“Ahmiatua ta ei rei khohpa cha, kô 2019 tawhta Kaochao khih liata Auto Rickshaw service awpa ta hmah ei vaw la hapa cha ahlaotlohna vaw hmô ha pi ta, atahmâ tawhta cha Kaochao East liana he ta Auto Rickshaw service eima vaw hnei ha bâ awpa vâta aly’pa a châ hmeiseih; he he Kaochao East Golden Jubilee byhnâ rônah ngaitapa a châ” tahpa reih ta, biatuhpa MDC nata Khichhai laipa Puhpa Behruakhai, Hon’ble EM he ta Kaochao East VCP hnohta Auto Rickshaw service pasaina châ/Order hlâna a hnei pâ hra.

Puhpa Beihuakhai, Hon'ble EM chata biereina hnei pazao ta, “Kaochao khih he Mararâh hawka peimawh kawpa a châ hleikhô ta Mizoram lia chhao ta khih alâlua kawpa châ ta, Kaochao Iphô chhochhi he cha chyhsa ta ama pasô kawpa nata khizaw liata Kaochao khih maniah palâhâh tuhpa a châ.”

“Kô 50 vaw tloh ha pi ta, pitlohna hro hnei tah, O nata lyu paduana kyh lia chhaota palôh hnei kawna chôta tiama kawpa nata phahnai ngiah kawpa ta hmah eima la awpa he a peimawh ngaita kaw.”

“Kaochao East Bazar shed sa pathi awpata hmahla ngâhaipa châ ta, a hlaotlohna chhao thlai eima hmô nahta ei pangiasa. Chahleikhô ta Kaochao Iphô he âthôh kawpa ta eima zua thei nawpata hmahla ngâhaipa châ ta, Food Processing hmâpa ta a hlaotlohna eima hmô thlyu nahta eima hnabeiseih.”

“Atanoh Golden Jubilee eimâ hmâna tawh heta Kaochao East zawpizy chhaota tao awpa nata tao lei awpa eima hnei tahpa pahno si la, kyh apachâ rairiehpa ta opa lyuhri akhokhei ei si la, ngiahthai byuhpazy angiahthaipa ta a pathluana nata a seisiana zy y leipa ta palôru pathaih kawpa phao awpata ei châ haw ei.”

“Kaochao East khih chhô liata sawhkhâ O a ypazy he dao kawpa nata apha kawpata eima mohôh awpa a châ. Pathaihna kyh lia chhao khi hropazy amopâtlâh châ awpa eimâ chhuah awpa a châ. Chahleikhôta achuna (Education) liata zy, chhienoh phanoh eima mohôhna kyh nata tlyngiana kyh lia chhaota khi hropazy amopâtlâh eima châ awpa a châ. Golden Jubilee aly kawpa nata thapha kawpata hmâ chyu awpata khokheina sâ chaipa eicha hla ei" tahpa ta bietana a reih. 

Atanoh Kaochao East khi kô 50 tlohna (Golden Jubilee) alyna liana heta Machâ K. Biaklawma, Kaochao East cha khichhai zachhipa châpa ta bietana reih ta, Puhpa KT. Rokhaw, MLA Pala Bia chhaota bietana pha kawpa a reih hra.

Siaha nata Kaochao East khih liata hlasa thaipa zy ta Golden Jubilee aly nawpa ta hla ta zawpizy palôpahawh ei ta, programme pachhâ tawhta Golden Jubilee aly nawpata aly kawpa nata thapha kawpa ta kychhina hneipa a châ. 

EM zachhihpa he officials lâ tawhta Puhpa Robertson Khithie, AHO, Puhpa Henry PL Hnaily, SO, Puhpa T. Beihronga, DSCO, Puhpa A. Sachhua, Sr. Surveyor, Puhpa Beichatlaisa Azyu, FRO, Puhpa L. Khai U, UDC, I&PD, Puhpa Beichono Solo, PA to EM(Agri.), Puhpa Kaisanga Chozah, LDC, Puhpa F. Larindika, LDC, Puhpa A. Ryuly, Enforcement, RT Deptt., Puhpa T. Vabeihrongia, Enforcement, RT Deptt., Puhpa Nehemia, Cameraman zy ta zi ei ta, Puhpa A. Chhualai, Artiste nata Ls. B.Priskili, Artiste zy ta ama zi hra. 

ISSUED BY:

Information & Publicity Department

Mara Autonomous District Council

Siaha