PRESS RELEASE No.108/2020

SIAHA, 17 Khihpa, 2020, Pobienoh – Atanoh my dawh 11:00 Am pa ta Farmer’s Training Centre, MADC liata MADC Vice Chairman, Planning (Plg.) and Development Board thiehpa Puhpa B. Luaha, Saikao biatuhpa MDC alykheina hneipa a châ.

He alykheina he Puhpa H. Sahlo, Chairman ta chhihtha ta, Puhpa Pachi Hlychho, CP & R ta Khazohpa lâ thlahchhâna hnei ta, Puhpa P. Sama, Executive Secretary ta Mizoram sawhkhâ tawhta Vice Chairman raona Notification vide No.A.43017/5/2017-DC&MA(M) of 13/7/2020 châ rei papuana a hnei.

He khai tawhta alykheina châta MADC vyuhpa nata Siaha District BJP vyuhpa ta pawpi hlâna hneipa a châ.

Puhpa N. Zakhai, CEM, MADC zachhihpa ta alykheina biereina chyupa hnei ta, “11th Term (2017-2020) MADC he sawhkhâna siekheipa avaw châ tawhta chhutla chakhâ, riethei rairuna thata atyh pi ta, eima hrialâhpa khongaitapa pa 2 (Puhpa BL. Bana, Tôkalô biatuhpa & Puhpa NG. Silla, Siaha North-I biatuhpa) zy ta miah apahâsai ei ta, chahawh ta Ex-MDC pa 1 (Puhpa Hiphei) miah apahâsai ta, pei tah pi ta, eima taokhei hmeiseih” tahpa ta a reih.

“Eima pasai leina chô ta Puhpa KL. Bana eimâ chhaih hapa vyuhpa atlyna liata Khazohpa ta Puhpa M. Laikaw miah pie ta, chahawhna hra cha ta Puhpa Ng. Silla eimâ chhaih hapa vyuhpa ta atanoh liata Puhpa B. Luaha miah a pie; châna he chyhsa ta chahrao chatôh ngâkaw vâta to theipa châ leipa ta, Khazohpa ryhraopa tlao a châ tyh.”

“Puhpa B. Luaha he adona akhohpa, biatuh areisi kawpa nata ahriapasa kawpa a châ; MDC a tloh hlâ tawh chhao ta a bia liata chhiena/phana kyh liata abyuhna hawh ta phei zy ta sie laih ta, Osa lyutaopazy ano ku tlai ta hriakhei laih ta, nôhmei hârâpazy châta byhnâ avaw châ lymâpa a châ.”

“Nawhna hro nata sei châna hmia pasah ta, riethei tao tuana he hmialâ daihti liata noh khaihpa nata lâthlôh phapa miah chhihtha tuhpa a châ tyh tahpa âvaw lâ pasia kaw tyh.”

Puhpa N. Zakhai chata alykheina bie hlâ ta, Vice Chairman rai he apha kawpa ta hria awpa khokheina sâh chaipa a hlâ hra.

Siaha District BJP President Puhpa M. Laikaw, MDC, Tôkalô biatuhpa ta biereina chyupa hnei ta, MADC Officers & Staff zy ta Cooperation pha kawpa hneipa ta chiehleina nata tlohleina moh leipa ta adeichhyna nata akhokheina chô ta Vice Chairman thiehpa he official zy ta deichhy chyu awpa ta ahawna a tao.

“Planning (Plg.) and Development Board he MADC hmahsie nawpa liata chhaichhi peimawh kawpa a châ. Chhôhkha ativy awpa ta planning sianôpa hnei apeimawhpa hawhta MADC ry liata Department to ta planning sianô kawpa hnei byuh ta, Department zydua chô liata Planning (Plg.) and Development Board a ypa he a siezie âsu lei khiah MADC he y zie hneileipa ta a sie aw. Chahawh pyly ta Dep’t to nahta cooperation hneipha awpa apeimawh hmeiseih.”

“Puhpa B. Luaha he Mumbai liata B.E. achu patlôpa, English nata Hindi reih zy athai kawpa châta, MADC eima hmâ phahnai kaw nahta hnabeiseihna hnei na ta, hmialâ a sie lymâ nawpa liata khokheina sâh chaipa ei hlâ.”

Puhpa B. Luaha ta zawpi avypazy hmiakô liata tovyuh/châna pha kawpa apatohsa tuhpa Khazohpa nata Puhpa N. Zakhai, CEM zachhihpa nata a hrialâpazy hnoh ta alynabie reih ta, MDC châ thei awpa ta saiheina nata khokheina apatosa tuhpa a bia Saikao bia zawpizy hnoh chhao ta alynabie a reih hra. He hleikhô ta châ â vaw chuna liata rairuna â tyhpa nata MDC vaw châ awpa ta kô 2007 tawhta MDC châ awpa ta â vaw piepa thâtihzy reina hnei ta, MDC châ awpa ta hneirôh dyhchhie vaw peimawh hlei leipa ta, Khazohpa khokheina nata  chyhsapa hriapasana he apeimawh zie reih ta, atanoh programme avaw hlaopa nata Mara zawpi, he châna thiehpa alykhei tuhpa zydua hnoh ta alynabie a reih.

He alykheina he COVID-19 vâta chysa  hluhpi ta ahlao awpa âryh lei vâta EMs, MDCs, Party nôpawpazy nata MADC official hrua pa-eihpazy thokhazy dei ngâlâh amâ hlao.

ISSUED BY:-

Information & Public Relations Department

Mara Autonomous District Council

Siaha.