PRESS RELEASE

NO.53/2022

SIAHA, 9 Chhiepa, 2022, Pobienoh - Atanoh kha Saikao biatuhpa MDC Puhpa Beihruakhai, Executive Member(EM) i/c Agriculture & Farmer Welfare, Horticulture and Minor Irrigation Departments, MADC ta 12th Term MADC General Election hnei khai tawhta a ei 1 nawpa ta alynabie rei awpa ta Kaochao ‘E’ a tly.

Kaochao ‘E’ khihsawzy ta Bazar shed chô liata Public Meeting hneipa ta Programme pha kawpa vaw taopa ei ta, Puhpa T. Biakmuana ta alykheina Programme a chhihtha. Machâ HC. Beihai ta pavaosana hnei ta, laihsa CZ. Rampanmawii ta hlasapa ta zawpi a palôpahawh. 

VC-I, VC-II, MNF Unit-I, MNF Unit-II, MNWF tawhzy ta alykheina pawpi ri nata ryuchâ hlâ ei ta, MNWF zy ta a lahpinô Pihnô Angely Hlychho hnoh ta Pawpi ri ama hlâ hleikhô ta poh angia kawpa ama pasai. He programme liata Saikao nata New Saikao tawhta khitlâh nôpaw thokhazy amâ vaw hlao thei hra.

Puhpa CL. Hranga, Secretary, MNF District HQ, Siaha ta Siaha tawhta asie theipa officials nata party nôpawpazy hmiapahnosana a hnei.

He khai tawhta Chairman ta Puhpa Beihruakhai biereina hnei awpa hrua ta, ary liata palâsapa he a bierei tlâhpi viapazy a châ:-

“Ahmiatuata atanoh daihti pha kawpa miah pie tuhpa eima Khazohpa hnoh ta alynabie reih na ta, atanoh liata MADC officials, MNF District HQ, Siaha nôpawpa nâ zi tuhpa zydua hnoh ta alynabie reih na ta, Kaochao ‘E’ khihsaw zydua, VC, NGO nata Awnano nôpaw zydua hnoh ta alynabie reih na ta, atanoh liata palyupalihna programme rônah kawpa eina taopa vâ ei chi ta palôh hmeiseihpa ta alynabie ei reih.”

“Election avaw pai tawhta thlai ei bia lâ azu awpa ei khoh kaw tarawpa ta sawhkhâ lâ hmo pasiapanô awpa a y chielie vâta ei zu patoh thei leina kyh liata pei tah kaw na ta, bia zawpizy pachâthaina ei châ haw ei.”

“Eima bia tawhta hlaotlohna ato leipa Candidate zy taokhei ei na ta, atloh khao leipazy rai chhâhchabâhpazy ei theina hawhta hria lymâ achhuah na ta, bia châta raihriana kyh liata, apeimawhna hawhta bia avaw mohôh chiehpa nôpaw hmiatuapazy asaohiah lymâ ei chhuah aw.”

“Election vaw hnei khai ha bâ pi ta, atahmâ cha bia châta raihria pathao â daih hapa vâta Political Party y khao mâh leipa sa la, party ziza ahripa pachhôpa ta ti nata râh hmahsie nawpa ta palôh miakha phaoh chyu awpa ta eimâ hrua hmeiseih.”

“Siaha lâ akhypa ta rairu kawpa nata sôhthih hluhpi pachhâpa ta Office adaoh byuh lei awpa ta keima pôhpa ta bia lâ azâ lâ lymâpa ta eima khih chyu liata adaoh thei awpa ta y ei chhuah aw.”

“Atanoh liata ei phuh leipa EM châna nâ pie tuhpa MNF & INC Joint Legislature nôpawzy nata eima CEM hnohta alynabie ei reih.”

“MADC liata Joint Legislature nôpawzy pôhkha hawhta eima sie; ei bia lia chhao party nanopa tah leipa ta pôhkha hawhta sie lymâ awpa ta ei châ haw ei.”

“Public meeting eima hneina su Bazar shed he pha lei kaw ta, ei paveih kaw; sa pathieh awpa ta ei theina hawhta hmah la ei chhuah.”

“Achuna lâ hmah eima sie via lymâ thei nawpa ta ei theina hawhta hmah la aw na ta,  Bâlu lapa ta nietluapazy chhao hmah ama sie lymâ thei nawpa ta ei theina hawhta hmah la ei chhuah.”

