PRESS RELEASE

NO.73/2022

SIAHA, 2 Khihpa, 2022, Pachynoh - Atanoh he eima Missionary Rev. AB. Lorrain Foxall thi noh châ ta, ano thina noh pachhyhpa ta Puhpa Beihruakhai, EM i/c Agri. etc. MADC nata AMFU Siaha zy apakaohpa ta Mara Missionary nahzy hniehnôh Lorrainville su liata Olive thodaw nata Zakia Theikudaw lona daihti hmâpa a châ.

Thodaw lo hlâta Programme chyupa ahmâpa liata Prof. Chawngkhuma Chawngthu, President, AMFU, Siaha ta chhihtha ta, Rev. AZ. Beirona, GS, CCI(M) ta daihti pavaosana a hnei.

Puhpa K. Malsawma, Secretary, AMFU, Siaha tawhta AMFU Siaha tawhta azu theipazy hmia pahnosana daihti nata AMFU Siaha hmahlana reina daihti a hmâh.

Puhpa Beihruakhai, EM i/c Agri. etc. MADC Siaha chhaota biereina chyupa hnei ta, “atanoh daihti eima hmâ haipa he daihti eihrâhpa, programme chynawh kawpa lyu hra sala a sôh pachai” tah ta, “atanoh daihti he Lorrainville, Saikao liata pahrâpazy châta ngiatlâh châ kawpa châ ta, Awnanopa lâta nôpaw nata VC hleikhôta Lorrainville MTP zy ta daodo kawpa ta miah nama ydyna liata alynabie ei cha reih ei.” 

“Missionary zy hniehnôh liata Izarei râh liata Olive thodaw nata Zakia Theikudaw loh thei awpa a châpa he rônah hmeiseih ta, alychhih kawpa a châ.”

“Olive thodaw daw 5 nata Theikudaw daw 3 chhao he Keima pachâna liata yzie hnei kaw awpa ta eima za phaopa a châ.”

“Olive daw 5 pa he nôkha pawkha saw Marapa - Tlôsai, Zyhno, Hawthai, Chapi, Vyhtu moh hnei chyupa ta  palôhraoh kawpa nata bâlia cha-aopa ta eima chipho châta siekhoh lymâ awpa pamosa ta,   Theiku daw 3 pa heta Paw, Saw nata Thlahpa Pathaihpa ta Marapa chipho he khâ miah ypâ ta, kyh miah a pachâzie palâsana hawhta ei pachâ hra. Chanaihta, pasô thai ei sih la, mohôhna rai chhao hriapazi lymâ awpa ta apasyu pi ta, eimâ haw hmeiseih.”

Daihti chhâna lâ ta  Puhpa F. Chhawnmanga, Vice President, AMFU, Siaha ta Saikao liata Siku a vaw kiana thâtih reina daihti hmâh ta, atanoh Saikao liata daihti peimawhpa noh ahmâ thei heihpa vâta â lyzie a reih hra.

Prof. Chawngkhuma, President, AMFU ta “atanoh liata daihti eima hmâ theina chhâ chaipa cha Biatuhpa MDC Puhpa Beihruakhai, EM vâta a châ” tah ta, biatuhpa chô liata alynabie reih ta, Programme apha nawpa ta hmâpa a châ thei nawpa tha nata zâ a vaw thyu tuhpa zydua hnoh ta alynabie a reih.

Programme chyupa hmâ khaipa a châ khôlâ ta su atlyhpazy liata thodaw lona rai hriapa châ ta, Lorrainville MTP zy ta hneituhpa châna lapa ta Thodaw lona rai nata a dôhna rai zydua hria ei ta, CCI(M) Office Staff zy chhaota ama bao hra.

Thodaw lo khaipa a châ tawhta Siaha lâ tawh azupazy he eima Missionary hnôh chaipa Rev. VLA Mark pahrâna o liata thlahchhâna daihti ama hmâh pazi.

Siaha tawhta azupa nôpawzy he DDK Aizawl Correspondent Puhpa H. Sabi nata The Times of Maraland thâtihbu Editor, Puhpa B. Dawphô zy ta ama chakaochahlâh.

ISSUED BY:

Information & Publicity Department

Mara Autonomous District Council

Siaha.