PRESS RELEASE

NO.152/2022

SIAHA, 18 Phiata, 2022, Hriaheinoh  – Atanoh dawh 11:00 AM pa ta District Playground, Siaha Vaihpi liata Siaha District Cricket Association nata Chakma Autonomous District Council, Cricket Association  pachhuahpanohpa friendship match between Siaha District Cricket Association (SDCA) and Chakma Autonomous District Council Cricket Association (CADC CA) Hit off Programme hneipa châ ta, Puhpa Beihruakhai, EM i/c Agri. MADC cha khichhai laipa (chief guest) châpa ta â hmâkhei ei.

Programme he satlia Reuben T. Kompa, Vice President, SDCA ta chhihtha ta, Rev. Chhuakhu Khithie ta devotion daihti â hmâh. Puhpa Derick Salai Solo, President, SDCA ta welcome speech reina hnei ta, Rintea, CCCV ta pahnie kawpa ta hlasapa ta zawpi a palôhpahawh. 

Puhpa Jeffrey J. Khara, Patron and SDCA founding member ta khichhai laipa (chief guest) Puhpa Beihruakhai, EM, MADC hnohta memento hlâna a hnei. 

Puhpa Beihruakhai, EM, MADC ta pasyunabie a reipa tlâhpi viapazy:

Tahmâ 12th term liata MADC chhihtuhpazy pi ta target hnei pi ta, eima target sâkhana cha thyutliazy Sports liata promote awpa he a châ. Atahmâ ta Cricket namâ khaih nawpa chhao he Cricket Playground châ leipa ta, MADC lâ tawh nata Revenue Department, MADC lâ tawhta hriaparaopa ta Cricket Playground hnei thei nawpa khâ eima tei ngâ kaw na tahpa nama hnohta ei reih khoh.

12th term MADC sawhkhâna sie ngâhaipa nata Puhpa H. Malvina, CEM chhihthana ry liata sawhkhâna sie ngâhaipa lia heta thyutliazy hmahsie nawpa kyh liata thapi phiapa ta hmah eima lâ ngâ kawna tahpa he ei reih khoh kawpa a châ. Atahmâ he nama pathao dyupa châ ta, a heihpa liata cha he hlâ ta pha viapa ta programme zy namâ chhuanoh awpa ta ei châ haw ei. Programme heihpa liata cha LADC zy chhao a vaw hlao thei ei sala tahpa he ei khoh kaw.

Programme heihpa liata cha CADC lia zy LADC liatazy eima tao lymâ awpa châ sala a pha kaw aw. He hawhpa programme eima pachhuahpanohpa heta MADC, LADC nata CADC zy pi unawh eima châna he papha via lymâ sala tahpa he ei reih khoh kawpa a châ. A heihpa liata cha Inter Sixth Schedule Cricket Premiere League zy chhao a kaw y laih lymâ awpa hawhta pachâ sih la.

MADC, CADC nata LADC zy pi he Central nata State sawhkhâ liata rairuna hluhpi hnei tyh pi ta he hawhpa liata chhao unawh eima châna pahno thlâhna chôta hriaparaoh ta eimâ baokhâ lymâ awpa he a peimawh ngaita kawpa a châ.

Ei châ ly kaw ei. 

Puhpa Beihruakhai, EM, MADC he Official lâ tawhta Puhpa Pawsa Lava, AITO nata Puhpa T. Pabua, Cameraman zy ta ama chakaochahlâh.

Party lâ tawhta Puhpa FC. Hnaikhu, Secretary ta avaw zi hra.

ISSUED BY:

Information & Publicity Department

Mara Autonomous District Council

Siaha.