“Kaochao ‘E’ liata MTP ta office eima hnei leipa he paveih kaw na ta, ei term chhôh ta eima hnei cheingei thei nawpa ta hmah la ei khoh kaw. Cha dei châ leipa ta Kaochao ‘E’ he ti yna su châ ta, ti azaw thaipazy ta nietluana taihta ama hmâ thei nawpa ta hmah la khei ei khoh kaw hra.”

“Keima he niebaw tluana kyh liata ahru ta ahru khei laihpa chyhsa châ na ta; vao nata sahroh pasapa he ei pahâh khei kawpa a châ. Asu liata rai hria ta, ‘on the spot survey’ hneipa ta Agri. lâ hmah pasiesa awpa he ei khoh kawpa a châ; hehe Agri. portfolio ei tona chhâpa chhao a châpa ei pahno.”

“Kaochao ‘E’ chyhsazy he chyhsa ngâchhih kawpa nama châ; he hawhta a châ no ta hmoto he Khazohpa ku liata a y; ano liata hiah si la, eima peimawhpa raizy cha ano chyhsazy siepahliepa ta miah a pie aw tahpa zo si la, ngâchhih kawpa ta hâ suh u.”

“Party nata party areipachhie leipa ta, O sa baona, sahroh baona nata sahdô baona apeimawhpazy cha party tah leipa ta adaoh hialia awpazy ta dao ei sala tahpa he ei khopa a châ.”

“Anodeikua sawhkhâ tawh sai ta asaipa ta hmoto dao eimâ hnabeiseih awpa châ vei; keimo ta eima hriapazi awpa nata ngâchhih kawpa ta eima raizy eima tao awpa he beneficiaries zy eima maohphaohna a châ.”

“12th Term MADC liata Member châ hra awpa ta na khokhei tah, kyhpachâna chô ta ama vote sôh kawpa nâ pie tuhpa zydua hnoh ta, palôh hmeiseihpa ta alynabie ei cha hlâ ei.”

“Achhâ chaina liata - atahmâ cha election vaw chhâ ha ta, party nano nanopazy ta hmiahaopa hawhta y leipa ta, he khih, ti nata râh hmahsie via lymâ nawpa châta hria paraoh lymâ awpa ta bia zawpi zydua cha hrua ei na ta, ei châ haw ei. Ei châ ly kaw ei.”

He khai tawhta MNF District HQ, Siaha vyuhpa ta Puhpa K. Ngobei ta biereina daihti hmâh ta, Puhpa JH. Rachhua, President, Saikao MNF Unit ta biereina chyupa a hnei. Puhpa C. Vanneithanga, VCP Kaochao E-I nata Puhpa HC. Paly, VCP Kaochao E-II zy ta biereina daihti ama hmâh hra.

Puhpa Beihruakhai he MADC officials lâ tawhta Puhpa Robertson B. Khithie, AHO, Puhpa Beirôkhu Beitâ, I & PO, Puhpa Syuhlo Beichakhei Mara, PS to CEM, Puhpa T. Beihronga, ASCO, nata Puhpa T. Pabua, Cameraman, I & PD zy ta zi ei ta, MNF Distirct HQ, Siaha tawhta Puhpa FC. Sakhu, Secretary, Puhpa R. Pathuama Secreatary, Puhpa CL. Hranga, Secretary & Media Deptt. Secretary, Puhpa BH. Beirahly, Teasurer, (MNYF) Pihnô Lalmuanpuii, Adviser MNWF, Puhpa K. Ngobei, Puhpa David HRT. Khuma, Puhpa Nixon zy ta ama zi thei hra.

Puhpa Beihruakhai Paw Puhpa L. Beichhua nata a nô Pihnô H. Nasi, Lawngtlai liata a y haipazy ta he programme he a vaw hlao thei hra ei ta, a lahpiô Pihnô Angely Hlychho chhao Siaha tawhta zipa ta a chakaochahlâ thei hra.

Programme chhâ tawhta Puhpa C. Lalhmachhuana nata Puhpa C. Thlirsanga zy ta Puhpa Beihruakhai, MDC nata EM alykheina kyhchhi amâ chhuanohpa cha khichhai-khichhôh ta aly kawpa ta dôh chyupa a châ.

ISSUED BY:

Information & Publicity Department

Mara Autonomous District Council

Siaha.