PRESS RELEASE

NO.121/2022

SIAHA, 17 Thlarâh, 2022, Pachyhnoh - Atanoh dawh 10:30 Am khata Puhpa Beihruakhai, EM (Agri) MADC ta National Campaign on Poshan Abhiyan and Tree Plantation Programme cha KVK Siaha liata Khichhai laipa (Chief Guest) châpa ta â hmâkhei ei.

Programme he Dr. H. Vanlalhmuliana, Senior Scientist & Head of KVK, Siaha ta a chhihtha.

Puhpa Beihruakhai, EM (Agri), MADC biereipa tlâhpi viapazy:-

Poshan Abhiyan (National Nutrition Mission) he kô 2018 tawh khata hmâh pathaopa vaw châ ta, keimo Siaha District liata ypazy pi chhaota September thlâpâ lia heta Nutrition Month hmâh typa a châ. Nô sawphaohpa, Hawsaih nata Hawti hleikhô ta Chanô thyudyuzy ta Nutrition pha kawpa ama daopa he peimawh kaw ta, niebaw pha kawpa a mâ ru kawpa  kheihawhpa Company zy ta ama taopa he nie cheingei byuh hlei vei.

Keimo hria papuapa âhnalasi he eima nie hluh awpa a peimawh ngaita kaw. He heta sôh nah thih hluhpi a hryuh  awpa hryuh khao leipa ta thata â save ta, chhôhkha khihsana management chhao a paphasa aw. Viahchao sâhpiti mâ ru kawpa chalei ta, Hawsaih piepa hlâta la, Nô sâhpiti Hawsaih ta a pazypa he a pha via syulyu.

Viahchao sâhpiti cha viahchao taw châ châ ta, mie sâhpiti chhao mietaw châta a châ, cha hawh pyly chata, Nô sâhpiti he Hawsaih châta a pha chai hra.  Sôh nah thih hluhpi hryuh byuh leipa ta hnatlâna pha kawpa eima mohôh thei na awpa ta eima Traditional Foods zy he eima nie hluh via lymâpa heta malnutrition tawhta eima râh he aboh aw pi ta, chyhsa to heta âhnalasi fresh kawpa nie he eima papeimawhsa via awpa he a peimawh ngaita kaw. Atahmâ tawhta la âhnalasi fresh kawpa nie hluh achhuh chyu suh vy.

Ei châ ly kaw ei.

ISSUED BY:

Information & Publicity Department

Mara Autonomous District Council

Siaha.